Alkitab Mobile SABDA
[VER] : [MADURA]     [PL]  [PB] 
 <<  1 Samuel 1 >> 

1Badha oreng lalake’ kasorang, nyamana Elkana, dhari suku Efraim. Bengkona e kottha Rama, e tana pagunonganna Efraim. Elkana jareya ana’na Yeroham, kompoyya Elihu; maso’ toronanna Tohu, bagiyanna kaom Zuf.

2Elkana andhi’ bine dhadhuwa’, nyamana Hana ban Penina. Penina andhi’ ana’, tape Hana enja’.

3Sabban taon Elkana entar ka Silo dhari Rama, parlo abakteya ban ngatorragiya kurban ka PANGERAN Se Mahakobasa. Se daddi imamma PANGERAN e Silo jareya Hofni ban Pinehas, pottrana Eli.

4Sabban Elkana ngatorragi kurban, Penina ban na’-ana’na padha epamelo sabagiyan dhari daging kurbanna.

5Tape Hana eberri’i bagiyan se kusus, sabab Elkana ce’ taresnana ka Hana, sanajjan Hana ta’ eparenge andhi’ ana’ bi’ PANGERAN.

6Hana ros-terrosan esake’e atena bi’ Penina, madhuna, polana se ta’ eparenge andhi’ ana’ bi’ PANGERAN.

7Kadaddiyan se kantha jareya ros-terrosan sabban taon; mon reng-oreng jareya entar ka Padalemman Socce, Penina ros-terrosan nyake’e atena Hana. Daddi Hana seggut nanges ban ta’ endha’ ngakan pa-apa.

8Biyasana lakena, Elkana, atanya kantha reya, "Hana, arapa ba’na me’ nanges? Arapa ba’na me’ ta’ endha’ ngakan? Ban arapa ba’na me’ sossa terros? Apa sengko’ reya ka ba’na ajina ta’ alebbiyan dhari ana’ sapolo oreng?"

9E settong are, saellana Elkana sabala mare ngakan e Padalemman Socce e Silo, Hana jaga dhari meja makan. Atena ce’ sossana, sambi nanges sasegunen Hana adu’a ka PANGERAN. E bakto jareya, imam se anyama Eli teppa’na badha e Padalemman Socce jareya, alenggi e korse e seddi’na labang.

10(1:9)

11Hana ajanji kantha reya, "Adhu, Guste Se Mahakobasa, ngereng oladi abdidalem ka’dhinto! Ngereng oladi kasangsara’an abdidalem. Kaemodi abdidalem, ja’ kantos Junandalem kalep ka abdidalem! Manabi abdidalem eparenge ana’ lalake’, abdidalem ajanji kana’ gapaneka eatorragiya ka Junandalem saomorra. Abdidalem ajanji jugan, obu’na ta’ eketthoga terros."

12Hana ce’ abidda se adu’a ka PANGERAN; Eli ngoladi bibirra.

13Hana adu’a e dhalem atena; daddi bibirra para’ li-guliyan tape tadha’ sowarana. Daddi bi’ Eli esanggu mabu’,

14Eli pas adhabu, "Mon mabu’ ja’ neng e jadhiya! Ambu ja’ ngenom anggur pole!"

15"Bunten, kaula ta’ mabu’, pa’," saodda Hana. "Kaula ta’ oneng ngenom anggur! Kaula ampon potos pangarebban, daddi kaula nyareta’agi sadaja kasossa’anna ate kaula ka PANGERAN.

16Sampeyan ja’ nganggep kaula babine’ ta’ sae! Kaula nyo’on ka Pangeran kantha paneka polana kaula ce’ sossana."

17"Mon kantha jareya, kassa’ la le-mole kalaban salamet," dhabuna Eli. "Moga-moga Allahna ommat Isra’il ngabbulana apa se daddi parnyo’onanna ba’na."

18"Moga-moga kaula kengenga du’ana sampeyan," saodda Hana. Samarena jareya Hana ondur, pas ngakan. Atena la ta’ sossa.

19Kalagguwanna Elkana ban saessena bengkona jaga gu-laggu, ban saellana abakte ka PANGERAN, kabbi padha mole ka bengkona e Rama. Elkana tedhung apolong ban Hana, binena, parnyo’onna Hana ekabbuli bi’ PANGERAN.

20Babine’ jareya pas ngandhung sarta rembi’ lalake’. Kana’ jareya enyamae Samuwel, ca’na Hana: "Kana’ reya ollena sengko’ nyo’on ka PANGERAN."

21Saellana napa’ baktona Elkana ban saessena bengkona entar ka Silo pole ngatorragiya kurban taonan. Salaenna jareya Elkana la ajanji ngatorragiya kurban se malolo ka PANGERAN.

22Tape e bakto jareya Hana ta’ noro’. Oca’na ka lakena, "Dhaggi’ mon kana’ jareya la epesa, bi’ sengko’ terros eaterragiya ka Padalemman Socce, me’ olle neng e jadhiya saomorra."

23Sambidda Elkana, "Iya, baramma ca’na ba’na se kemma se paleng teppa’; la neng e bengko sampe’ napa’ ka baktona kana’ jareya epesa. Moga-moga bi’ PANGERAN janjina ba’na epadaddi kanyata’an." Daddi, Hana neng e bengkona, arabat ana’na sampe’ napa’ ka baktona kana’ jareya epesa.

24Saellana Samuwel epesa, bi’ Hana e giba ka Silo. Hana ngeba sape lake’ se aomor tello taon, teppong sapolo kilo, ban anggur sakanthong kole’. Samuwel se gi’ kene’ jareya egiba ka Padalemman Socce.

25Saellana sape jareya esambelli, Samuwel pas egiba ka Eli.

26Ca’na Hana ka Eli jareya, "Ta’ langkong, enggi, Pa’, ponapa sampeyan emot ka kaula? Kaula paneka babine’ se bi’ sampeyan etengale jeng-manjeng e ka’iya, e bakto ganeka kaula adu’a ka PANGERAN.

27Kaula nyo’on ana’ paneka; ban PANGERAN ngabbullagi ponapa se daddi parnyo’onna kaula.

28Daddi bi’ kaula kana’ paneka epassra’agiya ka PANGERAN. Saomorra kana’ paneka kaagunganna PANGERAN." Saellana jareya se kadhuwa jareya pas abakte ka PANGERAN e jadhiya.


  Share Facebook  |  Share Twitter

 <<  1 Samuel 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel