TUHAN ras Raja si IpilihNa
1Masmur Daud. Nina TUHAN man tuanku raja, "Kundulken arah kemuhenKu, seh maka Kutamaken imbang-imbangndu i teruh tapak-tapak nahendu."
2I datas Sion nari ipebelangken TUHAN kinirajanndu, erkuasalah man imbang-imbangndu.
3Tupung warina kam reh erperang, bangsandu nampati kam alu ukur meriah. Desken namur erpagi-pagi, i datas deleng si badia nari rehen man bandu anak perana.
4TUHAN nggo erpadan alu sumpah, sumpah padan si tetap rasa lalap. "Kam kap imam seh rasa lalap, rikutken kesusuren Melkisedek."
5Tuhan kap arah kemuhenndu, kune nembeh Ia, kernep IbahanNa raja-raja.
6IadiliNa me bangsa-bangsa, emaka dem ingan erperang alu bangke. Ia si ngeripukkenca raja-raja i belang-belang doni enda.
7Raja e minem lau anak i tepi dalan, kenca dat gegeh, tedis ia i bas kemenangen.