Alkitab Mobile SABDA
[VER] : [KARO]     [PL]  [PB] 
 <<  Roma 9 >> 

Bangsa pilihen Dibata

1Erkiteken persadanku ras Kristus kai si ateku kukataken enda tuhu kap, labo bual. Pusuh peratenku pe i bas persadan ras Kesah Si Badia ikut ngatakenca bage.

2Tuhu maka ceda kal ateku dingen megogo ateku la erngadi-ngadi.

3Erkite-kiteken seninangku si sada bangsa ras aku. Adi banci lah labo kuakap dalih aku gia isumpahi Dibata dingen sirang ras Kristus adi alu bage banci kusampati bangsangku e.

4Sabap kalak Israel eme kap bangsa pilihen Dibata, si nggo iangkat Dibata jadi anak-AnakNa dingen IpetangkasNa KemulianNa man bana. Ibahan Dibata iketen padan man bana, janah ibereken Dibata Undang-undang man bana. I bas ia lit aturen uga arusna ersembah man Dibata, janah nggo ialokenna padan-padan i bas Dibata nari.

5Kalak enda me kesusuren nini-nini si terberita nai-nai nari, janah Raja Penampat si ipadanken Dibata e, si reh selaku manusia, rehna i bas bangsa e nari. Dibata si erkuasa i bas kerinana terpujilah seh rasa lalap! Amin.

6Labo maka tempa-tempa kai si nggo ikataken Dibata kerna Israel e la seh; sabap labo kerina kesusuren Jahudi subuk Israel si tuhu-tuhu.

7Bage pe labo kerina kesusuren Abraham anak-anakna si tuhu-tuhu. Nina Dibata man Abraham, "Kesusuren Isak nge ngenca pagi ikataken kesusurenndu."

8Si enda ertina maka anak si tubuh secara biasa labo anak-anak Dibata, tapi anak-anak si tubuh erdandanken padan Dibata nge ngenca ikira anak-anak si esah.

9Sabap padan Dibata man Abraham eme kap, "I bas paksa si nggo itentuken pagi, reh Aku mulihken, janah ipupus Sarah me pagi sekalak anak dilaki."

10Janah labo e saja, tapi Rebeka pe lit nge dua anakna, bapana sada, eme nininta Isak.

11Ope denga tubuh anak si dua e, bage pe ope denga ia erbahan si mehuli ntah si jahat nina Dibata man Rebeka, "Anakndu sintua pagi jadi si erdahin anakndu si nguda." Si enda ikataken Dibata gelah tangkas ise si pilih Dibata, e erpalasken sura-sura Dibata saja nge. Erdandanken si e tangkas maka pilihen Dibata labo erpalasken perbahanen, tapi erpalasken pilihen Dibata.

12(Rom 9:11)

13Bagi si tersurat i bas Pustaka Si Badia, "Keleng ateku kesusuren Jakup, tapi elem-elem aku man kesusuren Esau."

14Dage kuga ninta? Sikataken kin Dibata e la bujur? Tentu lang!

15Sabap man Musa nai nggo ikataken Dibata, "Man ise ateKu Kucidahken perkuah ateKu man bana me Kusehken, man ise ateKu erkeleng ate ia me Kukelengi."

16Dage kerna pilihen Dibata labo erpalasken sura-sura tah pendahin manusia, tapi erpalasken perkuah ate Dibata ngenca.

17Sabap bagi lit tersurat i bas Pustaka Si Badia, nina Dibata man raja Mesir, "Kam kuangkat jadi raja gelah arah kam teridah kuasangKu si mbelin, janah gelah arah kam gelarKu terberita i belang-belang doni."

18Dage man ise ate Dibata IcidahkenNa perkuah AteNa, man bana me IcidahkenNa perkuah AteNa e, janah ukur ise ate Dibata IpemersikNa, ipemersik Dibata kap.

Ukumen dingen pernembeh ate Dibata

19Banci jadi nungkun kam man bangku, "Adi bage ngkai ka maka isalahken Dibata manusia? Ise kin ngasup ngelawan sura-sura Dibata?"

20Tapi ise kin iakapndu kam, o manusia, maka pang kam ersoal jabap ras Dibata? Banci kin ngerana kudin taneh man si nepasa, "Ngkai maka bagenda aku ibahanndu?"

21Ma kin sekalak pande kudin ate-atena nge erbahan kudin i bas segumpal taneh dah nari sada jadi kudin guna pemaken si meherga, janah sada nari guna pemaken si biasa?

22Uga adi ituduhken Dibata AteNa RawaNa ras GegehNa nandangi TinepaNa e? Uga adi radu ras si e icidahken Dibata AteNa KesabarenNa arah kalak si nembeh AteNa e, eme kalak si patut ikernepken?

23Uga adi IbahanNa bage guna encidahken sinalsal KemulianNa si mehaga nandangi kalak si ngaloken perkuah AteNa, eme kalak si nggo IsikapkenNa nai-nai nari guna ngaloken kemulian si bage?

24Kita me si nggo IpilihNa, labo saja i tengah-tengah kalak Jahudi nari, tapi pe i tengah-tengah kalak si deban si labo kalak Jahudi nari.

25Bagi lit tersurat i bas kitap Nabi Hosea, nina Dibata, "Bangsa si gelgel nari lanai bangsangKu, Kukataken, 'BangsangKu.' Si gelgel nari la Kukelengi, genduari Kukataken, 'Keleng ateKu.'"

26I bas ingan i ja ikataken man kalak, 'Kam labo bangsangKu,' i je kal pe igelari me kalak anak-anak Dibata si nggeluh.

27Tapi nina nabi Jesaya kerna bangsa Israel, "Aminna gia bagi kersik i tepi lawit teremna bangsa Israel, piga-piga kalak si tading nge ngenca pagi terkelin.

28Sabap keputusen ukumen Tuhan si pedas IsehkenNa nandangi doni enda lanai tersimbak."

29Ope denga si enda, nggo pe ikataken Nabi Jesaya, "Bicara la min ndai lit piga-piga kalak kesusurennta itadingken Tuhan si mada kuasa, nggo min ndai kita kernep bagi Sodom ras Gomora."

Kerna kalak Israel ras Berita Si Mehuli

30Kuga dage kedungenna? Kalak si deban si labo kalak Jahudi la ndarami gelah rembak ras Dibata, teridah maka ndatken kerembaken ras Dibata, erpalasken kinitekenna.

31Tapi kalak Israel si ndarami gelah ia rembak ras Dibata arah Undang-undang, la ndatca.

32Ngkai maka lang? Sabap idaramina kerembaken e ras Dibata labo erpalasken kiniteken man Dibata, tapi erpalasken perbahanenna. Nggo terantuk nahena ku "batu antuken".

33Bagi lit tersurat i bas Pustaka Si Badia, "Nehenlah, Kutamaken sada batu i Sion si erbahanca kalak tertuktuk, sada batu si erbahanca kalak guling. Tapi kalak si tek man BaNa la kecewa."


  Share Facebook  |  Share Twitter

 <<  Roma 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel