Dual PanelPertoton sanga i bas kiniseran dingen ende-enden pujin
1Masmur Daud.
2Dibatangku, o Dibatangku, ngkai maka aku ItadingkenNdu? Serko aku mindo PenampatNdu, tapi lalap Kam la reh.
3O Dibatangku, kulebuh Kam tupung siang denga, tapi Kam sinik saja. Erlebuh aku sanga berngi, ukurku lalap la teneng.
4Tapi Kam Raja si Badia, man BaNdu Israel ngendeken ende-enden.
5Nini-nini kami ernalem man BaNdu, perbahan ernalem ia man BanNdu, ia IkeliniNdu.
6Erlebuh ia man BaNdu emaka ia ipulahi. Ernalem ia man BaNdu janah la ia juru.
7Aku labo manusia tapi bernga, si igombangi dingen iuru-uru kalak.
8Kerina si ngidah aku megombang, ercidur dingen ngupir ia.
9Nina, "TUHAN kap penalemenndu, ngkai maka Ia la reh ngkelini? Adi ngena ate TUHAN bandu ngkai maka la Ia reh nampati?"
10Kam pedarat aku i bas nandengku nari, IjagaNdu aku tupung kitik-kitikku gelah aku terkawal.
11Mena kin tubuh, geluhku lit i bas TanNdu, mulai kin i bas bertin nandengku, Kam kap Dibatangku.
12Nggo ndeher kiniseran, ula min Kam tetap ndauh O TUHAN, sabap adi la Kam, ise kin nampati aku?
13Bali ras rarasen banteng, ikeleweti musuh aku, bagi banteng si meliar i Basan nari, ikepungna aku.
14Nganga babahna ngalaken aku, bagi singa erdengum ngerigep panganna atena.
15Kerina gegehku nggo keri, bali ras lau mambur ku taneh, tulan-tulanku nggo nangtangen kerina, pusuhku melengas bagi lilin kena api.
16Kalah-kalahku kerah bali ras abu, dilahku leket i das langit-langit babahku. I bas abu kematen, TamparkenNdu aku.
17Gerombolen kalak jahat ngepung aku; bagi rarasen biang ideherina aku, itebakna tanku ras nahengku.
18Tulan-tulanku nggo teridah kerina, janah puas akap imbangku ngidahsa.
19Ibagi-bagina pakenku, jenari itikam tandukkenna baju lantangku.
20Tapi ula min Kam ndauh, o TUHAN, minter min Kam reh nampati aku.
21Kelini aku i bas pedang nari, pulahi min aku i bas biang si ngerigep nari.
22Aku lanai ergegeh, pulahi nui aku i bas tanduk banteng ras i bas babah singa.
23Kai si IbahanNdu kumomoken man bangsangku, i bas perpulungen kupuji GelarNdu.
24Pujilah Ia, o kam suruh-suruhen TUHAN, o kam kesusuren Jakup muliakenlah Ia. Erjimpuhlah i adep-AdepenNa o kam kesusuren Israel.
25Sabap la IpersilahangNa kalak si tertindih, dingen tetap IperdiatekenNa kiniseranna. Ia labo erpenundal, tapi IaloiNa adi erlebuh man BaNa.
26Kupuji TUHAN i tengah-tengah perpulungen si mbelin kerna kerina si nggo IbahanNa. I adep-adepen perpulungen si erkemalangen man TUHAN, kupersembahken persembahen si nggo kupadanken BaNa.
27Kalak musil man asa besurna, kalak si ndarami TUHAN pujilah Ia. Senang iakapna seh rasa lalap.
28Kerina bangsa ingetna TUHAN, i belang-belang doni enda nari reh kerina suku bangsa mulihken nembah man BaNa.
29Sabap TUHAN kap raja, Ia kap si merentah bangsa-bangsa kerina.
30Kerina kalak si meganjang rukur erjimpuh i lebe-LebeNa, manusia si ermasap-masap erjimpuh i adep-AdepenNa.
31Kesusuren si nandangi reh ersembah man TUHAN, ersundut-sundut Ia iberitaken. <22:32> - Man si langa tubuh pe dnggo ituriken, maka "TUHAN nggo ngkelini BangsaNa".