Dual PanelGog talu
1Nina TUHAN si Erdolat, "O manusia si ermasap-masap, sumpahilah Gog, raja mbelin nu negeri-negeri Mesek ras Tubal. Kataken man bana maka Aku kap imbangna.
2Kukusurken dalanna kempak dalan si mbaru, jenari Kutegu ia ndarat i utara si ndauh e nari, ngadi-ngadi seh ia i deleng-deleng Israel.
3Kenca bage Kutepisken panahna seh pulah i bas tanna si kawes nari, janah anak panahna naktak i bas tanna si kemuhen nari.
4Gog ras tenterana rikut ras teman-temanna mate i deleng-deleng Israel, janah Kupelepas maitna jadi nakan kerina perik-perik ras rubia-rubia kerangen.
5Tentera-tentera e mate i tengah mbalmbal. Aku, TUHAN si Erdolat, nggo melasken katangKu.
6Kupegara api i negeri Magog ras i gedang-gedang tepi lawit i ja kalak ringan alu teneng, janah kerina meteh maka Aku kap TUHAN.
7Janah i tengah-tengah kalak Israel Kupebetehken me gelarKu si Badia, dingen asa ndigan pe lanai Kubere gelarKu igombangi kalak. Kenca bage ieteh bangsa-bangsa me maka Aku, TUHAN, Aku kap Dibata si Badia, nu Israel."
8Nina TUHAN si Badia, "Wari si tersinget ndai la banci la reh.
9Penduduk si ringan i bas kuta-kuta Israel lawes me pagi ndarat lako pepulungi senjata-senjata si itadingken kalak, gelah ibahan jadi ranting. Tupung ipegarana api, ampang-ampang panah, anak panah, lembing ras perpalu ibahanna jadi rantingna janah e tahan pitu tahun dekahna.
10Lanai perlu ia kiranting i juma-juma, tah pe nabah kayu i kerangen sabap senjata si tading ndai bias jadi rantingna. Irampas ras irampokna me kalak si ngerampas ras si ngerampok ia." Bagenda me nina TUHAN si Erdolat.
Penguburen Gog
11Nina TUHAN, "Kenca jadi si enda ndai kerina, Kubereken man Gog sada taneh kuburen i Israel, i bas Baluren Perlajang, julun Lawit Mate. Gog ras kerina tenterana, i je me pagi ikuburken, janah baluren e igelari pagi 'Baluren Tentera Gog.'
12Pitu bulan dekahna kalak Israel ngkuburken kerina maitna e, seh maka taneh e bersih ka mulihi.
13Kerina kalak i bas negeri e reh nampati engkuburkenca, janah i bas wari kemenangenKu, ipehaga me ia erkiteken si e. Aku, TUHAN si Erdolat nggo melasken katangKu.
14Kenca lepas si pitu bulan ndai, ipilih me piga kalak guna niari negeri e, gelah idarami ras ikuburkenna mait-mait si ampar denga i babo taneh, gelah taneh e banci bersih ibahanna.
15Tupung isiar-siarna negeri e, tep-tep kali ijumpaina tulan manusia, ibahanna tandana deherken tulan e gelah banci iidah tukang kali kuburen, jenari ikuburkenna i bas Baluren Tentera Gog.
16Alu bage taneh e jadi bersih mulihi. (Ipudi wari, lit sada kuta i bas baluren e, gelarna bali ras gelar tentera e.)"
17Nina TUHAN si Erdolat man bangku, "O manusia si ermasap-masap, dilolah perik-perik ras kerina rubia-rubia i ja nari pe, gelah reh ia mangani persembahen si Kusikapken man bana. Eme sada man-man si mbelin i deleng-deleng Israel, i ja perik-perik ras rubia-rubia e banci man daging ras nginem dareh.
18Kerina ia banci man mait serdadu-serdadu ras nginem dareh raja-raja doni enda, si igeleh desken anak kambing tah anak biri-biri, desken kambing tah jenggi lembu si mbur.
19Kenca Kubunuh bangsa e ndai desken persembahen, perik-perik ras rubia-rubia reh man tabeh-tabehna asa besurna, janah darehna iinemna seh mabuk.
20I bas mejangKu ipanna asa besurna eme kuda ras si ngersaksa, bage pe tentera ras serdadu-serdadu. Aku, TUHAN si Erdolat nggo melasken katangKu."
Israel ipemulih ku tanehna
21Nina TUHAN, "Kucidahken me kemulianKu man bangsa-bangsa. Iidah me uga Aku make kuasangKu i bas ndalanken keputusen-keputusenKu si bujur.
22Mulai i bas paksa e nari ieteh kalak Israel me maka Aku kap TUHAN, Dibatana.
23Janah kerina bangsa-bangsa si deban pe metehsa maka kalak Israel e ibuang, erkiteken dosa-dosa si ibahanna man bangKu. Kutundalken ia, janah Kupelepas ia italuken ras ibunuh musuh-musuhna i bas pertempuren,
24Kuukum ia sue ras perbahanenna erkiteken kemelketen ras kejahatenna. Erdandanken si eme maka ia Kutundalken."
25Nina TUHAN si Erdolat, "Tapi genduari nggo mekuah ateKu kempak kesusuren Jakup, bangsa Israel. Emaka Kubahan senang akapna mulihi.
26Kenca ringan ka ia mulihi alu teneng i bas tanehna jine, alu la lit ise pe si erbahanca ia mbiar, ngasup me ia ngelupaken uga ia nggo igombangi kalak erkiteken la ia patuh man bangKu.
27Gelah iidah bangsa-bangsa kebadianKu, Kubaba me bangsangKu mulih i bas negeri musuh-musuhna nari.
28Kenca bage ieteh bangsangKu me maka Aku kap TUHAN Dibatana. Si enda ietehna, sabap Aku kap si namaken ia ku pembuangen, dingen Aku ka pe si maba ia mulih ku tanehna jine, janah la lit sada pe Kubahan si tading-tading.
29KesahKu Kucurcurken man bangsangKu Israel, janah lanai ndigan pe ia Kutundalken. Aku, TUHAN si Erdolat nggo melasken katangKu."