Dual Panel1E bakto la para’ seda’a, Daud adikane Sulaiman, pottrana, sarta apareng sen-pessenna se dhi-budhi. Dhabuna,
2"Sengko’ la para’ mateya. Ba’na pakoko ban pabangal atena.
3Lakone sabarang se edhabuwagi GUSTE Allah ka ba’na. Ta’adi kom-hokomma ban kon-papakonna se badha e dhalem ketab Mosa, sopaja entar dha’ emma’a bai ba’na eparenge ahasel e dhalem sabarang usahana.
4Mon ba’na ta’at ka PANGERAN, PANGERAN tanto neptebbi janjina ja’ tang toronan bakal marenta’a Isra’il, sokor esto ka papakonna sampe’ ka dhalem atena ban pekkeranna.
5Badha settong parkara pole! Ba’na tanto enga’ apa se elakowagi Yowab ka sengko’ kalaban mate’e parwira Isra’il se kadhuwa iya areya Abner ana’na Ner ban Amasa ana’na Yeter. Yowab mate’e se kadhuwa jareya e jaman se taremtem menangka babales ka se kadhuwa jareya polana mate’e reng-oreng e jaman perrang. Yowab mate’e oreng se ta’ sala, tape sateya sengko’ se kodu nanggung lalakonna jareya ban sengko’ se nanggung kasossa’an.
6Daddi, na’, jalannagi ka oreng jareya apa se bi’ ba’na eanggep becce’; coma ja’ sampe’ oreng jareya epanneng mate akantha kapprana oreng biyasa.
7Tape ba’na kodu becce’ ka ana’ lalake’anna Barzilai oreng Gileyad rowa. Genna’e kabutowanna re-saarena, sabab reng-oreng jareya becce’ ka sengko’ e bakto sengko’ buru dhari kaka’na ba’na, Absalom.
8Badha pole se epessennagiya sengko’ parkara Simei ana’na Gera oreng dhari kottha Bahurim e dhaera Benyamin rowa. E dhalem tang parjalanan ka Mahana’im, Simei jareya abasto sengko’ bat-talebat. Tape saellana jareya, iya areya e bakto Simei noro’ ngamba’ sengko’ e Songay Yordan, sengko’ la asompa ka Simei bit asmana PANGERAN ja’ sengko’ ta’ mateyana Simei jareya.
9Tape areya’ tang pessen ka ba’na: ja’ sampe’ Simei jareya epalopot dhari okoman. Sengko’ tao ja’ ba’na reya bicaksana; daddi, maske Simei la towa, ehteyarragi sopaja eokom mate."
10Saellana jareya Daud seda pas esareyagi e Kottha Daud.
11Daud jumenneng rato Isra’il pa’ polo taon abidda: pettong taon alenggi e Hebron, tello polo tello’ taon e Yerusalim.
12Saellana jareya Sulaiman jumenneng rato agante Daud, ramana. Kakobasa’anna Sulaiman menangka rato ce’ kowadda.
13E settong are Adoniya, se ebuna anyama Hagit, nyabis ka Batsyeba, ebuna Sulaiman. Batsyeba atanya ka Adoniya, "Apa ba’na dhateng dha’ enna’ reya kalaban maksod becce’?"
14"Enggi," ca’na Adoniya, "Badha se eso’ona abdina ka panjennengngan." "Apa jareya?" dhabuna Batsyeba.
15Atorra Adoniya, "Panjennengngan ngagali manabi abdina se koduna daddi rato; sadajana oreng Isra’il ngarep sapaneka. Namong kadaddiyana sabaligga; se daddi rato ale’ abdina, sabab kadi gapaneka kasokanna PANGERAN.
16Samangken badha settong parnyo’onan abdina, ja’ kantos tolak, ebu."
17"Apa parmenta’anna ba’na jareya?" dhabuna Batsyeba. Adoniya mator, "Nyo’onnagi ka Rato Sulaiman, sopaja abdina eedine araji Abisag, paraban dhari Sunem ka’dhissa’. Abdina yakin Rato Sulaiman ta’ kera nolak parnyo’onanna panjennengngan."
18"Iya, mara," saodda Batsyeba. "Sengko’ nolonga ba’na acaca’a parkara jareya ka rato."
19Batsyeba laju ngadhep ka rato, maksodda nolonga Adoniya manapa’a parnyo’onanna gella’. Rato ngadek manggi’i ebuna laju asojud, saellana pas alenggi pole e tahtana karaja’anna. Saellana jareya laju makon oreng ngala’ korse epakon saba’ e kanganna kalenggiyanna menangka kalenggiyanna ebuna.
20Saellana alenggi, Batsyeba adhabu, "Badha se epenta’a sengko’ ka ba’na; pera’ sakone’, ja’ sampe’ tolak, ya." "Ponapa, ebu?" dhabuna Sulaiman, "abdina ta’ nolaga."
21Dhabuna Batsyeba, "Edine Adoniya, kaka’na ba’na abine Abisag."
22"Aponapa panjennengngan me’ adhabu kadi ka’dhinto ka abdina?" ca’na Sulaiman. "Gapaneka padha saos sareng manabi ebu makon abdina massra’agi tahtana karaja’an ka’dhinto ka Adoniya. Sabab Adoniya kaka’ abdina, sarengngan pole Imam Abyatar sareng Yowab acocogan ka Adoniya!"
