Dual PanelMoap lanai ergegeh
1I kota Sela nari i gurun pasir, kalak Moap nenahken sada anak biri-biri jadi persembahen man si erkuasa i Jerusalem.
2Tertima-tima kalak Moap i tepi Lau Arnon; erdalan-dalan ia ku jah ku je desken perik-perik si igera i bas asarna nari.
3Nina man kalak Juda, "Katakenlah kai arus ibahan kami. Desken batang kayu si merabun, banci min kam ingan kami cilinggem sanga las pantek ciger. Kami enda kalak pengongsi, bunikenlah kami maka ula ise pe ndat kami.
4Berelah kami ringan i bas negerindu. Kawali kami i bas kalak si atena ngkernepken kami nari." (Kalak si nindih jelma si deban lanai pagi lit, dahin ngkernepken pe ngadi, janah kalak si ngeradasken negeri e masap me.
5Kenca bage, jadi raja me sekalak i bas kesusuren Daud nari, janah iperentahna me bangsa e alu ate tutus ras keleng ate. Kai si benar pedas idalankenna janah tetap iperdiatekenna maka kebujuren idalanken.)
6Nina kalak Juda, "Nggo ibegi kami uga ganjangna ukur kalak Moap. Ieteh kami maka ia mejenggi dingen megombang, tapi cakapna si meganjang e labo lit ertina."
7Tangis kalak Moap erkiteken kiniseran si ngkenai ia. Adi ingetna pangan si ntabeh si semal ipanna i kota Kir Hareset, tangis ia kerina, bene pe ukurna.
8Juma si ndeher Hesbon ras peken anggur Sibma nggo ceda. Nai lau anggurna rusur kal erbahanca mabuk penguasa-penguasa negeri. Nai pernah batang anggur e njoler seh ku kota Jaser, ku Timur seh ku gurun pasir, janah ku Barat seh ku lepar Lawit Mati.
9Genduari kutangisi batang anggur Sibma bali ras penangisiku kota Jaser. Iluhku mambur erkiteken Hesbon ras Eleale, sabap la lit peranin si erbahanca meriah ukur kalak.
10Lanai lit kalak si ersurak tah rende i bas kebun anggur e. Lanai lit kalak si ngerik buah anggur, sora ersurak si meriah nggo ngadi.
11Ndehereng aku, janah ceda ateku ngidah Moap ras Kir Heres.
12Nggo labuh kalak perban rusurna lawes ertoto ku deleng-deleng ingan sembah-sembahen bage pe ku rumah-rumah persembahenna, tapi si e kerina labo lit gunana man bana.
13Eme berita si nggo leben iberitaken TUHAN kerna Moap.
14Janah genduari nina TUHAN, "Pas telu tahun nari kebayaken Moap masap me. Pendudukna piga-piga kalak nari ngenca pagi tading, janah lanai ergegeh."