Alkitab Mobile SABDA
[VER] : [KARO]     [PL]  [PB] 
 <<  Matius 25 >> 

Perumpaman kerna sepuluh kalak singuda-nguda

1"I bas paksa e Kinirajan Surga bali ras sepuluh kalak singuda-nguda. Isaganina lampuna jenari lawes ia ngalo-ngalo kalak empo.

2I bas si sepuluh kalak e, lima kalak lenge, lima kalak pentar.

3Si lenge ibabana lampuna tapi la ibabana minak persedian;

4si pentar ibabana lampuna ras minak persedianna tare botol.

5Perbahan melawen maka reh si empo e, munduk-unduk ia kerina jenari tunduh ia.

6Tengah berngi terbegi sora erlebuh nina, 'Enda si empo ndai! Alo-alolah ia!'

7Emaka keke singuda-nguda ndai kerina, ipesikapna lampuna.

8Nina singuda-nguda si lenge man si pentar, 'Man kami min sitik minakndu sabap nimpet atena lampu kami.'

9Ngaloi singuda-nguda si pentar e, 'Lanai kari bias minak kami adi man bandu deba, emaka ulin tukur minakndu ku kede.'

10Asum ia lawes nukur minak reh si empo e. Singuda-nguda si nggo sikap nimaisa bengket ras si empo ku ingan si nggo isikapken guna kerja e, jenari pintun ieruk.

11Kenca bage reh si nguda-nguda si lenge ndai, erlebuh ia, nina, 'O tuan, tuan! Talangi min pintun enda gelah bengket kami.'

12Ngaloi si empo e, 'Tuhu-tuhu la kam kutandai.'"

13Jenari nina Jesus, "Dage ersikap-sikaplah sabap la ietehndu warina ntah pe jamna Tuhan reh."

Perumpaman kerna telu kalak juak-juak (Luk 19:11-27)

14"Paksa si e pagi, Kinirajan Surga e bali kap ras sekalak tuan si berkat atena ku negeri si ndauh. Idilona juak-juakna jenari iberekenna erta-ertana gelah ipokokken juak-juak e.

15Sekalak iberekenna lima puluh ribu duit emas, sekalak dua puluh ribu duit emas janah sekalak nari iberekenna sepuluh ribu duit emas; sekalak-sekalak iberekenna rikutken kengasupen juak-juak e. Kenca bage berkat tuan ndai.

16Juak-juak si ngaloken lima puluh ribu duit emas e minter ibahanna usahana; idatna untungna lima puluh ribu duit emas.

17Juak-juak si ngaloken dua puluh ribu duit emas pe bage ka nge ibahanna; idatna untungna dua puluh ribu duit emas.

18Tapi juak-juak si ngaloken sepuluh ribu duit emas e la bage; ibunikenna saja duit tuan ndai.

19Kenca ndekah, mulih tuan ndai, idilona juak-juak guna erkira ras.

20Reh juak-juak si ngaloken lima puluh ribu duit emas, ibabana bungana lima puluh ribu duit emas janah nina, 'O tuan, lima puluh ribu mbaru enda iberekenndu man bangku, genduari nggo kudat lima puluh ribu duit emas nari.'

21Ngaloi tuan e, 'Mehuli kal perbahanenndu e. Kam juak-juak si tutus dingen bujur; tutus atendu i bas si kitik, perbahan si e kupercayaken man bandu si terbelinen. Mari bengketlah kam ku bas, ersenang-senang ras aku.'

22Jenari reh juak-juak si ngaloken dua puluh ribu duit emas, nina, 'O tuan, dua puluh ribu duit emas mbaru enda iberekenndu man bangku; genduari nggo kudat dua puluh ribu nari.'

23Ngaloi tuan e, 'Mehuli kal perbahanenndu e. Kam juak-juak si tutus dingen bujur; tutus atendu i bas si kitik, perbahan si e kupercayaken man bandu si terbelinen. Mari bengketlah kam ku bas ersenang-senang ras Aku.'

24Kenca bage reh juak-juak si ngaloken sepuluh ribu duit emas nina, 'O Tuan, kueteh maka Kam kalak kejam. IperaniNdu AteNdu si la IsuanNdu, ipepulungndu AteNdu ulih benih si la Kam nuansa.

25Perbahan si e mbiar aku, emaka kutanemken duit si IberekenNdu e. Enda DuitNdu ndai.'

26Ngaloi tuan e, 'Kam juak-juak si jahat dingen perkisat. Bahanlah kuperani si la kusuan, kupepulung si la kuerapken,

27ma patut min ndai iberekenndu duitku e man si mbungaken duit? Ma banci kenca aku mulih kualoken ras bungana?

28Buatlah duit e i bas ia nari, jenari bereken man si nggo lit i bas ia seratus ribu duit emas.

29Sabap man kalak si lit ibereken tole gelah idatna lebih asa cukup; tapi kalak si la lit i bas ia, si lit sitik i bas ia e pe ibuat i bas ia nari.

30Juak-juak si la terpake enda sampetkenlah ku bas ingan si gelap; je tangis me ia dingen mesui kal atena.'"

Ukumen i bas wari pendungi

31"Asum reh pagi Anak Manusia persuruhen Dibata e jadi Raja janah kerina malekat-malekat ras Ia, kundul me Ia i kursi KinirajanNa.

32Jenari pulung me kerina manusia i lebe-LebeNa. Kenca bage IbagiNa me manusia e jadi dua terpuk, bagi permakan nerapken biri-biri i bas kambing nari;

33biri-biri arah kemuhen, kambing arah kawes.

34Jenari nina Raja man kalak si arah KemuhenNa, 'Marilah kam si nggo ipasu-pasu BapangKu; alokenlah Kinirajan si nggo isikapken Dibata man bandu mulai kin IjadikenNa doni enda.

35Sabap asum melihe Aku iberendu man Aku, asum muas Aku iberendu minem; asum tandang Aku idilondu kesilang ku rumahndu,

36asum manjang-anjang Aku iuisindu, asum sakit Aku iadep-adependu, janah asum Aku i bas penjara idahindu.'

37Jenari ngaloi kalak si arah kemuhen e, 'O Tuhan, ndiganai Kam idah kami melihe jenari ibere man kami, tah muas Jenari ibere minem kami?

38Ndiganai Kam idah kami tandang Jenari idilo kami Kam kesilang ku rumah kami, ntah la Kam ruis jenari ibereken kami uisndu?

39Ndiganai Kam idah kami sakit ntah i bas penjara jenari idahi kami Kam?'

40Erjabap Raja e nina, 'Kukataken man bandu: Kai si ibahanndu man sekalak si musilna i bas seninangKu enda, eme si tuhuna perbahanenndu man bangKu.'

41Jenari ngerana Raja e man si arah KawesNa nina, 'Laweslah i bas Aku nari o kam si nggo isumpahi Dibata! Laweslah ku bas api si la ernimpet-nimpet si nggo isikapken man Iblis ras malekat-malekatna!

42Sabap asum melihe Aku la iberendu man, asum muas Aku la iberendu minem.

43Asum tandang Aku la idilondu kesilang ku rumahndu, asum Aku la ruis la iberekenndu uis man bangKu; janah asum Aku sakit ntah i bas penjara la dahindu.'

44Emaka ngaloi si arah kawes e nina, 'O Tuhan, ndiganai Kam idah kami melihe, ntah muas, ntah tandang, ntah la ruis, ntah sakit, ntah i bas penjara, jenari la Kam isampati kami?'

45Emaka erjabap Raja e, 'Kukataken man bandu: Asum la kam nggit nampati sekalak i bas seninangKu si musilna enda, Aku kap si la isampatindu e.'

46Jenari bengket me kalak si arah kawes e ku bas ukumen si rasa lalap; janah si arah kemuhen bengket ku bas kegeluhen si tuhu-tuhu si la erkeri-kerin."


  Share Facebook  |  Share Twitter

 <<  Matius 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel