Alkitab Mobile SABDA
[VER] : [KARO]     [PL]  [PB] 
 <<  Wahyu 14 >> 

Ende-enden kalak si nggo iselamatken

1Jenari kuidah tedis Anak Biri-biri e i Deleng Sion, janah ras Ia lit jelma teremna 144.000 kalak i bas perdempakenna nggo isuratken gelar Anak Biri-biri e ras gelar BapaNa.

2Jenari kubegi sora i langit nari bagi sora sampuren si mbelin ntah pe bagi sora lenggur si megang. Sora si kubegi e bagi sora kalak erkulcapi.

3Si 144.000 kalak e tedis ngalaken kursi kinirajan, bage pe ngalaken mahluk si empat ras pertua-pertua e. Kerina ia ngendeken ende-enden si mbaru. Ende-enden e, kalak si nggo itukur i bas doni enda nari ngenca ngasup mpelajarisa.

4Kalak enda kerina bersih sabap la icemarkenna bana alu diberu. Tetap ia suci bagi singuda-nguda. Iikutkenna Anak Biri-biri e ku ja gia Ia lawes. Ia nggo itukur i bas manusia si deban nari, janah ia me si pemena ipersembahken man Dibata ras man Anak Biri-biri e.

5La ia pernah ketunduken erbual. La lit si man pandangen i bas ia.

Malekat si telu

6Jenari kuidah sada malekat si deban kabang meganjang i awang-awang. Ibabana Berita Si Mehuli si la ermasap-masap guna iberitaken man manusia i doni enda, man kerina bangsa, suku, cakap ras negara.

7Alu sora megang nina malekat e, "Erkemalangenlah man Dibata janah pujilah Ia. Sabap nggo seh paksana Dibata ngadili manusia. Sembahlah Ia si njadiken langit, doni, lawit ras kerina ulu lau!"

8Reh malekat si peduaken ngikutken malekat si pemena, alu sora megang nina, "Nggo tombang! Nggo tombang Negeri Babilon si mbelin e! Nggo iberekenna anggurna man kerina bangsa, janah nggo iberena minem kerina bangsa alu anggur si erbahanca merhat erlua-lua!"

9Reh ka malekat si peteluken ngikutken malekat si dua ndai janah alu sora megang nina, "Kalak si ersembah man rubia-rubia ras patungna e, dingen si lit cap i bas perdempakenna ntah i bas tanna,

10inemna me anggur Dibata e, eme anggur pernembeh Dibata si ikuseken la lit campurna ku bas calung pernembeh Dibata. Kerina kalak si bagenda, isiksa me i bas api ras i bas kertah i lebe-lebe malekat si Badia ras Anak Biri-biri e.

11Cimber api si niksa kalak e erdipul seh rasa lalap. Kalak si nembah rubia-rubia ras patungna e, bage pe kalak si lit i bas ia cap gelar rubia-rubia e, la erngadi-ngadi, suari ras berngi ngenanami kiniseran."

12Erdandanken si emaka anak-anak Dibata si ngikutken pedah-pedah Dibata dingen setia man Jesus arus megenggeng.

13Jenari kubegi sora i Surga nari nina, "Suratkenlah enda, 'Malem me ate kalak si mate, si mate i bas kiniteken man Tuhan, mulai genduari nari!' Ngaloi Kesah Dibata, 'Payo bageme jadina!' Pekesahken me ia i bas latihna nari, sabap perbahanen-perbahanenna ngarak-ngarak ia."

Peranin i doni

14Jenari kunehen, kuidah embun mbentar, janah lit tempa-tempa bagi manusia kundul i babo embun e. I bas takal si kundul e lit mahkota emas janah i bas tanna lit sada sabi-sabi si ntelap.

15Jenari ndarat sekalak malekat si deban i bas Rumah Pertoton nari. Alu sora si megang nina man si kundul i babo embun e, "Sabikenlah sabi-sabindu janah ranilah genduari sabap nggo seh paksa peranin, doni nggo seh paksana iperani!"

16Jenari iawatken si kundul i babo embun e sabi-sabina ku doni, janah merani me doni enda.

17Jenari kuidah ka sekalak nari malekat ndarat i bas Rumah Pertoton Dibata nari i Surga. Ia pe lit sabi-sabina ntelap.

18Kenca bage ndarat ka i bas batar-batar persembahen nari sekalak malekat si erkuasa nandangi api. Alu sora megang erlebuh ia man malekat si ncikep sabi-sabi si ntelap e nina, "Sabiken sabi-sabindu, janah perani anggur si lit i kebun anggur i doni, sabap nggo tasak buahna!"

19Emaka iawatken malekat ndai sabi-sabina ku doni, isabina buah anggur i bas batangna nari, jenari iambekkenna ku bas ingan mereh anggur pernembeh Dibata si mbelin.

20Buah anggur e ipereh i ingan mereh anggur i darat kuta. I bas ingan e nari maler dareh bagi lau mbelin, seh telu ratus kilometer dauhna janah bagesna menam dua meter.


  Share Facebook  |  Share Twitter

 <<  Wahyu 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel