Dual PanelRaja Mesir iumpamaken bagi buaya
1I bas wari si pemena, bulan sepuludua, tahun si pesepuluh duaken sanga kami i bas pembuangen, seh kata TUHAN man bangku nina:
2"O manusia si ermasap-masap, persingetilah raja Mesir. Peseh man bana katangKu enda: Kam erlagak bagi singa i tengah-tengah bangsa-bangsa, tapi situhuna buaya nge kam, si erlangi i bas lau belin. Megembur ibahanndu lau alu nahendu, janah melket bandu lau belin e.
3Sanga pulung pagi bangsa-bangsa Kutangkap kam alu jalangKu, janah Kusuruh bangsa-bangsa e ngerintaksa ku duru.
4Kudampesken me kam ku taneh, jenari Kupepulung kerina perik-perik ras rubia-rubia doni enda mangani dagingndu.
5Jenari deleng ras baluren Kutambusi alu bangkendu si macik.
6Darehndu Kuamburken maka megara ibahanna kerina deleng-deleng, janah lau mbelin dem ibahanna.
7Tupung kam Kukernepken, langit Kutamburi dingen bintang-bintang Kupemagem. Matawari ketamburen ibahan embun, bulan pe la ersinalsal.
8Kunimpeti kasa si terang i das langit janah doni Kubahan jadi gelap tuhu-tuhu. Enda me katangKu, Aku TUHAN si Erdolat.
9Tupung Kupembar berita kerna kebenenndu i tengah-tengah bangsa-bangsa si la pernah ibegindu pe, mbue bangsa-bangsa keharun.
10PerbahanenKu man bandu mahanca sengget melala bangsa. Tupung Aku ngawatken pedangKu, raja-raja nggirgir perban biarna. I bas warina kam guling dingen ampar, kerina raja-raja nggirgir perban aru atena kerna kesahna."
11Nina TUHAN si Erdolat, "Pedang raja Babilon iawatken kempak kam.
12Kusuruh serdadu bangsa-bangsa si kejam ngawatken pedangna, jenari ibunuhna kerina rayatndu. Kerina rayatndu, bage pe si debanna si iagahkenndu, ikernepken me kerina.
13Kubunuh kerina asuh-asuhenndu deherken pelolonna, maka lanai lit manusia tah pe rubia-rubia si nggemburi lau e.
14Kupelepas lau e kenden maka meciho mulihi, bage pe lau belinndu maler alu teneng. Aku TUHAN si Erdolat nggo melasken katangKu.
15Kenca Kukernepken kasa si nggeluh i Mesir dingen negeri e Kubahan jadi terulang, ietehna me maka Aku kap TUHAN.
16Kata persinget enda, jadi ende-enden penguburen me pagi. Diberu i bas bangsa-bangsa ngendeken ende-enden e, lako nangisi Mesir ras kerina rayatna." Bagenda me nina TUHAN si Erdolat.
Doni kematen
17I bas wari sepulu lima, bulan si pemena, tahun si pesepuluduaken, sanga kami i bas pembuangen, kata TUHAN seh man bangku nina,
18"O manusia si ermasap-masap, ngandunglah kam erkiteken kalak Mesir si nterem e. Peberkat ia ku doni kalak mate radu ras bangsa-bangsa si deban si megegeh.
19Kataken man bana kerina; bagenda, 'Akapndu kin jilen kam asa kerina kalak si deban? Berkat me kam ku doni kalak mate, janah ampar i je ras kalak si la erdibata.'
20Ndabuh me kalak Mesir radu ras kalak si mate i bas perang. Nggo sikap sada pedang lako munuhisa kerina.
21Puanglima-puanglima si mbisa bage pe kalak si erperang nampati Mesir, kerina ngalo-ngalo kalak Mesir e i bas doni kematen. Ersurak ia nina, 'Kalak si la erdibata si mate i bas perang, nggo nusur ku jenda janah nggo ampar ijenda!'
22Assur pe nggo i je, rikut ras kuburen serdaduna i sekelewetna. Kerina ia mate i bas pertempuren.
23Kuburenna i bas ingan si mbagesna kal i doni kematen. Kerina serdaduna mate i bas perang, janah kuburenna lit i sekelewetna. Tupung nggeluh denga nai, mbiar kerina doni ibahanna.
24Elam pe i je, rikut ras kuburen serdaduna i sekelewetna. Kerina ia mate i bas pertempuren, janah alu la isunat, nusur ia ku doni kematen. Asum ia nggeluh denga, mbiar kalak kerina ibahanna, tapi genduari nggo ampar ia, la lit ergana.
25Elam ampar ras kalak si mate i bas pertempuren, janah kuburen serdaduna lit i sekelewetna. Kerina ia la isunatken, kerina mate i bas perang. Sanga nggeluh mbiar kalak kerina ibahanna, tapi genduari nggo ampar la lit ergana, janah ngenanami nasip si seri ras kerina kalak si mate i bas perang.
26Mesek ras Tubal pe i je, rikut ras kuburen serdaduna i sekelewetna. Kerina ia la isunatken, kerina mate i bas pertempuren. Tapi nai asum nggeluh denga, mbiar kalak kerina ibahanna.
27Kalak enda la mehaga penguburenna bagi puanglima-puanglima si adi, si berkat ku doni kematen maba kerina senjatana; pedang itamaken i teruh takalna, janah ampang-ampangna i babo badanna. Tupung nggeluh denga, puanglima-puanglima enda erkuasa tuhu-tuhu seh maka mbiar kalak kerina ibahanna.
28Bage me Mesir ikuburken ras iamparken i tengah-tengah kalak si la isunatken, si mate i bas perang.
29Edom pe i je ras raja-raja bage pe peminpin-peminpin. Sanga nggeluh denga, kalak enda serdadu si mbisa, tapi genduari nggo ampar i babo doni kematen ras kalak si la isunatken, si mate i bas pertempuren.
30Kerina raja-raja i Utara nari, bage pe kalak Sidon lit i je. Nai kuasana mahan kalak mbiar, tapi genduari lanai erguna janah nusur ku doni kalak mate alu la isunat, ras kalak si mate i bas pertempuren. I je bali nasipna ras kerina kalak si nusur ku doni kematen.
31Ngidah kerina kalak si mate i bas pertempuren e terapul ukur raja Mesir ras serdaduna," bage nina TUHAN si Erdolat.
32"Mbarenda Kubahan ipebiar-biar raja Mesir kalak si nggeluh i doni, tapi ibunuh me ia ras serdaduna, jenari ikuburken i bas pengadi-ngadinna ras kerina kalak si la ersunat, si mate i bas pertempuren," Bagenda me nina TUHAN si Erdolat.