Alkitab Mobile SABDA
[VER] : [KARO]     [PL]  [PB] 
 <<  Yohanes 20 >> 

Kuburen nggo lume (Mat 28:1-8; Mrk 16:1-8; Luk 24:1-12)

1Erpagi-pagi si lampas i bas wari Minggu e asum gelap denga, lawes Maria Magdalena ku kuburen. Kenca seh i kuburen idahna pintu kuburen e nggo talang.

2Emaka kiam ia mulihken: ijumpaina Simon Petrus ras sekalak ajar-ajar si deban, ajar-ajar si ikelengi Jesus. Nina Maria Magdalena, "Nggo ibuat kalak Tuhan i bas kubur nari janah la ieteh kami ku ja ibabana!"

3Emaka minter berkat Petrus ras temanna e ku kuburen.

4Kiam ia duana, tapi pedasen teman Petrus ndai seh ku kuburen.

5Itungkirna ku bas kuburen e janah idahna i je ampar gulungen kain putih e, tapi la ia bengket ku bas.

6Jenari reh Simon Petrus, terus ia bengket ku bas. Idah Simon Petrus kain putih e,

7janah idahna pe ampar uis si ibalutken ku takal Jesus. Uis e igulung serap i bas kain putih e nari.

8Jenari bengket pe teman Petrus si leben seh ndai. Kenca idahna tek ia.

9(Tapi amin bage gia, langa denga iangka kalak enda si tersurat i bas Pustaka Si Badia maka Jesus la banci lang keke i bas si mate nari.)

10Kenca bage mulihken ajar-ajar ku rumah.

Jesus encidahken DiriNa man Maria Magdalena (Mat 28:9-10; Mrk 16:9-11)

11Maria Magdalena tedis deherken kuburen e. Janahna tangis itungkirna ku bas.

12I bas kubur e idahna dua kalak malekat, uisna mbentar. Malekat e kundul i bas ingan bekas mait Jesus cibal, sekalak arah ingan TakalNa, sekalak nari arah ingan NaheNa.

13Jenari nungkun malekat-malekat e man Maria nina, "O bibi, ngkai maka kam tangis?" Erjabap Maria Magdalena, "Nggo ibuat kalak Tuhanku, janah la kueteh ku ja ibabana!"

14Kenca ikatakenna si enda, itulihkenna ku pudi, idahna Jesus tedis i je; tapi la ietehna maka Jesus kap si tedis e.

15Nina Jesus man bana, "O bibi, ngkai maka kam tangis? Ise kin daramenndu?" Maria Magdalena erpengakap maka temanna ngerana e si njagai peken, emaka nina, "O tuan, adi kam kin muat Tuhanku e, katakenlah i ja Ia ibahanndu gelah kulegi ku je."

16Nina Jesus, "O, Maria!" Ipernehen Maria Magdalena me Jesus, jenari ngaloi ia i bas cakap Heber, "Rabuni!" (Ertina, "Guru!")

17Nina Jesus man bana, "Ola cikep Aku, sabap Aku langa ndahi BapangKu. Laweslah, jumpai senina-seninangKu janah kataken man bana, maka ningKu: Aku lawes ndahi BapangKu dingen BapaNdu, ndahi DibataKu dingen Dibatandu."

18Emaka lawes Maria Magdalena njumpai ajar-ajar Jesus. Ikatakenna maka ia nggo jumpa ras Tuhan janah iturikenna pe kai si isuruh Tuhan ndai.

Jesus encidahken DiriNa man ajar-AjarNa (Mat 28:16-20; Mrk 16:14-18; Luk 24:36-49)

19Karaben i bas wari Minggu ndai, pulung ajar-ajar Jesus i bas sada ingan. Perbahan mbiar ia kalak Jahudi si erkuasa emaka ierukna pintun. Jenari bengket me Jesus, tedis Ia i lebe-lebe ajar-ajar e. Nina Jesus, "Mejuah-juah."

20Jenari icidahken Jesus TanNa ras AwakNa man ajar-ajar e, emaka meriah kal ukur ajar-ajar ngidah Tuhan.

21Nina ka Jesus man ajar-ajar, "Tetapkenlah ukurndu. Bagi Aku isuruh Bapa, bage me pe kam Kusuruh."

22Kenca bage isempulken Jesus KesahNa man ajar-ajar e, jenari nina, "Alokenlah Kesah Si Badia.

23Adi ialemindu dosa kalak, dosana nggo ialemi; adi ipelepasndu dosana i bas ia, dosana e nggo tetap i bas ia."

Jesus encidahken DiriNa man Tomas

24Sekalak i bas ajar-ajar si sepulu dua e gelarna si Tomas (igelari pe si Kembar). Sanga Jesus encidahken DiriNa man ajar-AjarNa, Tomas la ikut i je.

25Emaka erberita ajar-ajar e man Tomas nina, "Kami nggo jumpa ras Tuhan!" Ngaloi Tomas, "Adi la kin kuidah bekas paku i bas TanNa, janah adi la kin kutamaken jari-jaringku ku je bage pe adi la kin kutamaken tanku ku AwakNa, labo aku tek."

26Seminggu kenca ajar-ajar e pulung, pulung ka ia i bas inganna pulung e. Tomas pe ikut pulung. Pintu nggo ieruk, tapi bengket Jesus ku bas, tedis Ia i lebe-lebe ajar-ajar e, jenari nina, "Mejuah-juah!"

27Jenari nina Jesus man Tomas, "Tamakenlah jari-jarindu ku jenda, janah nehenlah tanKu. Dadaken tanndu, tamaken ku awakKu. Olanai la tek, tapi teklah!"

28Ngaloi Tomas man Jesus, "O, Tuhanku! O, Dibatangku!"

29Nina Jesus man Tomas, "Ma perbahan idahndu Aku nge maka kam tek? Malem tuhu-tuhu ate kalak si tek man bangKu aminna pe la Aku idahna!"

Tujun kitap enda

30Tuhu melala denga tanda-tanda sengget ibahan Jesus i lebe-lebe ajar-AjarNa si la isuratken i bas Kitap enda.

31Kai si nggo isuratken i bas Kitap enda tujunna e me gelah kam tek maka Jesus kap Anak Dibata; Ia kap Raja Penampat si ipadanken Dibata. Bage pe gelah arah kinitekenndu nggeluh kam i bas gelarna!


  Share Facebook  |  Share Twitter

 <<  Yohanes 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel