Dual Panel1E bakto jareya badha settong nabbi e Yehuda, se eotos PANGERAN sopaja meyosa ka Betel. Nabbi jareya napa’ ka jadhiya e bakto Yerobeyam teppa’na ngadek e adha’na mezba ngatorragiya kurban.
2Kalaban dhabuna PANGERAN nabbi jareya adhabu epakaja ka mezba buru, "He mezba, he mezba! Areya’ dhabuna PANGERAN, ‘Bakal lahira na’-kana’ se enyama’ana Yosiya e dhalem kalowargana Daud. E attassa ba’na, he mezba, kana’ jareya bakal mateyana mam-imam se atugas e man-dhimman se egabay kennengnganna abakte ka diba, ban se la nyaba’ kurban e attassa ba’na. Ban e attassa ba’na reya keya kana’ jareya bakal ngobbara lang-tolangnga manossa.’"
3Nabbi jareya adhabu pole, "Mezba reya bakal gujura, ban abu se badha e attasanna bakal nompa’a. Jareya buktena ja’ sengko’ eotos PANGERAN."
4E bakto meyarsa dhabuna nabbi jareya, Yerobeyam laju aduding ka nabbi jareya sambi aera’, "Pega’ oreng jareya!" Tape lengngenna Yerobeyam laju gerra sampe’ ta’ ekenneng taja’ pole.
5Mezba jareya daksakala gujur ban abu se badha e attasanna nompa ka tana, akantha se edhabuwagi nabbi jareya menorot se epakonnagi PANGERAN.
6Rato Yerobeyam laju adhabu ka nabbi jareya, "Nyo’ona tolong kaula nyo’onnagi ka PANGERAN, Guste Allahna sampeyan. Nyo’onnagi sopaja PANGERAN kasokana mabaras lengngen kaula!" Nabbi jareya adu’a nyo’on ka PANGERAN, ban lengngenna rato jareya laju baras.
7Saellana jareya rato laju adhabu ka nabbi jareya, "Tore adha’ar e compo’ kaula. Bi’ kaula sampeyan ereng-parengana."
8Saodda nabbi jareya, "Sanare junandalem marengngagiya saparona karaja’anna junandalem ka abdidalem, abdidalem ta’ ngerenga junandalem, sarengngan ta’ neddha’a otaba ngenoma sareng junandalem.
9Abdidalem ampon narema papakon dhari PANGERAN sopaja ta’ neddha otaba ngenom, sareng manabi palemana ta’ lebat e jalan se elebadi abdidalem e bakto mangkat ka ka’dhinto."
10Daddi nabbi jareya laju mangkat lebat jalan laen.
11E bakto jareya badha settong nabbi towa e Betel. Tra-pottrana atotoran parkara nabbi e Yehuda rowa, parkara se elampa’agi nabbi jareya e Betel e are jareya, ban apa se edhabuwagi ka Rato Yerobeyam.
12Nabbi towa jareya atanya, "Nabbi Yehuda jareya lebat e dhimma e bakto gubara?" Tra-pottrana noduwagi jalan jareya.
13Nabbi towa jareya makon tra-pottrana masang pa-kapana hemarra. Saellana jareya laju netene hemar jareya,
14nyerser nabbi dhari Yehuda gella’. Nabbi jareya etemmo teppa’na alenggi e babana kajuwan raja. "Ponapa sampeyan paneka nabbi dhari Yehuda ka’issa’, enggi?" dhabuna nabbi towa gella’. "Enggi, lerres," saodda oreng jareya.
15"Ngereng adha’ar e compo’ kaula," dhabuna nabbi towa gella’.
16Tape nabbi Yehuda jareya adhabu, "Saporana saos! Kaula ta’ kengeng narema pangajagga sampeyan. Kaula ta’ kengeng ngereng sampeyan, jugan ta’ kengeng neddha otaba ngenom e ka’iya sareng sampeyan.
17PANGERAN ta’ marengngagi kaula neddha otaba ngenom sareng ta’ kengeng paleman lebat e jalan se elebadi kaula pamangkadda."
18Nabbi towa dhari Betel gella’ laju co-ngoco adhabu kantha reya, "Kaula nabbi jugan akadi sampeyan. Kalaban dhabuna PANGERAN, malaekat makon kaula ngone’e sampeyan ngatore dha’ar ka sampeyan e compo’ kaula."
19Daddi nabbi dhari Yehuda jareya laju meyos ka compo’na nabbi towa gella’ sarta adha’ar abareng.
20Teppa’na se kadhuwa jareya adha’ar, PANGERAN adhabu ka nabbi towa gella’,
21ban nabbi towa jareya laju adhabu ka nabbi dhari Yehuda gella’, "PANGERAN adhabu ja’ sampeyan ta’ atoro’ ka dhabuna. Sampeyan ta’ alampa’agi se epakonnagi ka sampeyan.
22Sampeyan abali, neddha sareng ngenom, mangkana sampeyan ampon elarang sareng Pangeran. Daddi sampeyan badhi epateyana, dineng mayyittepon sampeyan ta’ ekoburragiya e koburanna kalowargana sampeyan."
23Samarena se kadhuwa jareya adha’ar, nabbi towa jareya masangngagi pa-kapana hemarra nabbi dhari Yehuda jareya,
24saellana jareya nabbi Yehuda jareya laju mangkat. E tengnga lorong tatemmo ban macan, bi’ macan buru laju elonca’e, eserrang sampe’ seda. Mayyidda ajalpa e lorong, dineng hemarra manjeng e seddi’anna. Macan gella’ manjeng e jadhiya keya.
25Reng-oreng se lebat nangale’e mayyit jareya ban macan se manjeng e seddi’anna, laju padha entar ka Betel notorragi apa se etangale’e e lorong jareya.
26E bakto nabbi towa jareya meyarsa parkara jareya, laju adhabu, "Ganeka nabbi se ta’ atoro’ ka dhabuna PANGERAN! Daddi PANGERAN madhateng macan se epanyangkarem nabbi ganeka sampe’ seda akadi se ampon edhabuwagi PANGERAN sabellunna."
27Nabbi se towa jareya laju adhabu ka tra-pottrana, "Pasangngagi pa-kapana tang hemar." Saellana ongga ka hemarra
28pas meyos ka kennengnganna mayyidda nabbi dhari Yehuda gella’. Mayyit jareya etemmo gi’ badha e lorong, dineng hemar ban macan gella’ gi’ manjeng e seddi’anna. Macan jareya ta’ nyerrang hemar jareya ban ta’ ngakan mayyit gella’.
29Mayyit jareya bi’ nabbi se towa gella’ eangka’ esaba’ e attassa hemarra, pas e bakta abali ka Betel me’ olle etangese ban esareyagi.
30Mayyit jareya bi’ nabbi towa gella’ esareyagi dibi’ e koburanna kalowargana, saellana jareya laju etangese abareng ban tra-pottrana. Ca’na tangessa reng-oreng jareya, "Neserra sampeyan, taretan, neserra!"
31Saellana jareya nabbi jareya adhabu ka tra-pottrana, "Mon sengko’ mate, koburragi e seddi’anna koburanna nabbi reya.
32Apa se edhabuwagi nabbi reya menorot papakonna PANGERAN ka mezba e Betel rowa ban ka sakabbinna kennengnganna kabakteyan e tha-kottha Samaria tanto kalakon."
33Rato Yerobeyam paggun ta’ ambu se alako jahat, sarta gi’ terros mele mam-imam dhari ga-kalowarga biyasa epangoros kennengnganna kabakteyan se epaddek e man-dhimman. Sapa’a bai se endha’, laju epadaddi imam.
34Kajahadanna se kantha jareya andaddiyagi toronanna calaka’ ban ancor.