Dual Panel1Saellana jareya Nahas, rato Amon, mamangkat tantarana epangeppong kottha Yabes e baba Gileyad. Reng-oreng Yabes ausul kantha reya ka Nahas, "Ngereng mabadha parjanjiyan sareng Yabes, reng-oreng Yabes pas atelloga ka junandalem."
2Saodda Nahas, "Sengko’ endha’ mabadha parjanjiyan, tape saradda kantha reya: mata kanganna ba’na padha econgke’a kabbi bi’ sengko’ menangka tandha ja’ sakabbinna bangsa Isra’il eya-seya bi’ sengko’."
3Saellana jareya para pamimpinna kottha Yabes padha nyaot, "Abdidalem nyo’ona bakto pettong are parlo ngotosa oreng ka sabalattrana tana Isra’il. Manabi tadha’ se porona nolonge, oreng Yabes atelloga ka junandalem."
4Para otosan jareya napa’ ka Gibeya, kalenggiyanna Saul. E bakto reng-oreng jareya manapa’ kabar gella’, ra’yat pas padha nanges polana arassa ta’ andhi’ pangarebban pole.
5E bakto jareya Saul gi’ buru rabu dhari teggalla abakta pe-sapena. "Badha apa? Me’ padha nanges kabbi?" dhabuna Saul. Reng-oreng jareya pas notorragi parkara kabar se egiba oreng Yabes gella’.
6E bakto meyarsa kabar jareya, Saul pas ekobasae Errohna Allah.
7Panggaliyanna ce’ dukana, laju mondhut sape dhadhuwa’, esambelli, pas ethok-ketthok epadaddi sabannya’na. Thok-ketthoganna sape jareya pas epakerem ka saanterona tana Isra’il, etoro’e papakon kantha reya, "Sapa se ta’ noro’ aperrang bi’ Saul ban Samuwel, sapena ethok-ketthoga epakantha’a reya keya!" Bangsa Isra’il tako’ ka pa-apa se olle daddi elampa’agiya PANGERAN, daddi kabbi padha asadhiya mangkada aperrang areng-bareng.
8Reng-oreng jareya epakompol e Bezek, pas ebitong: badha tello ratos ebu oreng Isra’il ban tello polo ebu oreng Yehuda.
9Saellana jareya para otosan dhari Yabes ebalai kantha reya, "Kabala ka oreng Yabes, lagguna sabellunna beddhuk, oreng Yabes la olleya partolongan." E bakto ngedhing kabar jareya, pandhudhu’ Yabes ce’ peragga.
10Atorra ka Nahas, "Lagguepon oreng Yabes badhi atelloga ka junandalem, eatore epakadi ponapa’a saos oreng Yabes ngereng kasokan."
11Kalagguwanna gu-laggu, reng-oreng se entara aperrang bi’ Saul ebagi epadaddi tello pasukan. Ban e bakto pajjar buru ngombar reng-oreng jareya padha nyerrang ka nga’-tengnga’anna parkemahanna oreng Amon. Sabellunna beddhuk, tantarana Saul la makala mosona. Reng-oreng Amon se ngenneng buru car-kalacer, padha buru bi’-dibi’ ebang.
12Saellana jareya bangsa Isra’il atanya ka Samuwel, "E ka’dhimma reng-oreng se ngoca’ ja’ Saul ta’ pantes daddi rato Isra’il? Ngereng parenge oneng, epateyana."
13Tape Saul adhabu, "E are teya ta’ olle badha oreng se epate’e, sabab e are teya PANGERAN la masalamet Isra’il."
14Samuwel adhabu ka reng-oreng jareya, "Mara sateya padha entar ka Gilgal kabbi, neng e dhissa’ mara Saul resmeyagi menangka rato Isra’il."
15Daddi reng-oreng jareya padha entar ka Gilgal kabbi, ban e kennengnganna kabakteyan jareya Saul eresmeyagi menangka rato Isra’il. Reng-oreng Isra’il padha ngatorragi kurban karokonan, dineng Saul ban bangsa Isra’il kabbi padha araya’agi kadaddiyan jareya.