Dual PanelKITAP SI PETELUKEN MASMUR 73-89 Kinibujuren TUHAN
1I bas Asap nari. Mehuli kal Dibata man kalak si tutus, man kalak si bersih ukurna.
2Tapi menam aku jongkang, menam aku celus,
3Perbahan mengga ateku kempak kalak megombang, tupung kuidah kesangapen kalak jahat.
4La ia pernah sakit, badanna megegeh dingen sehat.
5La inanamina susah, la ia gulut bagi kalak si deban.
6Eme sabapna maka ia megombang, dingen usur erbahan jahat.
7Pusuhna dem alu kejahaten, perukurenna lalap sampur alu si jahat.
8Itawa-tawaina kalak dingen jahat cakapna, alu megombang idehkenna atena kalak si deban.
9Megombang cakapna kerna Dibata si ni Surga, itokohina kalak i doni enda;
10seh maka bangsa Dibata pe ngikutken ia, jenari tek man ranan kalak enda.
11Nina, "Labo ieteh Dibata, labo ieteh si Meganjang e."
12Bage me adi kalak jahat, lalap ia reh bayakna, ipesenang-senangna dirina rusur.
13Percuma kujaga diringku bersih, la erguna kusirangken dosa.
14Tep-tep erpagi-pagi nge aku iukum tep-tep karaben aku isiksa.
15Adi bage min ndai perukurenku nggo kupersilahang si biak BangsaNdu.
16Kuusahaken gelah aku ngerti, tapi meserasa kal ngantusisa.
17Dungna kenca aku bengket ku Rumah Dibata, i je maka kueteh kedungen kalak jahat.
18ItamakenNdu ia i bas dalin medalit, IbahanNdu guling, bene me ia.
19Perper me ia sekali engkumirep saja, keri radas kena mara.
20Desken nipi si bene erpagi-pagi, o Tuhan bage me perlesap kalak jahat tupung Kam keke.
21Tupung ceda ateku, ngenanami pagitna nggeluh enda,
22bodoh aku, la kuerti, bagi asuh-asuhen aku i AdepenNdu.
23Tapi lalap nge Kam kudeheri, IcikepNdu tanku si kemuhen.
24Salu pedah-PedahNdu IpinpinNdu aku, IberekenNdu AteNdu kemulian man bangku.
25Adi la Kam, ise kin sikerajangenku i Surga? La lit kai pe ateku ngena i doni seakatan Kam.
26Aminna pe tuk ukur ras dagingku, Kam kap gegehku, o Dibata. Kam kap lalap si kuperluken.
27Cilaka me kalak si nadingken Kam, IlesapkenNdu me kalak si la setia man BanNdu.
28Tapi adi aku, senang kal kuakap, adi rembak ras Dibata. TUHAN Dibata kubahan man inganku cicio, gelah banci kuberitaken kerina PerbahanenNa.