Dual PanelPujin man si mada tinepa
1Pujilah TUHAN, o tendingku! Andiko seh kal Kam muliana, o TUHAN Dibatangku! Kam ruisken kiniulin dingen kemulian.
2Kam icabini terang si ersinalsal. IkimbangkenNdu langit desken kemah,
3i babo lau i das langit, IpajekkenNdu RumahNdu. Embun IjadikenNdu man GeretaNdu, kabeng angin IersakNdu.
4Angin IjadikenNdu man PersuruhenNdu, kilap jadi si ErdahinNdu.
5I babo palas si nteguh IpajekkenNdu doni enda, emaka asa ndigan pe labo geling.
6Kenca bage IcabiniNdu alu lawit lau nengneng namburi ancuk-ancuk deleng.
7Tupung IsergangNdu, kiam lau e, megi PerentahNdu lawes ia minter.
8I bas deleng-deleng nari maler kuse me lau e, ku bas ingan si IsikapkenNdu i berneh.
9ItetapkenNdu baleng si la banci ibentasina, maka ula nai nari itamburina doni enda.
10IsemburkenNdu sumbul lau i bas baluren-baluren nari, i bas kelang uruk-uruk nari maleren lau anak,
11lako mere minem kerina rubia-rubia i mbalmbal, gelah ulanai muas kalde-kalde kerangen.
12Ndeher i bas lau anak e nari ibahan perik-perik asarna, rende-rende ia i datas dahan-dahan.
13I datas langit nari IusekenNdu udan ku deleng-deleng, dingen dem doni enda alu pasu-PasuNdu.
14IpeturahNdu dukut-dukut guna rubia-rubia, kerina erbage sinuan-sinuan man manusia. Gelah banci ia nuan-nuan,
15dingen IbahanNdu anggur si periahken atena. Minak saitun si erbahanca meriah akapna, pangan guna mereken gegeh man bana.
16Batang cemara i Libanon ndatken lau udan si cukup, kayu cemara e, Kam jine nuanca, o TUHAN.
17I je rasar perik-perik, i das batang cemara rasar me perik si gedang kerahung.
18Deleng-deleng si meganjang jadi ingan nggagat kambing kerangen, i bas liang-liang batu-batu cebuni me landak.
19IjadikenNdu bulan guna nentuken paksa-paksa, matawari pe tehna katawari paksana sundut.
20Tupung berngi IbahanNdu gelap, maka gawah-gawah kerina rubia-rubia si meliar.
21Singa-singa nguda erdengum ndarami pangan, pangan si IsikapkenNdu man bana.
22Kenca pultak matawari mulih ia, jenari gempang i bas inganna cebuni.
23Emaka ndarat me manusia ndahi dahinna, dingen terus erdahin seh ben wari.
24O TUHAN, nggo melala kal si IlakokenNdu, doni enda dem alu TinepaNdu. Kerinana e IjadikenNdu alu dem kepentaren.
25Nehenlah perkimbang lawit si mbelang, isin lau mahluk si kitik dingen galang.
26I je me erlajo Lewiatan TinepaNdu kapal-kapal erlayar i je.
27Kerina ia ngarap Kam gelah ndatken nakan i bas paksana.
28Panganna IsikapkenNdu, ngayak besur, man me ia.
29Adi ItulihkenNdu ia, gentar me ia kerina, adi IbuatNdu kesahna, mate me ia, mulihken jadi abu.
30Tapi adi IberekenNdu kesahna, jadi me ia, IberekenNdu geluh si mbaru man doni enda.
31Ermulialah TUHAN, tetap rasa lalap, malemlah AteNa erkiteken TinepaNa.
32IpernehenNa ku doni dingen nggirgir IbahanNa, IkuitNa deleng-deleng emaka ndarat cimberna.
33Rende ateku man TUHAN kidekah umur geluhku, asa gedang geluhku, rende ateku muji Dibatangku.
34Mbera ngena AteNa ende-endenku, sabap keriahenku reh i bas Ia nari.
35Kernepkenlah min i bas doni enda nari kalak perdosa, imasapkenlah kerina kalak jahat. Pujilah TUHAN, o tendingku! Pujilah TUHAN.