Alkitab Mobile SABDA
[VER] : [KARO]     [PL]  [PB] 
 <<  Roma 4 >> 

Kerna si Abraham

1Dage kuga ninta kerna nininta Abraham nai? Uga kin pengalamenna?

2Adi ia rembak ras Dibata erdandanken perbahanenna tentu lit dalanna muji bana. Tapi teridah maka i lebe-lebe Dibata labo lit dalanna ia muji bana.

3Sabap i bas Pustaka Si Badia lit tersurat, "Abraham tek man Dibata, janah kinitekenna e iperkiraken Dibata jadi dalan guna ngerembakken Abraham kempak DiriNa."

4Kalak si erdahin, upah si ialokenna e labo pemere e, tapi hakna kap e.

5Tapi kalak si ernalem kempak kinitekenna man Dibata, labo kempak perbahanenna, kinitekenna eme iperkiraken Dibata jadi dalan ngaloken ia rembak ras DiriNa. Enda ertina Dibata nggo erbahan keputusen maka kalak si ersalah e ikataken la salah.

6Kerna si enda me si ikataken Daud maka malem me ate kalak si ialoken Dibata rembak ras DiriNa la arah kai si ibahanna. Nina Daud.

7"Malem me ate kalak si nggo ialemi Dibata salahna si nggo itanemken Dibata dosa-dosana.

8Malem me ate kalak si la iperkiraken Dibata dosa-dosana."

9Kemalemen ate si ikataken Daud enda sikerajangen kalak si isunatken saja kin ngenca? Lang! Tapi kemalemen ate e jadi sikerajangen kalak si labo isunatken pe. Sabap bagi nggo ndai sikutip i bas Pustaka Si Badia nari, "Kinitekenna e iperkiraken Dibata jadi dalan ngerembakken Abraham kempak DiriNa."

10Ndiganai kin perkiran enda jadi? Ope denga Abraham isunatken ntah kenca ia isunatken? Labo kenca ia isunatken, tapi ope denga si e.

11Pudin nge ia isunatken. Sunat e ialokenna jadi tanda pengesahen maka ia nggo rembak ras Dibata erpalasken kinitekenna ope denga ia isunatken. Emaka Abraham jadi bapa nandangi kerina kalak si tek man Dibata, kalak si la isunatken, si ialoken Dibata rembak ras DiriNa.

12Ia pe bapa kerina kalak si isunatken, labo erdandanken sunat e, tapi erdandanken ia ngikuti dalan kiniteken si ibentasi Abraham bapanta, ope denga ia isunatken.

Padan Dibata ialoken arah kiniteken

13Dibata erpadan mereken doni enda man Abraham ras kesusurenna. Padan enda ibereken Dibata labo erdandanken Abraham ndalanken Undang-undang, tapi erkiteken Dibata nggo ngaloken Abraham rembak ras DiriNa erpalasken kiniteken.

14Sabap adi man kalak si ernalem man Undang-undang nge ibereken Dibata kai si IpadankenNa e, sia-sia me kiniteken manusia, janah padan Dibata kosong.

15Si reh i bas Undang-undang Musa e nari si tuhuna eme ukumen Dibata; tapi i ja la lit undang-undang i je me la lit kalak si ngelanggar undang-undang.

16Padan Dibata man Abraham, eme erpalasken kiniteken, janah kai si IpadankenNa e, tuhu-tuhu tangkas pemere Dibata, janah esah pe man kerina kesusuren Abraham. Labo saja man kalak si ndalanken Undang-undang, tapi pe man kalak si erkiniteken bagi Abraham. Sabap Abraham me bapanta kerina,

17bagi lit tersurat i bas Pustaka Si Badia, "Nggo Kutetapken kam jadi bapa nterem bangsa." Alu bage padan e nggo sah i lebe-lebe Dibata, Dibata si iteki Abraham, sabap Ia me si erbahanca kalak si nggo mate nggeluh mulihi dingen si njadiken si la lit jadi lit alu KataNa.

18Aminna gia la lit arapen, tapi Abraham tetap erkiniteken dingen erpengarapen maka ia jadi "bapa melala bangsa," bagi lit tersurat i bas Pustaka Si Badia, "Bagi buena bintang i langit bage me pagi buena kesusurenndu."

19Paksa si ndai umur Abraham nggo nandangi seratus tahun. Tapi kinitekenna labo kote aminna gia ietehna maka kulana nggo kerah janah ndeharana Sarah la banci mupus.

20La ia sangsi, janah kinitekenna nandangi padan si ibereken Dibata la surut; kinitekenna erbahanca ia reh gegehna, seh maka ia tetap muji Dibata.

21Tek ia maka ngasup nge Dibata nehken kai si nggo IpadankenNa.

22Janah erdandanken ia tek e, "kinitekenna e iperkiraken Dibata jadi dalan guna ngerambakken Abraham kempak DiriNa."

23Kata-kata "iperkiraken" e itulis labo man Abraham saja.

24Tapi pe man banta. Kita pe iperembakken me ras Dibata adi kita tek man Dibata si nggo mpekeke Jesus, Tuhanta, i bas si mate nari.

25IendeskenNa Jesus ku bas kematen erdandanken kesalahen-kesalahenta, jenari IpegeluhNa mulihi gelah kita iperembak ras Ia.


  Share Facebook  |  Share Twitter

 <<  Roma 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel