Dual PanelPertoton mindo penampat
1Masmur Daud. O TUHAN, dengkehken min pertotonku, perdiateken min pemindonku. Erkiteken kinibujuren ras PertetapNdu, aloi min aku.
2Aku suruh-SuruhenNdu kap, ula min aku erpekara ras Kam sabap la lit kalak si la ersalah i adep-AdepenNdu.
3Musuhku ngelis-ngelis aku, jenari idampeskenna aku ku taneh. Itamakenna aku ku bas tutupen si gelap, emaka nggo seri aku ras kalak si nggo ndekah mate.
4Nggo labuh kal aku, bene kal ukurku.
5Kepinget-inget wari-wari si nggo lepas, kuukuri kerina PerbahanenNdu, kukusur-kusur i bas pusuhku kai si nggo IlakokenNdu.
6Kuangkat tanku ertoto aku man BaNdu, desken taneh kelegon, muas aku man BaNdu.
7O TUHAN, genduari aloi min aku, nggo bene pengarapenku. Ula IbunikenNdu BaNdu man bangku, maka ula aku bali ras kalak si perlawesna kempak doni kematen.
8Persingeti bangku tep-tep erpagi-pagi kerna keleng AteNdu si tetap, man BaNdu saja ngenca aku ernalem. Pertotonku kupenangkih man BaNdu, tuduhken man bangku dalin si man dalinenku.
9Kam me inganku cicio, o TUHAN, pulahi min aku i bas imbang-imbangku nari.
10Kam kap Dibatangku, ajari aku ngelakoken PeratenNdu. Mehuli min Kam kempak aku, jenari babai aku arah dalin si pinter.
11Pegeluh min aku o TUHAN erkiteken GelarNdu, erkiteken KiniulinNdu tangtangi min aku i bas kesusahen nari.
12Erkiteken keleng AteNdu man bangku, bunuhlah kerina imbang-imbangku. Erkiteken aku suruh-SuruhenNdu, kernepken min kerina musuh-musuhku.