23Saellana adhabu kantha jareya, Sulaiman laju asompa kalaban asmana PANGERAN, "Mandar abdina eparengngana ta’ salamet sareng PANGERAN, manabi abdina ta’ ngokom Adoniya lantaran parnyo’onanna ka’dhinto!
24PANGERAN ampon makoko kadhudhugan abdina e tahtana karaja’anna rama abdina, Daud. PANGERAN ampon neptebbi dhabuna, marengngagi karaja’an ka’dhinto ka abdina sareng toronan abdina. Abdina asompa kalaban asmana PANGERAN se odhi’, Adoniya masthe mate are mangken jugan!"
25Daddi Rato Sulaiman laju makon Benaya, dineng Benaya laju mangkat mate’e Adoniya.
26Saellana jareya Rato Sulaiman laju adhabu ka Imam Abyatar, "Kassa’ ba’na entar ka kampong asalla e Anatot. Ba’na patot eokom mate, tape are teya sengko’ ta’ mateyana ba’na, sabab e bakto ba’na gi’ apolong ban tang rama, ba’na noro’ nanggung sakabbinna kasossa’an ban kasangsara’anna. Laen dhari jareya ba’na se ngoros Petthe Parjanjiyanna PANGERAN."
27Bi’ Sulaiman Abyatar jareya laju epaambu se daddi imam. Kalaban cara se kantha jareya apa se edhabuwagi PANGERAN e Silo parkara toronanna Imam Eli la daddi kanyata’an.
28Yowab meyarsa parkara kadaddiyan jareya. Panggaliyanna arassa tako’ lantaran nolonge Adoniya. Tape, lamba’ Yowab jareya ta’ apiha’ ka Absalom. Daddi laju buru ka Kemah Socce sarta laju neggu’i co’-konco’na mezba.
29Kabar jareya ereppoddagi ka Rato Sulaiman. Rato jareya laju makon Benaya mate’e Yowab.
30Benaya meyos ka Kemah Socce pas adhabu ka Yowab, "Sareng rato sampeyan epakon kalowar dhari ka’dhinto!" "Enja’," saodda Yowab, "sengko’ mateya e dhinna’." Benaya abali laju areppottagi parkara jareya ka rato.
31Meyarsa jareya rato adhabu, "Kassa’ lakone apa se ekoca’agi Yowab jareya. Pate’e oreng jareya pas bendhem, sopaja sengko’ ban sakabbinna toronanna rama ta’ osa nanggung salana Yowab se mate’e oreng se ta’ sala.
32PANGERAN tanto apareng okoman ka Yowab jareya lantaran mate’e oreng ta’ kalaban sapangataowanna tang rama. Abner parwirana Isra’il, ban Amasa parwirana Yehuda, padha ta’ sala kabbi, tape bi’ Yowab epate’e, maske se kadhuwa jareya abecce’an dhari aba’na.
33Okoman lantaran matena parwira se kadhuwa jareya kodu etanggung Yowab ban toronanna salanjangnga. Tape toronanna rama se daddi rato bi’ PANGERAN bakal eberkadana ban eparenge ontong terros."
34Daddi Benaya laju meyos ka Kemah Socce ban mate’e Yowab e jadhiya. Jinazana Yowab jareya ekobur e dalemma e lowar kottha.
35Saellana jareya Benaya bi’ rato laju epadaddi panglimana tantarana epagante Yowab, dineng Zadok epadaddi imam agante Abyatar.
36Saellana jareya rato adikane Simei pas adhabu, "Kassa’ ba’na agabay bengko e Yerusalim reya. Ba’na terros neng e jadhiya, ja’ kalowar dhari kottha.
37Mon ba’na bangal kalowar sampe’ ngalebadi Songay Kidron, ba’na tanto epate’e; ban jareya salana ba’na dibi’."
38"Sae, guste," saodda Simei. "Abdidalem ngerenga dhabuepon junandalem." Daddi Simei laju neng e Yerusalim.
39Saellana olle tello taon laju badha kadaddiyan reya: Badha dunorra Simei kadhuwa buru ka Gat, ka Rato Akhis pottrana Ma’akha. E bakto Simei ebalai parkara jareya,
40laju masang pa-kapana hemarra terros entar ka Rato Akhis e Gat nyareya dunorra se kadhuwa gella’. Dunor jareya etemmo laju egiba mole.
41E bakto Sulaiman meyarsa se elakone Simei jareya,
42laju makon oreng ngolok Simei. Dhabuna Sulaiman, "Bi’ sengko’ ba’na la esoro ajanji kalaban asmana PANGERAN ja’ ba’na ta’ kalowarana dhari Yerusalim. Ban sengko’ la maenga’ ka ba’na ja’ mon ba’na kalowar dhari Yerusalim, ba’na kodu mate. Ba’na gu ta’ la ajanji ban saroju’ atoro’a tang parenta jareya, ta’ iya?
43Tape sateya arapa ba’na me’ ta’ neptebbi janji jareya ban ta’ atoro’ tang parenta?
44Ba’na la tao sabarang kajahadanna ba’na ka Daud tang rama. Lantaran jareya PANGERAN bakal ngokoma ba’na,
45tape sengko’ bakal eparengana berkadda ban karaja’anna Daud tang rama bakal epakokowa salanjangnga."
46Saellana adhabu kantha jareya, rato apareng papakon ka Benaya ban Benaya laju entar mate’e Simei. Sateya Sulaiman ngadibi’i sakabbinna kakobasa’an e dhalem karaja’anna.