Dual PanelKejahaten manusia
1I bas si Daud suruh-suruhen TUHAN nari.
2Kalak jahat megiken pengajuk dosa seh ku bas pusuhna, sitik pe la ia mbiar man Dibata.
3Erkiteken meganjang iakapna bana, iakapna maka la ieteh TUHAN dosana janah la IukumNa.
4Rananna jahat janah melala takina, si mehuli dingen pentar la nai ia nggit ngelakokenca.
5Tupung ia medem-medem, ibahanna rencanana si jahat, la lit si mehuli si ilakokenna janah si jahat la pernah itulakna.
Kiniulin Dibata
6O TUHAN, keleng AteNdu seh ku langit, KesetianNdu seh ku awang-awang.
7KebenarenNdu seri ganjangna ras deleng, KinibujurenNdu seri bagesna ras lawit manusia ras rubia-rubia ipekena-KenaNdu, o TUHAN.
8O TUHAN, andiko ergana keleng AteNdu si tetap e, IkawaliNdu kami i teruh KabengNdu.
9Besur kami man pangan si IsikapkenNdu riba-iba, IbereNdu kami minem i bas lau BelinNdu si malem.
10Kam kap ulu kegeluhen, i bas SinalsalNdu idah kami terang.
11Man kalak si nandai Kam tetap IkelengiNdu, dingen IberekenNdu KiniulinNdu man kalak bujur.
12Ula PelepasNdu aku iperang kalak si meganjang ukurna, ula PelepasNdu aku ipelawes kalak jahat. <36:13> - Nehenlah i ja lit kalak jahat guling, i je ia ampar, lanai ngasup keke.