Dual PanelKerna si seribu tahun
1Kenca bage kuidah sekalak malekat nusur i Surga nari. I bas tanna lit kunci embang si la ersibar bagesna e ras rante galang.
2Itangkapna naga, nipe si nuria e, e me Iblis ntah pe Setan, jenari igarikenna seh seribu tahun dekahna.
3Kenca bage iambekkenna naga e ku bas embang e jenari ikuncina kelbung e janah itamana meteraina gelah ulanai itipu Iblis e bangsa-bangsa seh lepas si seribu tahun e. Kenca lepas si seribu tahun e arus ia ipulahi kentisik.
4Jenari kuidah melala kursi kinirajan ras si ngkundulisa, si nggo ibereken man bana kuasa guna ngadili. Bage pe kuidah tendi-tendi kalak si nggo mate itampul erdandanken meritaken Kata Dibata ras ersaksi kerna Jesus. Kalak si nggo mate enda ndai, la pernah nai isembahna rubia-rubia e ntah pe patungna. Bage pe labo lit cap rubia-rubia e i bas perdempakenna ntah i bas tanna. Kalak enda ndai nggeluh mulihi janah erkuasa ras Kristus seribu tahun dekahna.
5(Kalak mate si deban la nggeluh mulihi seh lepas paksa si seribu tahun e.) Enda me kekeken si pemena.
6Malem me ate kalak si ikut i bas kekeken si pemena e sabap ia nggo iserapken jadi anak-anak Dibata. Kematen si peduaken lanai erkuasa nandangi ia. Ia me pagi jadi imam-imam Dibata ras Kristus. Ras Kristus kalak enda erkuasa i bas si seribu tahun e.
Talu Iblis
7Lepas si seribu tahun e, ipulahi me Iblis i bas penjara nari,
8jenari ndarat ia nipu bangsa-bangsa i belang-belang doni, e me Gog ras Magog. Ipepulung Iblis e me bangsa-bangsa e ku peperangen, bagi kersik i tepi lawit teremna.
9Merap me ia kerina ku doni enda; ikepungna benteng anak-anak Dibata ras kuta si IkelengiNa. Tapi nusur api i Surga nari ngkernepken bangsa-bangsa e.
10Jenari Iblis si nggo nipu bangsa-bangsa e, iambekken ku lawit api si singgur ras kertah, ingan ngambengken rubia-rubia ras nabi perguak e. Isiksa me kalak enda rasa lalap suari ras berngi.
Ukumen si perpudina
11Jenari kuidah sada kursi kinirajan ras si ngkundulisa. Kursi kinirajan e mbelin dingen mbentar rupana. Langit ras doni kiam i bas ia nari seh lanai teridah.
12Jenari kuidah kalak si nggo mate, subuk si mbelin bage pe si kitik, tedis i lebe-lebe kursi kinirajan e. Kitap-kitap italangi. Jenari italangi ka sada Kitap nari, e me Kitap Kegeluhen. Kenca bage kalak si nggo mate iadili rikutken kai si nggo ibahanna, bagi lit isuratken i bas Kitap-kitap e.
13Emaka lawit ngendesken kalak mate si lit i bas ia. Kematen ras doni kematen pe ngendesken kalak mate si lit i bas ia, janah iadili me kerina rikutken perbahanenna sekalak-sekalak.
14Kenca bage kematen ras doni kematen iambekken ku bas lawit api. (Lawit api enda me kematen si peduaken.)
15Ise la lit gelarna tersurat i bas Kitap Kegeluhen e iambekken me ku bas lawit api e.