Alkitab Mobile SABDA
[VER] : [KARO]     [PL]  [PB] 
 <<  Mazmur 41 >> 

Pertoton gelah malem penakit

1Masmur Daud.

2Sangap kalak si mperdiateken kalak musil, TUHAN si nampatisa tupung ia i bas kesusahen.

3TUHAN si ngkawali dingen ngkelengi kesahna, ibahan Dibata maka sangap ia i doni enda, dingen la IendeskenNa ia man imbang-imbangna.

4Tupung ia bangger TUHAN si nampatisa, dingen mereken kejuah-juahen man bana.

5Ningku, "O TUHAN man BaNdu kap aku erdosa, mekuah min AteNdu, pepalem min aku."

6Ikataken musuhku si la mehuli kerna aku, atena gelah aku mate jenari lanai iinget.

7Kalak si reh ngenen aku, la bujur ukurna. Ipepulungna berita si la mehuli kerna aku, jenari ndarat ia, ikatakenna ku japa pe.

8Kerina kalak si ernembeh ate man bangku kusik-kusik; jenari iukurkenna si la mehuli kerna aku.

9Nina kalak e, "Mekelek kal penakitna, kutera pe lanai ia banci keke."

10Sedangken teman si kuteki, dingen kalak si man ras aku pe, nggo ngimbangi aku.

11O TUHAN mekuah min AteNdu; pepalem min aku, gelah aku banci erbalas man imbang-imbangku.

12Adi la aku tertalukenca, jenari kuangka maka ngena AteNdu aku.

13IsampatiNdu aku erkiteken si mehuli si kulakoken, jenari IbahanNdu maka aku nggeluh i bas adep-AdepenNdu seh rasa lalap. <41:14> - Pujilah TUHAN, Dibata nu Israel! Pujilah Ia genduari seh rasa lalap! Amin! Amin!


  Share Facebook  |  Share Twitter

 <<  Mazmur 41 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran