Dual PanelSada ngenca Dibata
1Man BaNdu saja o TUHAN, labo man kami, man BaNdu saja nge kemulian arus ibereken, erkiteken keleng AteNdu si tetap dingen KesetianNdu.
2Ngkai maka bangsa-bangsa arus nungkun, "I ja kin Dibatandu?"
3I Surga kap Dibatanta, IdahikenNa kai AteNa IbahanNa.
4Dibata-dibata kalak ah, ibahan i bas emas ras pirak nari, ibentuk alu tan manusia.
5Lit babahna, tapi la beluh ngerana, lit matana tapi la erpengidah.
6Lit cupingna, tapi la erpemegi, lit igungna tapi la erpenganggeh.
7Lit tanna, tapi la banci ndadap, lit nahena tapi la banci erdalan.
8Kerina kalak si nggo njadikenca dingen tek man gana-gana e, jadilah ia bali ras gana-gana e.
9O kalak Israel, teklah man TUHAN, Ia kap si nampati dingen si ngkawali kam.
10O imam-imam, teklah man TUHAN, Ia kap si nampati dingen si ngkawali kam.
11O kerina si nembah man TUHAN, teklah man TUHAN, Ia kap si nampati dingen si ngkawali kam.
12TUHAN si nginget kita dingen si masu-masu kita, Ia si masu-masu kalak Israel, bage pe kerina imam-imam Dibata.
13Kerina kalak si erkemalangen man BaNa, ipasu-PasuNa, subuk si meherga ntah lang.
14TUHANlah si mereken tuah man bandu, ertambah-tambahlah kesusurenndu.
15Ipasu-pasu TUHANlah kam, Ia kap si nggo njadiken doni ras langit.
16TUHAN kap empuna Surga, doni IberekenNa man manusia.
17Kalak si nggo mate labo muji TUHAN, eme kalak si nggo nusur ku bas doni kematen.
18Tapi kita si nggeluh denga nge si ngataken bujur man BaNa, genduari nari seh rasa lalap. Pujilah TUHAN!