Dual PanelKedungen kalak jahat dingen kalak bujur
1Masmur Daud. Ula atendu nembeh kempak kalak jahat, ula mecimberu ngenehen kalak si erbahan jahat.
2Sabap bali ras dukut si kerah, minter me ia masap, mate me ia desken sinuan-sinuan si melus.
3Ernalemlah man TUHAN, dingen lakokenlah si mehuli, gelah kam la biar-biaren nggeluh i bas negeri e.
4Daramilah kemalemen atendu i bas TUHAN, maka IsehkenNa sura-surandu.
5Endesken dirindu man TUHAN, ernalemlah man BaNa, tentu IsampatiNa kam.
6IbahanNa maka kinibujurenndu ersinalsal, desken sinalsal matawari pantek ciger.
7Timailah TUHAN alu teneng, sabarlah nimai PerbahanenNa. Ula morahi kalak si rulih ngelakoken pertakin si jahat.
8Ula pelepas dirindu ikuasai ate nembeh ntah aru ate, e nuhsahi kam nge ngenca.
9Kalak si ngelakoken jahat ilesapken, tapi si ngarap man TUHAN ndatken taneh tading-tadingen.
10Kalak jahat pedas me lesap, adi idarami, lanai ia lit i japa pe.
11Kalak si meteruk rukur ndatken taneh e, inanamina kedamen ras kesenangen.
12Kalak jahat ngerencanaken si jahat, dingen nembeh atena kalak benar.
13Tapi tawa ate Tuhan ngenen kalak jahat, IetehNa maka lanai ndekah kalak e ilesapken.
14Kalak jahat nintak pedang dingen ngerentang panah munuh kalak musil dingen mesera, nggeleh kalak si ngelakoken si mehuli.
15Tapi ia jine ibunuh pedangna, janah pedangna ipenggelken.
16Aminna sitik pe sikerajangen kalak bujur, tapi ergan e asangken erta kalak jahat.
17Sabap ibuat TUHAN kap kuasa kalak jahat, tapi kalak bujur IkawaliNa.
18Ipekena-kena TUHAN kap kalak si ngikutken Ia, dingen negeri e rasa lalap ia empuna.
19Tupung negeri e i bas paksa kesusahen, la mesera iakapna, paksa kelihen cukup pangan i bas ia.
20Tapi mate me kalak jahat, desken asap bene me ia. Lesap me musuh-musuh TUHAN, desken rudang i mbalmbal.
21Kalak jahat minjam lanai iulihkenna, tapi kalak bujur melumbar i bas pemerena.
22Kalak si dat pasu-pasu i bas TUHAN nari dat bagin i bas negeri e, tapi kalak si IsumpahiNa ipelawes.
23Kalak si ngena ate TUHAN, ikawali dingen itegu-TeguNa geluhna.
24Guling pe ia la mekelek, sabap TUHAN kap si negu tanna.
25Mulai kin kitik-kitikku nari seh bagenda nggo metua, la nggo kuidah kalak bujur itadingken TUHAN, tah kempuna jadi pemindo-mindo.
26Pepinjamken dingen melumbar ia mere lalap, dingen anak-anakna mereken kemalemen ate man bana.
27Tadingkenlah si jahat, lakokenlah si bujur, gelah sinursurndu rasa lalap ngiani taneh enda.
28Sabap ngena kal ate TUHAN keadilen janah la ItadingkenNa kalak si patuh man BaNa. Kalak si bujur asa lalap ipekena-KenaNa, tapi kesusuren kalak jahat ipelawes.
29Kalak bujur me si ndatken bagin taneh i bas negeri e, janah ringan ia i je rasa lalap.
30Kalak bujur melasken ranan si pentar, dingen si benar nge si ibelaskenna.
31Ibunikenna Undang-undang TUHAN i bas pusuhna, la ia pernah nilah i jenari.
32Kalak jahat nggempangi kalak bujur, dingen ndarami dalan guna munuhsa.
33Tapi kalak bujur la iendesken TUHAN kempak musuhna, janah la IpelepasNa iukum i bas pengadilen.
34Ngaraplah man TUHAN dingen patuhlah PerentahNa, maka kam IpehagaNa, jenari jadi empu taneh pusaka, idahndu me kalak jahat ipelawes.
35Pernah kuidah kalak jahat si megombang, ia erkuasa desken batang cemara Libanon.
36Tapi dungna tupung aku mentas ka arah e, kudarami ia, tapi la aku jumpa.
37Nehenlah kalak bujur, perdiatekenlah kalak benar, kalak si ngena atena perdamen, nterem kesusurenna.
38Tapi kalak perdosa ikernepken kap, janah kesusurenna ilesapkenna.
39Ikelini TUHAN kalak bujur, dingen IkawaliNa i bas paksa kesusahen.
40IsampatiNa dingen IpulahiNa kap ia, IkeliniNa i bas kalak jahat nari, sabap man BaNa kap ia mindo pengkawali.