Dual PanelPertoton tupung i bas kesusahen
1I bas Daud nari.
2O Dibata, sampati min aku, nggo aku gedap terjeng kerahungku.
3Gedap aku ku bas kubang si mbages, la lit taneh piher man ingan tedis. Nggo gedah-gedah aku i bas lau si mbages, janah nandangi igedapken galumbang me aku.
4Latih kuakap, serko aku mindo penampat, seh maka kerah kalah-kalahku. Meser matangku, ngarap man penampat Dibatangku.
5Kalak si ernembeh ate man bangku la ersebap, teremen asang buk i bas takalku. Kalak si atena encedaken aku megegeh kap, iserangna aku alu curang. Ipaksana aku ngulihken erta si la kurampas.
6O Dibata, IetehNdu kap kelepakenku, la kap terligen dosangku man BaNdu.
7Ula min erkiteken aku, mela iakap kalak si ernalem man BaNdu, o TUHAN si Mada Kuasa. Ula pelepas kalak, si nembah man BaNdu, o Dibata nu Israel ijuruken erkiteken aku?
8Sabap erkiteken Kam kap aku igombangi, erkiteken Kam nge maka mela kuakap.
9Aku lanai itandai kade-kadengku, bagi kalak pertandang man keluargangku.
10Keleng ateku man RumahNdu gurlah bagi api i bas pusuhku, kalak si deban megombang BaNdu, tapi aku nge si rate mesui.
11Kupeteruk diringku alu puasa, tapi megombang kalak erdandanken si e.
12Kupake uis guni tanda ate ceda, tapi aku iuru-uru kalak.
13Icakapken kalak aku i bas runggun si mabuk-mabuk rende-rende kerna aku.
14Tapi ertoto aku man BaNdu, o TUHAN, paksa si payo IakapNdu, aloi min aku o Dibata. Sabap mbelin kap lias AteNdu, sampati min aku alu keleng AteNdu si tetap.
15Ula pelepas aku gedap i bas kubang, pulahi min aku i bas imbang ras lau si mbages nari.
16Ula pediat aku iombakken lau si ergalumbang, ula pelepas aku itelen lubang si mbages, ntah sumur nukupken ayona ku babongku.
17O TUHAN aloi min aku, sabap mehuli kap keleng AteNdu si tetap. Tulihken min aku, sabap mbelin kap perkuah AteNdu.
18Ula IbunikenNdu DiriNdu nandangi aku suruh-SuruhenNdu, aku i bas kesusahen, pedas min sampati aku;
19Mari min pulahi aku, bebasken aku i bas imbang-imbangku nari.
20Ietehndu uga kalak nggombangi aku, ipemela-melana ras ipeterukna aku. ItandaiNdu kerina imbang-imbangku.
21Nggo peltep pusuhku perban megombang kalak bangku, emaka bene ukurku. Kudarami kalak si erkuah ate, tapi la lit, kudarami pengapul, tapi sia-sia.
22Tupung aku melihe, ibereken kalak bangku racun, tupung aku muas ibereken bangku cuka.
23Kena cilakalah ia arah pesta-pestana, cilakalah ia erkiteken pesta agama.
24Pentangkenlah matana, janah gelgel awakna mesui.
25Curcurilah ia alu RawaNdu, dabuhkenlah TembehNdu man bana.
26Kernepkenlah kerina barung-barungna, maka lanai lit sada pe tading nggeluh i bas kemahna.
27Sabap isiksana kalak si IukumNdu, dingen isakitina tole kalak si IlukaiNdu.
28Berekenlah man bana ukumen si terberaten, ula ia ibenarken.
29Sasaplah gelarna i bas kitap kegeluhen nari, ula suratken gelarna i tengah kalak si benar.
30Aku enda itindih dingen ndehereng, emaka angkat min aku, o Dibata, jenari kelini min aku.
31Kupuji TUHAN i bas ende-enden. Kuberitaken KemulianNdu alu ngataken bujur.
32Ngenan ate TUHAN ende-enden pujin asangken persembahen lembu, lembu jarah-jarah si mbur.
33Ngidah si e, meriah iakap kalak si itindas, nggedang ate kalak si nembah man Dibata.
34Sabap iperdiateken Dibata kap kalak musil, la IlupakenNa kalak si i bas penjara.
35Pujilah Dibata, o langit ras doni, o lawit, ras kerina si nggeluh i je.
36Ia pagi ngkelini Jerusalem, IpantekiNa mulihi kota-kota Juda. I je me ringan bangsa TUHAN, negeri e jadi sikerajangenna, <69:37> - jenari iwariskenna man anak kempuna, kalak si erkeleng ate man TUHAN i je me ringan.