Alkitab Mobile SABDA
[VER] : [KARO]     [PL]  [PB] 
 <<  Yesaya 21 >> 

Pengenehenen kerna ndabuhna Babilon

1Enda me berita kerna negeri Babilon. Desken angin kalinsungsung si erpiu-piu arah tengah gurun pasir, bage me rehna kecedan arah negeri si mehantu nari.

2Nggo kuidah sada pengenehenen si mejin i ja penghianat ihianati janah kalak si ngkernepken ikernepken kalak si deban. O serdadu Elam, seranglah! O tentera Media kepunglah kota-kota e! Ipengadi TUHAN me kerina kiniseran si ibahan Babil.

3Kai si kuidah ras si kubegi arah pengenehenen e, mahanca aku mbiar janah mesui kuakap, bali suina ras si inanami diberu si nandangi mupus.

4Melimber kuakap janah dagingku nggirgir perban biarna. Kurang pedas kuakap wari gelap, tapi kenca gelap tambah kebiarenku.

5Iban pengenehenen e kuidah sada kerja man-man nggo sikap, amak nggo kimbang man ingan kundul temue. Man ras minem ia kerina. Tapi rempet terbegi sora perentah nina, "O perwira-perwira! Sikapken ampang-ampangndu!"

6Kenca bage nina TUHAN man bangku, "Suruhlah kalak erjaga-jaga i bas ingan penjagan, janah kataken man bana gelah ilaporkenna kai si idahna.

7Adi idahna kalak reh ngersak kuda erbaris dua, bage pe kalak si ngersak kalde ras unta, arus maka iperdiatekenna kal kalak e alu megermet."

8Kenca bage erlebuh kalak si erjaga e nina, "O TUHAN, aku nggo tedis erjaga i bas inganku suari ras berngi."

9Nehenlah, enda me ia reh; kalak si ngersak kuda erbaris dua. Kalak si erjaga ndai nehken berita nina, "Babil nggo ndabuh! Kerina gana-gana si isembahna nggo ampar janah perper i babo taneh."

10O bangsangKu Israel, kam nggo ierik desken gandum, tapi genduari kumomoken man bandu berita si mehuli si kubegi i bas TUHAN si Mada Kuasa nari, Dibata nu Israel.

Berita kerna Edom

11Enda me berita kerna Edom. Lit kalak erlebuh man bangku i Edom nari nina, "O kalak si erjaga, uga nari dekahna berngi enda? Kasa kai nari dekahna maka siang wari?"

12Erjabap aku Ningku "Nandangi siang me wari, tapi reh denga ka nge berngi. Adi nungkun denga atendu, rehlah kam sekali nari nungkunsa."

Berita kerna Arab

13Enda me berita kerna Arab. O kam kalak Dedan, si erkemah i negeri Arab si la erdukut.

14Berekenlah lau man kalak si muas si reh ndahi kam. O kam kalak si ringan i negeri Tema, berekenlah nakan man kalak si mengongsi ku negerindu.

15Sabap nterem kalak kiam gelah pulah i bas pedang si nampul ia atena, i bas panah si nggo irentangken man bana, ras i bas kerina kebiaren perang nari.

16Kenca bage nina TUHAN man bangku, "Pas sada tahun nari kehagan suku-suku Kedar masap me.

17Kalak si beluh manah eme suku Kedar si mbisa, tapi piga-piga nari ngenca pagi tading." Enda me kata i bas TUHAN, Dibata nu Israel.


  Share Facebook  |  Share Twitter

 <<  Yesaya 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel