Alkitab Mobile SABDA
[VER] : [KARO]     [PL]  [PB] 
 <<  Mazmur 107 >> 

KITAP SI PELIMAKEN MASMUR 107-150 Ende-enden pujin kerna kiniulin TUHAN

1"Katakenlah bujur man TUHAN erkiteken KiniulinNa. Keleng AteNa tetap rasa lalap."

2Usur min ibelaskenndu o kam kerina si nggo IkeliniNa. Nggo IpulahiNa kam i bas imbang-ImbangNdu nari.

3I bas negeri-negeri Timur ras Barat nari kam IpepulungNa, ipersada i Utara dingen i Selatan nari.

4Lit si papak i gurun pasir, la jumpa dalan ku kota man inganna tading.

5Muas dingen melihe iakapna, nggo bene pengarapenna.

6I bas kiniseran e nari nderkuh ia man TUHAN, emaka ipulahi TUHAN ia i bas kepicetan nari.

7IbabaiNa ia arah dalan si pinter, ku bas sada kota man inganna tading.

8Arus kalak enda tetap ngataken bujur man TUHAN, kerna keleng AteNa si tetap, dingen tanda-tanda kuasa si IlakokenNa man bana.

9Kalak muas itunggahina seh puas, alu si mehuli ibesurina si kelihen.

10Lit ia tading i bas kegelapen, igari dingen ipenjaraken,

11erkiteken ilawanna perentah Dibata, erkiteken itulakna AjarenNa.

12Emaka labuh ia erkiteken dahin si mberat, guling ia, la lit si nampatisa.

13Erkiteken kiniseranna, nderkuh ia man TUHAN, emaka ipulahi TUHAN ia i bas kepiceten nari.

14IpedaratNa ia i bas kegelapen nari; IripukkenNa garina.

15Erdandanken si e, arus kalak enda ngataken bujur, kerna keleng AteNa si tetap, dingen tanda-tanda kuasa si nggo IbahanNa.

16Pintu-pintu tembaga IruntuhkenNa, eruk-eruk besi IripukkenNa.

17Lit kalak motu, ngenanami kiniseran erkiteken dosa-dosana, bage pe erkiteken kejahatenna;

18ngenen pangan mutah atena, narus me mutus atena kesahna.

19I bas kiniseran e nari nderkuh ia man TUHAN, emaka IpulahiNa ia i bas kepiceten nari.

20Alu PerentahNa, IpepalemNa kalak enda, jenari IpulahiNa i bas kematen nari.

21Erdandanken si e arus kalak enda ngataken bujur, kerna keleng atena si tetap, dingen tanda-tanda kuasa si nggo IbahanNa.

22Arus kalak enda ngataken bujur alu maba persembahen, alu ende-enden si meriah arus iberitakenna kerna perbahanen TUHAN.

23Lit kalak erlayar alu kapal i babo lawit, ndarami nakan alu erbinaga.

24Idahna uga perbahanen-perbahanen TUHAN, tanda-tanda kuasa si IlakokenNa i bas lawit.

25Alu PerentahNa, jadi me angin erpiu-piu, emaka jadi me galumbang si merawa.

26Kapal terangkat meganjang ku das, jenari igedapken ku bas lawit si mbagesna. I bas paksa-paksa si bage, bene kinimbisan jelma.

27Mbewat-mbewat dingen guling ia desken kalak mabuk, kerina kepentarenna la lit gunana.

28I bas kiniseran e nari nderkuh ia man TUHAN, emaka IpulahiNa ia i bas kepiceten nari.

29IpejenengNa angin si erpiu-piu, galumbang si merawa pe nggo sinik.

30Meriah ukurna sabap nggo lit ketenengen, jenari ibabai TUHAN ia ku pelabuhen si itujuna.

31Erdandanken si e arus kalak enda ngataken bujur man TUHAN, kerna keleng AteNa si tetap, dingen tanda-tanda kuasa si nggo IbahanNa.

32Arus kalak enda ermomo i tengah-tengah PerpulungenNa kerna kinibelinen TUHAN, dingen muji Ia i bas runggun pertua-pertua.

33TUHAN erbahanca lau belin jadi kerah, ulu lau jadi taneh kerah.

34Taneh si mehumur IbahanNa jadi taneh masin, erkiteken kejahaten si ilakoken kalak si ngianisa.

35Gurun pasir IsalihkenNa jadi tambak, taneh kerah IsalihkenNa jadi ulu lau maler.

36IpelepasNa kalak kelihen ringan i je, jenari ipanteki kalak e sada kota man inganna tading.

37Juma ierdangina janah isuanna batang anggur, si mereken ulih si seh kal buena.

38Ipasu-pasu TUHAN BangsaNa gelah ertuah, dingen asuh-asuhenna tetap reh buena.

39Tupung bangsa Dibata italuken dingen ipeteruk kalak, dem alu ate ceda ras itindih kalak,

40ipeteruk TUHAN kalak si nindihsa, IsuruhNa imbang-imbang bangsa e mampa-mampa i gurun pasir.

41Tapi IpulahiNa kalak musil i bas kiniseranna nari, jenari keluarga e tambah TambahiNa jadi nterem desken sada rarasen.

42Kalak bujur ngidah si e, emaka meriah ukurna, tapi kalak jahat isompel babahna.

43Ipekusur-kusur kalak si pentar enda kerina i bas ukurna, iakuinalah keleng ate TUHAN si tetap e.


  Share Facebook  |  Share Twitter

 <<  Mazmur 107 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel