Dual PanelKerna pembunuhen tapi la ieteh si munuhsa
1"Nggit maun ijumpai sekalak mate ibunuh i bas mbalmbal negeri si ibereken TUHAN Dibatandu man bandu, tapi la ieteh ise si munuhsa.
2Idahi peminpin ras hakim-hakimndu lah ku ingan e, gelah isibarina asa kai dauhna i bas ingan e nari ku tep-tep kota si pedeher i je.
3Peminpin-peminpin kota si ndeherna ku ingan mait e, arus milih sada lembu nguda si la pernah ipake erdahin.
4Lembu e arus iteguna ku sada ingan si lenga pernah itenggalai ras lenga pernah isuani, deherken lau anak si la pernah kerah launa; i bas ingan eme kerahung lembu e igeleh peminpin-peminpin e.
5Imam-imam suku bangsa Lewi pe arus ikut ku je, sabap arus maka ia mutusken perkara-perkara pembunuhen. TUHAN Dibatandu si nggo milih kalak enda guna ndahiken DahinNa ras mereken pasu-pasu i bas GelarNa.
6Kenca e kerina peminpin-peminpin si rehna i bas kota si ndeherna ku ingan mait e ijumpai arus murihi tanna i babo lembu e,
7janahna ngerana nina, 'Labo kami si munuhsa, janah la iteh kami ise si munuhsa.
8O, TUHAN alemilah min dosa BangsaNdu Israel, si IpulahiNdu i Mesir nari. Alemilah kami, ula salahken kami kerna pembunuhen kalak si la ersalah.'
9Alu bage, adi ilakokenndu kai si isuruh TUHAN, kam lanai isalahi kerna pembunuhen e."
Kerna diberu si itaban i bas perang
10"Sanga ibereken TUHAN Dibatandu man bandu kemenangen i bas peperangen e, janah itabanndu musuh-musuhndu,
11nggit maka idahndu i bas tabanenndu e sekalak diberu mejile si ngena atendu, dingen iempoindu atendu.
12Baba ia ku rumahndu, suruh ia ncukur bukna ras ngkeret silu-siluna,
13bage pe ngganti uisna. Arus maka ia tading i rumahndu, nangisi orang tuana sada bulan dekahna; kenca bage maka ia banci iempoindu.
14Denggo adi lanai atendu bage ngenen ia, pelepas ia lawes alu bebas. La banci ibahanndu man bana desken man sekalak budak, la banci idayakenndu, sabap nggo ipaksandu ia ersada kula ras kam."
Hak anak sintua
15"Nggit maun lit sekalak dilaki dua ndeharana, duana ka mupus anak dilaki, tapi anak sintua la tubuh i bas ndeharana si ngenana kal atena e.
16Adi ibagikenna atena erta-ertana man anak-anakna, la banci ia rayo-ayo alu mereken hak anak sintua man anak si ipupus ndehara si ngena atena e.
17Arus maka iberekenna dua kali lipat man anak sintua, aminna pe ia la anak i bas diberu si ngena kal atena e. Sekalak bapa arus ngakui anakna sintua, ras arus mereken bagin man bana si kin hakna."
Ukumen man anak si la megiken kata
18"Adi lit sekalak bapa lit anakna dilaki gutul, ngelawan, si la nggit ngikutken kata orang tuana, aminna pe nggo iukum orang tuana,
19arus maka itaruhken orang tuana ia ku adep-adepen peminpin kota i bas inganna tading gelah anak e iadili.
20Arus maka ikataken orang tuana bagenda, 'Anak kami gutul, ngelawan, la ngikutken kata; dahinna mbuang-mbuang duit janah ia pemabuk-mabuk.'
21Emaka kerina jelma dilaki i bas kota e menteri ia alu batu ngayak mate. Alu bage me kam mbersihken kejahaten si bage rupana. Tiap kalak Israel si megi kejadin e tentu mbiar ia."
Undang-undang si deban
22"Adi sekalak jelma iukum mate kerna kejahatenna, janah igantung i das sada tiang,
23ula pelepas mait e i je erberngi: mait e arus ikuburken i bas wari e ka sabap kalak mate si gantung i das sada tiang erbanca negeri e kena sumpah Dibata. Kuburkenlah mait e, gelah ula icemarkenndu negeri si ibereken TUHAN Dibatandu man bandu."