Alkitab Mobile SABDA
[VER] : [MADURA]     [PL]  [PB] 
 <<  1 Samuel 12 >> 

1Samuwel pas adhabu ka sakabbinna bangsa Isra’il, "Apa pamentana ba’na bi’ sengko’ la etorodi. Sengko’ la ngangkat rato se marenta’a ba’na.

2Molae sateya rato jareya se mimpina ba’na. Mara abassagi, sengko’ la oban ban la towa. Sengko’ la ce’ abidda se mimpin ba’na — molae sengko’ gi’ ngodha sampe’ sateya. Buktena tang ana’ se la ja-raja reya.

3Sateya sengko’ badha e dhinna’ e adha’na ba’na. Mon sengko’ andhi’ sala ka ba’na, koca’agi sateya e ajunanna PANGERAN ban e ajunanna rato peleyanna PANGERAN jareya. Apa sengko’ tao ngala’ sape otaba hemarra oreng? Pola sengko’ tao co-ngoco otaba nyeksa oreng otaba ngala’ sogo’? Mara koca’agi, sopaja pa-apa se ekala’ sengko’ bisa’a epabali sateya."

4Reng-oreng jareya nyaot, "Bunten, panjennengngan ta’ oneng co-ngoco otabana nyeksa bangsa abdina; jugan ta’ oneng mondhut dhi’-andhi’na oreng."

5Dhabuna Samuwel, "E are teya PANGERAN ban rato peleyanna daddi sakse ja’ sengko’ ta’ andhi’ sala pa-apa." "Lerres, Pangeran saksena," ca’na reng-oreng Isra’il.

6Samuwel pas adhabu pole, "PANGERAN se mele Mosa ban Harun, ban se abakta bangatowana ba’na kabbi kalowar dhari Messer.

7Sateya, nante’ gallu, ja’ duli nyengga. Sengko’ nyebbuddagiya kasala’anna ba’na e ajunanna PANGERAN. Kaenga’e sakabbinna kamora’anna PANGERAN ka ba’na ban ka bangatowana ba’na.

8E bakto Yakub ban la-balana ngalle ka Messer, ban oreng Messer pas eseksa, bangatowana ba’na nyo’on partolongan ka PANGERAN; PANGERAN pas ngotos Mosa ban Harun. Mosa ban Harun jareya abakta bangatowana ba’na kalowar dhari Messer sarta nolong bangatowana ba’na jareya sampe’ bisa neptep e nagara reya.

9Tape saellana jareya oreng Isra’il loppa ka PANGERAN, Allahna, daddi bi’ PANGERAN bangsa reya epanneng e bakto eserrang ban epakala Sisera, panglimana tantara Hazor, ban oreng Filistin sarta rato Mo’ab.

10Saellana jareya oreng Isra’il adu’a ka PANGERAN ban ngakowe dusana, sambi ngoca’ kantha reya, ‘Abdidalem dusa polana mongkore Junandalem, GUSTE, sareng nyemba ka ca-arcana diba Ba’al sareng Asytoret. Namong samangken, abdidalem nyo’ona tolong pasalameddagi dhari moso, abdidalem ajanji ngabdiya ka Junandalem!’"

11PANGERAN pas ngotos Gideyon, samarena jareya pas Barak, pas Yefta, dhi-budhina sengko’. Sengko’ ban otosanna PANGERAN laenna se katello jareya padha nolong ba’na sampe’ salamet dhari moso ban odhi’ taremtem.

12Tape e bakto ba’na nangale’e ja’ eserranga Nahas rato Amon, ba’na ta’ ngakone PANGERAN menangka ratona, ban ba’na kabbi padha ngoca’ ka sengko’, ‘Abdina sadaja terro eparenta’a rato.’

13"Sateya mara abas, reya’ rato peleyanna ba’na dibi’. Ba’na menta rato, ban PANGERAN la eparenge.

14Ba’na tanto senneng odhi’na mon ba’na hormat ka PANGERAN ban ngabdi ka Salerana, sarta ngedhingngagi ban atoro’ ka papakonna, apa pole mon ba’na ban ratona teptep esto ka Guste Allahna.

15Sabaligga, mon ba’na ta’ ngedhingngagi ka dhabuna PANGERAN, la’-mala’ alaban ka papakonna, ba’na sarta ratona tanto ekamoso bi’ PANGERAN.

16Sateya, edhingngagi pole! Abassagi! PANGERAN mabadha’a kaajiban raja e adha’na ba’na.

17Sengko’ nyo’ona ka PANGERAN, ban sanajjan sateya reya mosem nemor, PANGERAN bakal madhatengnga galudhuk ban ojan menangka tandha ja’ tang parnyo’onan ekabbuli. E bakto jareya, ba’na bakal apangrasa’a saapa dusana ba’na ka PANGERAN polana se menta rato."

18Samuwel pas adu’a, ban e are jareya keya PANGERAN madhateng galudhuk ban ojan. Bangsa jareya padha tako’ kabbi ka PANGERAN ban ka Samuwel.

19Atorra reng-oreng jareya ka Samuwel, "Nyo’ona tolong, Pa’, nyo’onnagi ka GUSTE Allahna panjennengngan, sopaja abdina sadaja ta’ kantosa mate. Samangken abdina apangrasa sadaja ja’ salaenna dusa se ba’-lamba’na, samangken atamba dusa pole polana nyo’on rato."

20Saodda Samuwel, "Ella, ta’ osa tako’. Maske ba’na la alako jahat, ja’ mongkore PANGERAN, papaggun ngabdi ka Salerana pagu-onggu.

21Ja’ atoro’ ka ba-diba se ta’ bisa nolong ban masalamet ba’na, sabab sanyatana ba-diba jareya tadha’.

22PANGERAN la asompa ta’ adinggallagiya ba’na sabab PANGERAN la motossagi ja’ ba’na kabbi epadaddiya ommadda dibi’.

23Parkara sengko’, moga-moga sengko’ ta’ dusa’a ka PANGERAN sabab ta’ adu’a nyo’onnagi ba’na ka PANGERAN. Sabaligga sengko’ terrosa keya ngajarragi parkara se becce’ ban bendher ka ba’na.

24Pahormat ka PANGERAN, paesto ban pagu-onggu ngabdi ka Salerana. Kaenga’e kon-lalakon raja se elampa’agi Salerana kaangguy kaparlowanna ba’na.

25Tape mon ba’na ros-terrosan agabay dusa, ba’na ban ratona tanto mate."


  Share Facebook  |  Share Twitter

 <<  1 Samuel 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran