Dual PanelNembeh ate Juna, tapi mekuah ate Dibata
1Erkiteken si e nembeh kal ate Juna, emaka merawa ia.
2Emaka ikatakenna man TUHAN, "O TUHAN, ma nggo kukataken asum aku i negeringku denga, si enda me kal AteNdu IlakokenNdu. Em sabapna maka pedas-pedas aku lompat ku Sepanyol. Kueteh kap maka kam Dibata si perkeleng dingen perkuah; la minter Kam merawa, tapi Kam melias, dingen tetap nggit Kam ngobah KeputusenNdu gelah ula IukumNdu kalak.
3Dage genduari, o TUHAN, buatlah kesahku, sabap ulin aku mate asang nggeluh."
4Ngaloi TUHAN nina, "Bujur kin kam merawa?"
5Kenca bage lawes Juna ku julun kuta e; kundul ia i je. Ibahanna sapo-sapona janah i je me ia cilinggem. Itimaina tah kai si nandangi jadi man Niniwe.
6Kenca bage ipeturah TUHAN Dibata sada sinuan-sinuan i babo Juna maka linggem iakapna, gelah senang iakapna i je. Erkiteken si e meriah kal iakap Juna kerna sinuan-sinuan ndai.
7Tapi pepagina, nandangi pultak matawari, isuruh Dibata nipe-nipe mangani sinuan-sinuan ndai seh mate sinuan-sinuan e.
8Nggo kenca nangkih matawari isuruh Dibata rembus angin i Timur nari, emaka narus ia labuh erkiteken iparpari las matawari. Emaka madin akapna ia mate. "Ulin aku mate asa nggeluh," nina.
9Tapi nina Dibata man bana, "Bujur kin kam merawa erdandanken sinuan-sinuan ndai?" Nina Juna, "Seh kal bujurna aku merawa janah pangen aku mate perban nembehna ateku!"
10Nina TUHAN man Juna, "Sinuan-sinuan enda turah i bas sada berngi saja, janah pepagina nggo masap. Kai pe la lit penampatndu man sinuan-sinuan e, janah labo kam si peturahsa. Tapi amin bage pe ndele ka nge atendu kerna kai si jadi man sinuan-sinuan e.
11Dage, tentu kuahen denga ka ateKu ngenehen Niniwe, kota si mbelin e. Apai denga ka i bas kota e lit 120.000 danak-danak si langa meteh apai salah apai benar janah asuh-asuhen pe seh buena!"