Alkitab Mobile SABDA
[VER] : [KARO]     [PL]  [PB] 
 <<  Matius 22 >> 

Perumpaman kerna kerja erdemu bayu (Luk 14:15-24)

1Ngerana ka Jesus man kalak si nterem alu perumpaman nina,

2"Kinirajan Surga e bali kap ras sekalak raja erbahan kerja erdemu bayu anakna.

3Isuruhna suruh-suruhenna ngelegi kalak si nggo iundangna, tapi sekalak pe la nggit reh.

4Emaka isuruh raja e ka suruh-suruhenna si deban nina, 'Katakenlah man kalak si nggo iundang e: Nina raja, nggo sikap kerina pangan; lembu ras asuh-asuhenku si mbur nggo igeleh; e maka marilah ku kerja erdemu bayu enda!'

5Tapi kalak si nggo iundang e la megiken kalak si erlegi enda. Lit lawes ku juma, lit lawes ndahiken usahana,

6janah lit ka pe si nangkap suruh-suruhen raja ndai, iligasina jenari ibunuhna.

7Perbahan si e merawa raja. Isuruhna perajurit-perajuritna ngkernepken kalak si munuh ndai bage pe enciluk kuta kalak si munuh e.

8Jenari nina man suruh-suruhen, 'Nggo sikap pangan guna kerja erdemu bayu, tapi kalak si nggo kuundang erpenulak.

9Emaka to lawes ku simpang-simpang pasar, undanglah ku kerja enda asakai jelma si ijumpaindu.'

10Berkat suruh-suruhen e ku simpang-simpang pasar, iundangna kerina kalak si ijumpaina subuk kalak jahat bagepe kalak bujur seh maka nggo dem ingan kerja erdemu bayu ndai.

11Asum reh raja e ku bas njumpai temue, idahna sekalak si la isambarina uisna asum ia bengket ku bas ingan erdemu bayu e.

12Nungkun raja e man bana nina, 'O teman, ngkai maka la isambarindu uisndu muatndu bengket ku bas ingan enda?' Sinik saja ia.

13Emaka nina raja man suruh-suruhenna, 'Iketlah tanna ras nahena, jenari ambekken ia ku ingan si gelapna kal. I je tangis ras mesui kal atena!'"

14Emaka idungi Jesus CakapNa nina, "Sabap nterem kalak si idilo, tapi la piga si ipilih."

Penungkunen kerna nggalar pajak (Mrk 12:13-17; Luk 20:20-26)

15Jenari lawes kalak Parisi e arih-arih guna ncubai Jesus alu penungkunen.

16Emaka raduken piga-piga kalak i bas parte Herodes nari, Kalak Parisi nuruh ajar-ajarna ndahi Yesus. Nina persuruhen e, "O, Guru, ieteh kami maka Kam kalak bujur. Kam ngajar alu terus terang kerna sura-sura Dibata nandangi manusia, alu la biar-biaren man ise pe. Sabap la erpilihen manusia man Bandu.

17Kataken dage man kami, la kin ngelanggar Undang-undang agama Jahudi adi igalari pajak man pemerentah Roma?"

18Tapi ieteh Jesus maka jahat ukur kalak enda emaka nina, "O kalak pekulah-kulah! Ngkai maka icubaindu Aku?

19Cidahken lebe man bangKu selambar duit!" Icidahken kalak e selambar duit man Jesus.

20Jenari nina Jesus, "Gambar ras gelar ise kin enda?"

21Erjabap kalak ndai, "Gambar ras gelar kepala pemerentah Roma." Jenari nina Jesus man bana, "Adi bage, bereken man pemerentah Roma kai patut ibereken man bana, janah berekenlah man Dibata kai patut ibereken man Dibata."

22Megi si enda jengang kalak ndai. Jenari lawes ia nadingken Jesus.

