Dual Panel1Kutetapken i bas ukurku maka nggeluhlah aku alu meriah-meriah gelah kueteh kai kin si tuhuna keriahen. Tapi teridah maka e pe sia-sia kepeken.
2Tangkas man bangku maka tawa, eme bodoh, janah kesenangen pe labo lit gunana.
3Erkiteken penjemba sura-surangku gelah ndatken kepentaren, kutetapken maka aku ersenang-senang alu minem anggur dingen pesta-pesta si meriah. Enda me kuakap si payo man manusia i bas enggeluhken geluhna si kentisik e i bas doni enda.
4Perbahanen-perbahanen si mbelin nggo kulakoken. Kupajekken melala rumah man gunangku. Kubahan taman-taman dingen peken-peken si kusuani alu batang anggur dingen kerina erbage batang kayu si man pangan buahna.
5(Pkh 2:4)
6Kubahan kolam guna mereken lau maler ku bas peken-peken dingen kebun-kebun e.
7Nterem suruh-suruhenku, subuk ia si kutukur bage pe si tubuh i bas rumahku. Rarasen asuh-asuhenku ndauh buen asang rarasen biri-biri ise pe si pernah ringan i Jerusalem.
8Kupepulung pirak ras emas si kualoken i bas raja-raja jajahenku nari. Perende-ende si dilaki ras diberu erbahan meriah ukurku alu ende-enden si iendekenna. Teremna gundikku asa kai ateku banci.
9Tuhu, ndauh kal aku belinen asangken ise pe si pernah ringan i Jerusalem. Janah kepentarenku la pernah njuruken.
10Kai ateku dat. La pernah kualang-alangi bangku ngenanami kesenangen si kugapa pe. Megah kuakap ngidah kerina bekasku latih sabap e kap upahku.
11Tapi kenca kuukuri mulihi kai si nggo kulakoken, dingen kelatihenku ndahiken si e kerina, kueteh maka kerina e la lit ertina. Kerina si kubahan e la kap lit kai pe gunana.
12Sabap i babo si e kerina, si ngasup sekalak raja ngelakokenca la lebih asangken kai si nggo ilakoken raja si arah lebena. Eme bena-benana aku rukur kai kin ndia ertina adi sekalak pentar, motu ntah bodoh.
13Kueteh maka ulin pentar asangken motu, bali ras terang ulin asangken gelap.
14Kalak pentar iangkana dalan si idalanina; tapi kalak motu dadap-dadap ia. Tapi kueteh ka nge maka kedungenna seri nge kerajangenta kerina.
15Rukur aku, "Kai si nandangi jadi man kalak bodoh, kunanami ka nge. Dage kai nge gunana kepentarenku?" Emaka kutetapken i bas ukurku maka kai pe la lit gunana.
16Kalak bodoh minter ilupaken bage ka pe kalak pentar. I bas wari-wari si nandangi reh, kerina kita ilupaken. Kerina kita la banci la mate subuk si bodoh bage pe si pentar.
17Emaka nembeh ateku nggeluh enda, erkiteken kerina si jadi i bas pertibi enda mereken kesusahen ngenca bangku, la lit si deban. Kerina sia-sia, desken nangkap angin ngenca.
18Kerina upah latihku bage pe ertangku la lit lakonna man bangku, sabap kerina e kutadingken nge man kalak si nggancihken aku,
19tapi ise metehsa pentar ntah bodoh ia? Amin bage pe man bana kange ulih latihku si kupepulung kidekah umur geluhku i bas pertibi enda alu kelatihen dingen kepentarenku. Janah e sia-sia nge kerina.
20Genduari leja aku erdahin alu kerina kepentaren, pemeteh ras kebeluhenku guna ndatken kai si kusuraken.
21Tapi kedungenna la banci la itadingken si e kerina man kalak si la pernah ncurcurken panas muatsa. Emaka sia-sia nge kerina, la payo pe.
22Asa umur geluh manusia lalap ia erbintuas dingen suhsah, i ja dage ulih latihna si banci imegahkenna?
23Kai saja pe si ilakokenna kidekah geluhna mereken kiniseran ras sui ate man bana. Tupung berngi pe gulut ukurna. Dage sia-sia nge kerina.
24La lit si terulin man manusia seakatan man, minem dingen ermeriah-meriah ngenanami ulih latihna. Kueteh maka pemere Dibata kap e.
25Lit kin kalak si ngasup man dingen ersenang-senang adi la ras Dibata?
26Dibata si mereken kepentaren, pemeteh ras kemalemen ate man kalak si ngena AteNa e. Tapi kalak perdosa IpelepasNa latih encari dingen pepulung ulihna encari guna ibereken man kalak si ngena AteNa? Emaka kerina nge sia-sia bali ras nangkap angin.