Pujilah Dibata penampatta
1Pujilah TUHAN! O tendingku, pujilah TUHAN.
2Asa umur geluhku kupuji ateku TUHAN, ateku rende man Dibata asa dekahna aku nggeluh.
3Ula kam ernalem man raja-raja, la lit manusia si ngasup engkelini kam.
4Kune mate ia, mulihken ia ku taneh, i bas wari si e kerina sura-surana peltep.
5Malem ate kalak si TUHAN Dibata penundalenna, si ibahanna Dibata nu Jakup jadi penampatna,
6si nepa langit, doni, lawit, ras kerina isina. Katawari pe ItepatiNa PadanNa.
7Ia kap ngerunggui kalak si itindih man kalak si kelihen, IberekenNa nakan. TUHAN si nangtangi kalak si i bas penjara nari,
8si pemedakken mata si pentang. Ipetedisna kalak si nggo guling, keleng AteNa man kalak bujur.
9Kalak pertandang si lit i negerinta IkawaliNa, diberu si nggo mbalu ras anak melumang IsampatiNa, tapi sura-sura kalak jahat lalap IbanNa la sahun.
10TUHAN kap raja sidekah-dekahna, o Sion, DibataNdu kap si erkuasa rasa lalap seh rasa lalap. Pujilah TUHAN!