Dual PanelEnde-enden ate ceda
1Isuruh Dibata aku ngendeken ende-enden ate ceda enda man dua kalak anak raja Israel:
2Tuhu nandendu desken sada singa beru-beru si mbisa, iasuhina anakna i tengah-tengah singa si merawa.
3Ipiarana sada anakna, iajarina ngerigep rubia-rubia; kenca bage, jelma pe ijerngemna.
4Bangsa-bangsa megi beritana, jenari alu sada lubang iperangkapna ia. Emaka ikilingna igungna ku negeri Mesir ia ibabana.
5Indung singa tertima-tima, seh maka dungna bene pengarapenna. Kenca bage iajarina ka anakna si debanna, seh maka anakna e jadi sada singa si merawa.
6Kenca nggo dem belinna, iikut-ikutna singa-singa si deban. Ia pe erlajar ngerigep rubia-rubia man panganna, jenari jelma pe ijerngemna.
7Benteng-benteng irontaskenna, kuta-kuta iradaskenna. Tep-tep kali terbegi sorana erdengum, gentar kalak kerina ibahanna.
8Emaka pulung kalak kerina, i japa nari pe reh kalak ngelawanca. Ipebelangna bantona, itangkapna i bas perangkapna.
9Itamakenna ia ku bas kurungen singa, jenari ibabana ku Babilon ngadap raja. I je ijagai kalak ndai ia, maka sorana pe lanai terbegi i deleng-deleng Israel.
10Nandendu desken sada batang anggur, si isuanken i tepi lau maler. Erkiteken la kurang-kurang launa, merabun bulungna, meramis buahna.
11Dahan-dahanna paguh, payo man tungkat kinirajan. Batangna meganjang seh ku embun, kerina ngidahsa bulungna si merabun.
12Alu nembeh, ia iruah, jenari isampetken ku taneh. Angin timur rembus mahan buahna jadi kerah, dahan-dahanna mesuak, kerah jenari isuluh.
13Genduari ia isuanken i gurun pasir, i bas taneh kerah si la erlau.
14I bas ranggas-ranggasna gurlah api njulang, buah ras dahan-dahanna keri meseng. Emaka lanai lit tading dahan si megegeh, lanai lit terpake man ciken kinirajan. Enda me ende-enden ate ceda, si rusur iende-endeken.