Dual Panel1Saellana Sulaiman mare se maddek Padalemman Socce ban karaton sarta sabarang se daddi rancanana,
2PANGERAN pas ngaton pole ka Sulaiman akantha se neng e Gibeyon.
3Dhabuna PANGERAN ka Sulaiman, "Sengko’ la ngedhing ka du’ana ba’na, ban padalemman se la epaddek bi’ ba’na reya bi’ Sengko’ enyata’agi menangka kennengngan se malolo kaangguy abakte ka Sengko’ salanjangnga. Bi’ sengko’ kennengngan reya ejaga’a salanjangnga.
4Mon ba’na ngabdi ka Sengko’ kalaban ate se ehlas tor jujur padha ban ramana ba’na Daud, sarta ba’na ta’at ka sakabbinna Tang hokom ban Tang parenta,
5Sengko’ neptebbana Tang janji ka Daud ramana ba’na, iya areya ja’ na’ potona ba’na ron-temoron bakal terrosa marenta Isra’il.
6Tape mon ba’na otaba toronanna ba’na ta’ atoro’ pole ka Sengko’ sarta ta’ ta’at ka sakabbinna Tang hokom ban Tang parenta, sarta nyemba ka la’-alla’an laenna.
7Sengko’ ngojuga Tang ommat Isra’il dhari nagara se bi’ Sengko’ la ebagi ka Tang ommat jareya. Bariya keya Sengko’ ondura dhari bengko reya se bi’ Sengko’ la eteptebbagi menangka kennengnganna oreng abakte ka Sengko’. E dhimma’a bai, oreng Isra’il bakal eya’-seya’a sarta ekala’-gella’a oreng.
8Padalemman kennengnganna oreng ngalakone kabakteyan reya bakal daddiya tombuganna bato jur-gujuran, sampe’ oreng se lebat e seddi’anna bakal padha’a takerjat ban arassa marenges kabbi. Reng-oreng jareya bakal atanya’a kantha reya, ‘Arapa padalemman reya me’ epakantha reya bi’ PANGERAN?’
9Oreng laen bakal nyaoda kantha reya, ‘Polana oreng Isra’il loppa ka PANGERAN, Allahna se ngater para bangatowana kalowar dhari nagara Messer. Sateya oreng Isra’il nyemba la’-alla’an laen. Daddi bi’ PANGERAN epadhatengnge balai reya.’"
10Sulaiman maddek Padalemman Socce ban karatonna rato abidda dhu polo taon.
11Kaju comara Libanon ban kaju comara biyasa sarta emmas se ekaparlo Sulaiman kaangguy maddek Padalemman Socce ban karaton jareya kabbi eatore Rato Hiram. Saellana lalakon jareya la mare, Hiram bi’ Rato Sulaiman eparenge kottha dhu polo meggi’ e dhaera Galilea.
12Hiram meyos ngoladana, tape panggaliyanna ta’ senneng narema papareng jareya.
13Dhabuna Rato Hiram ka Rato Sulaiman, "Taretan, me’ kadi paneka tha-kottha paparengnga panjennengngan ka kaula?" Lantaran jareya dhaera jareya gi’ anyama Kabul.
14Hiram la ngerem emmas ka Sulaiman bannya’na lebbi dhari pa’ ebu kilo.
15Rato Sulaiman alampa’agi cara lako paksa kaangguy maddek Padalemman Socce, karatonna rato, pagar alassa Yerusalim ban se nembuga tana e lao’anna Padalemman Socce. Bariya keya se maddek pole kottha Hazor, Megido ban Gezer se la rosak.
16(Kottha Gezer jareya kottha se lamba’ elorok rato Messer,orengnga padha epate’e, kotthana eobbar. Saellana jareya kottha buru bi’ rato Messer eparengngagi ka pottrena menangka paparengnga e bakto apangantan ban Sulaiman.
17Sulaiman se maddek pole tha-kottha jareya.) Kalaban lako paksa keya, Sulaiman maddek pole Bet-Horon-Onjur,
18Ba’alat, Tamar e ra-ara beddhi Yehuda,
19tha-kottha kennengnganna panyempennanna parsadhiya’anna kakanan, ban tha-kottha kennengnganna ran-jaranna ban ta-kareta perrangnga. Rancana pambangonanna e Yerusalim, Libanon ban e saantero baba kakobasa’anna la elampa’agi kabbi.
20Se epalako paksa bi’ Sulaiman iya areya reng-oreng toronanna oreng Amori, Het, Feris, Hewi ban Yebus. Jareya toronanna bangsa Kana’an se ta’ ekenneng pate’e bi’ oreng Isra’il e bakto arebbu’ ban ngobasane nagara jareya. Sampe’ sateya toronanna reng-oreng jareya gi’ terros daddi dunor.
21(9:20)
22Oreng Isra’il bi’ Sulaiman ta’ epadaddi dunor; coma epadaddi parjurit, parwira, panglima, komandhanna kareta perrang, ban tantara pasukan jaran.
23Lema ratos saeket oreng ponggaba epangoros reng-oreng se ajalannagi lako paksa e dhalem proyek pambangonanna Sulaiman se acem-macem.
24Tana e lao’anna Padalemman Socce bi’ Sulaiman etembuk saellana rajina, iya areya pottrena rato Messer, ngalle dhari Kottha Daud ka karaton se epaddek Sulaiman menangka paparengnga ka rajina jareya.
25Tello kale sataon Sulaiman ngatorragi kurban obbaran ban kurban karokonan e attassa mezba se la epaddek sarta eatorragi ka PANGERAN. Salaenna jareya gi’ ngobbar dupa ka PANGERAN. Daddi Sulaiman la mamare pambangonanna Padalemman Socce.
26Kaangguy armadhana, Sulaiman abadhi pal-kapal e Ezion-Geber, e seddi’anna Elot e paseser Tellok Akaba, dhaera Edom.
27Rato Hiram ngerem para bandhigana se la andhi’ pangalaman epakon alajar ban para bandhigana Sulaiman.
28Reng-oreng jareya tao alajar ka nagara Ofir ngala’a emmas pa’ bellas ebu kilo se pas egiba ka Sulaiman.