Penungkunen kerna kekeken i bas si mate nari (Mrk 12:18-27; Luk 20:27-40)

23I bas wari si ndai reh piga-piga kalak Saduki ndahi Jesus. Kalak enda me si ngatakenca maka manusia labo lit keke i bas si mate nari.

24Nungkun ia man Jesus nina, "O Guru nina Musa, 'Adi sekalak dilaki mate nadingken ndeharana, janah la lit pupusna, emaka diberu si nggo mbalu e arus ilako-mangani senina si mate ndai gelah ipupusna anak jadi gancih si nggo mate e.'

25Lit me nai i jenda ringan pitu kalak dilaki, pituna ia sembuyak. Empo si ntua, jenari mate ia. Janah perbahan la lit pupusna emaka ilako-mangani si nomor dua diberu e.

26Mate ka si nomor dua e, la lit pupusna. Bage ka me pe jadi nandangi si nomor telu janah bage me seterusna seh pituna ia nggo ngempoi diberu e.

27Dungna diberu e pe mate.

28Dage, asum manusia keke i bas si mate nari, ndehara ise nge pagi ia? Sabap pituna ia nggo erjabu ras diberu e."

29Ngaloi Jesus, "Nggo lepak kal kam! Sabap la iangkandu Pustaka Si Badia, bage pe la iangkandu Kuasa Dibata.

30Sabap kenca manusia keke i bas si mate nari, ia bali kap ras malekat-malekat i surga, lanai ia empo ntah pe sereh.

31Dage kerna si mate nggeluh mulihi, langa kin pernah iogendu i bas Pustaka Si Badia kai si ikataken Dibata man bandu? Nina Dibata,

32'Aku kap Dibata si tetap isembah Abraham, Dibata si tetap isembah Isak ras Dibata si tetap isembah Jakup.' Ertina Ia labo Dibata si isembah kalak mate tapi Dibata si isembah kalak si nggeluh."

33Jengang kal kalak si nterem megi pengajaren Jesus enda.

Undang-undang si pentingna (Mrk 12:28-34; Luk 10:25-28)

34Kenca idah kalak Parisi maka lanai pang kalak Saduki nungkun man Jesus, arih-arih ia,

35jenari sekalak i bas ia nari, e me guru agama, ncubai Jesus alu penungkunen nina,

36"O Guru, perentah si apai kin si pentingna kal i bas kerina Undang-undang agama?"

37Erjabap Jesus, "Kelengilah Tuhan Dibatandu asa ukurndu, asa tendindu, dingen asa gegehndu lit.

38Enda me perentah si mbelinna dingen si pentingna.

39Si peduaken bali ras si ndai e me, 'Kelengilah temanndu manusia bagi kam ngkelengi dirindu.'

40Kerina Undang-undang agama si ibereken Musa ras nabi-nabi erpalasken duana perentah enda ndai kap."

Penungkunen kerna Raja Penampat si ipadanken Dibata (Mrk 12:35-37; Luk 20:41-44)

41Asum kalak Parisi e pulung denga, nungkun Jesus man bana, nina,

42"Kuga pengakapndu kerna Raja Penampat si ipadanken Dibata e? Kesusuren ise kin Ia?" Erjabap kalak e, "Kesusuren Daud."

43Jenari nina Jesus, "Adi bage, ngkai maka ikataken Daud Ia Tuhan? Sabap Daud si ipengaruhi Kesah Si Badia ngataken,

44'Nina Tuhan man Tuhanku: Kundulken arah kemuhenku, seh Kutamaken imbang-imbangndu i teruh tapak-tapak nahendu.'

45Dage, adi Raja Penampat si ipadanken Dibata e igelari Daud Ia Tuhan, kuga banci Raja e kesusuren Daud ka?"

46Sekalak pe la lit ngasup ngaloi Jesus; janah mulai i bas wari nari ise pe lanai pang nungkun man Jesus.


  Share Facebook  |  Share Twitter

 <<  Matius 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel