Dual PanelImomoken Musa kerna kematen anak sintua
1Kenca bage nina TUHAN man Musa, "Sada ukumen nari ngenca ateKu Kubereken man raja Mesir ras rayatna. Kenca si e labo saja terjeng iberena lawes ngenca, tapi ipelawesna nge pe.
2Emaka katakenlah man kalak Israel gelah ipindona man tetangga-tetanggana barang-barang emas ras pirak."
3Ibahan TUHAN maka melumbar kalak Mesir man kalak Israel; terlebih-lebih pe Musa, tuhu-tuhu mehaga kal ia iakap kerina pegawai-pegawai raja ras rayat Mesir.
4Ikataken Musa man raja nina, "Bagenda nina TUHAN, 'Kira-kira tengah berngi Kubentasi me negeri Mesir;
5emaka mate kerina anak dilaki sintua i negeri Mesir, i bas anak raja nari, si mewarisi kursi kinirajan, seh ku bas anak dilaki sintua i bas anak budak si diberu si erdahin i bas batu penggiling gandum. Bage pe anak si pemena i bas asuh-asuhen mate kerina.
6I je terbegi me sora tangis si megang i belang-belang Mesir, si la kin nggo pernah jadi bage, janah lanai ndigan pe jadi bage.
7Tapi man kalak Israel ras asuh-asuhenna biang pe la nggit ngereng. I je itehndu me maka Aku, TUHAN, la seri perbahanenKu man kalak Mesir ras man kalak Israel.'"
8Ndungi rananna nina Musa, "Emaka kerina pegawai-pegawaindu reh me pagi ndahi aku janahna erjimpuh i lebe-lebengku, jenari ipindona alu mesek-sek gelah kubabai kerina bangsangku lawes, kenca bage, lawes me aku." Kenca ibelasken Musa kata enda, alu pernembeh si gara la teralang itadingkenna raja.
9Nggo ikataken TUHAN man Musa nina, "Raja tetap nge la nggit megiken kam, gelah banci Kubahan tole tanda kuasa i negeri Mesir."
10Ibahan Musa ras Harun kerina tanda-tanda kuasa i lebe-lebe raja, tapi ipemersik TUHAN ukur raja emaka la iberena bangsa Israel nadingken negeri Mesir.