Dual PanelPertoton sekalak si la ersalah
1Pertoton Daud. O TUHAN, dengkehkenlah pemindonku kerna kinibujuren, perdiatekenlah pertotonku mindo penampat! Begikenlah pertotonku, i bas biberku nari si la lit i je penipu.
2Kam me si ngerunggui kinibujurenku, sabap Kam si meteh bujur.
3Ietehndu isi pusuhku. Tupung berngi IpepayoNdu aku, arah dampar si apai pe nggo aku IujiNdu, janah la lit IdahNdu sura-sura si jahat i bas aku.
4Aku labo jahat bagi kalak si deban; patuh aku man PerentahNdu, dingen la kuikutken dalan kalak jahat.
5Tetap aku erdalan arah DalanNdu, dingen la pernah nilah i jenari.
6O Dibata, ertoto aku man BaNdu sabap IdengkehkenNdu aku; dage mulihlah Kam man bangku dengkehkenlah rananku.
7Cidahken keleng AteNdu si mbelin, janah kelini kami; i bas adep-AdepenNdu terkawal kap kami.
8Kawali aku bagi ngkawali anak mata, buniken aku i teruh KabengNdu.
9gelah ula aku ikerubui kalak jahat. Gelah ula ibuatna kesahku.
10La lit keleng ate i bas ia; rananna pe megombang.
11Genduari kuja pe aku, ikerubuina sura-surana ndampesken aku ku taneh.
12Bagi singa nggempangi panganna, irigepna atena aku gelah getem icaing-caingna.
13O TUHAN, mari min! Lawan dingen taluken musuh-musuhku, pulahi aku i bas kalak jahat nari alu PedangNdu.
14Pulahi min aku, i bas kalak si pepulung ertana i doni enda. Ukum min ia kerina alu cilaka, si nggo IsikapkenNdu guna ngukumsa. Kempu-kempuna pe, ula pulah i bas UkumenNdu nari.
15Tapi adi aku kutare me AyoNdu, erkiteken la lit kesalahen si kulakoken. Janah tupung aku medak, malem ateku ngidah siang AyoNdu.