Dual Panel1Samuwel seda ta’ abit saellana jareya. Oreng Isra’il akompol kabbi noro’ opacarana oreng kasossa’an. Saellana jareya Samuwel esareyagi e kalenggiyanna e Rama. Saellana jareya Daud meyos ka ra-ara beddhi Paran.
2E kottha Ma’on badha oreng lake’ dhari kaom Kaleb, nyamana Nabal. Oreng jareya andhi’ tana pameyara’anna ebin e seddi’na kottha Karmel. Oreng jareya ce’ sogina, andhi’ dumba tello ebu meggi’ ban embi’ saebu meggi’. Binena se anyama Abigail, penter ban raddin, tape Nabal kasar babategga ban juba’ tengkana. E settong are Nabal teppa’na agunteng buluna dumbana e Karmel.
3(25:2)
4E bakto jareya Daud teppa’na badha e ra-ara beddhi; e bakto meyarsa parkara jareya,
5Daud makon ngangodhadan sapolo oreng entar ka Karmel,
6manapa’ salamma ka Nabal se badha e jadhiya. Reng-oreng jareya epakon ngoca’ kantha reya, "Salam kaula ka sampeyan sakalowarga sareng ka sadajana se ekaandhi’ sampeyan.
7Kaula mereng kabar ja’ sampeyan teppa’na agunteng buluna dumbana. Kaonenge ja’ reng-oreng ngowanna sampeyan se badha e dhaera kaula, ta’ oneng ela-salae sareng reng-oreng e ka’dhissa’, jugan ta’ oneng kaelangan pa-ponapa saabidda badha e Karmel.
8Tanya’agi saos ka reng-oreng ngowanna sampeyan, tanto reng-oreng ngowanna sampeyan ganeka padha ngako ja’ se ekoca’agi kaula paneka lerres. Daddi, kaula ngarep sampeyan kasokana narema reng-oreng kaula e compo’na sampeyan, sabab kaula sareng reng-oreng kaula dhateng ka ka’dhinto teppa’ e are raja paneka. Jugan kasokana sampeyan marenge kaula, Daud, sahabadda sampeyan, sareng reng-oreng kaula, ponapa’a saos se badha e sampeyan menorot ehlassa panggaliyanna sampeyan."
9Sanapa’na ka Karmel, otosanna Daud jareya padha manapa’ pessenna Daud gella’ ka Nabal, pas padha anante’.
10Tape ca’na Nabal, "Daud? Sapa jareya? Sapa ana’na Isay? Sengko’ ta’ tao ngedhing parkara oreng jareya! Gi’ buruwan reya bannya’ dunor se buru dhari lorana e nagara reya!
11Arapa’a sengko’ me’ daddi ngala’a tang roti ban tang aeng enom, sarta daging se esadhiya’agi sengko’ kaangguy reng-oreng se agunteng buluna tang dumba, ebagiya ka reng-oreng se ta’ terrang asal-osolla?"
12Otosanna Daud jareya abali, laju notorragi ka Daud sabarang se ekoca’agi Nabal gella’.
13"Mara kasongkel peddhangnga bang-sebang!" dhabuna Daud. Papakon jareya etoro’ bi’ reng-oreng baba’anna. Daud dibi’ nyongkel peddhangnga keya, sarta pas mangkat, abakta bala ra-kera pa’ ratos oreng, dineng se dhu ratos oreng edina e budhi epajaga rang-barang.
14Sabatara jareya badha barengnga Nabal se abala ka Abigail, binena Nabal, oca’na, "Sampeyan ponapa ampon meyarsa? Daud ngerem otosan dhari ra-ara beddhi epakon manapa’ salamma ka guste, namong sareng guste reng-oreng otosan gapaneka eca’-koca’e.
15Mangkana reng-orengnga Daud paneka ce’ saena ka kaula sakanca. Kaula sakanca padha ta’ oneng ela-salae, ban e bakto akompol sareng reng-oreng gapaneka e ra-ara beddhi kaula sakanca ta’ oneng kaelangan pa-ponapa.
16Seyang malem kaula sakanca padha elindhunge saabidda ngowan embi’ sareng dumba akompol sareng reng-oreng gapaneka.
17Daddi, ngereng kagali dhimen parkara paneka, pas potose ponapa se elampa’agiya sampeyan. Sabab tanto badha babales dhari Daud ka guste sabalana. Guste talebat cengkal ta’ ekenneng ajak aparembagan!"
18Abigail duli ngala’ roti dhu ratos meggi’, ban kanthong kole’ dhadhuwa’ se epossa’e bi’ aeng anggur, panggangnga dumba lalema’, gandum sangngar petto bellas kilo, buwana anggur kerreng saratos gundhung ban jajan dhari buwana ara dhu ratos meggi’. Jareya kabbi eangko’ ban mar-hemar.
19Saellana jareya Abigail ngoca’ ka reng-barengnga, "Mara ba’na ajalan kaadha’; sengko’ noro’a bunte’." Tape Abigail ta’ ngoca’ pa-apa ka lakena se toron dhari gunong.
20Abigail nompa’ hemarra, ban e bakto napa’ ka settong luk-bilugan e penggirra gunong, laju lep-saleban ban Daud sarta pangerengnga.
21E bakto jareya Daud teppa’na andhi’ panggaliyan kantha reya, "Parcoma sengko’ ajaga dhi’-andhi’na oreng rowa e ra-ara beddhi! Dhi’-andhi’na tadha’ se elanga; ban sateya tang kabecce’an ebales ban kajahadan!
22Mandar sengko’ epamateya bi’ Allah mon sengko’ ta’ mate’e sakabbinna lalake’an e dhissa’ sabellunna compet are!"
23E bakto Abigail nangale’e Daud, laju duli toron dhari hemarra pas asojud
24e padana Daud sarta mator kantha reya, "Ngereng peyarsa’agi dhimen, guste! Dinggal kasala’an gapaneka etanggunga abdina dibi’.
25Ampon ja’ kagali parkara Nabal, oreng se tadha’ gunana ka’issa’! Orengnga budhu — cocok sareng artena nyamana. Abdina ta’ nengale para otosannepon panjennengngan.
26Allah ampon ngalange panjennengngan males mate’e so-mosona. Samangken GUSTE, abdina asompa’a ka panjennengngan kalaban asmana PANGERAN se odhi’, moga sadajana mosona panjennengngan sareng sadajana oreng se terro macalaka’a panjennengngan epastheya padha sareng Nabal.
27Kasokana panjennengngan narema tor-ator se ebakta abdina ka’dhinto kaangguy panjennengngan sareng reng-oreng se ngereng panjennengngan.
28Abdina nyo’ona sapora lantaranna sadajana kahelaban abdina. Sareng PANGERAN panjennengngan satoronanna tanto epajumenneng rato Isra’il, sabab panjennengngan aperrang kaangguy PANGERAN jugan panjennengngan ta’ alampa’agiya barang se juba’ saomorra.
29Saompamaepon badha se nyerrang mateyana panjennengngan, tanto panjennengngan elindhunge sareng PANGERAN akadi oreng se ajaga hartana. Dineng so-mosona panjennengngan badhi epelpallagiya ka jauna sareng Pangeran, akadi oreng se melpallagi baliker sareng dhiballa.
30PANGERAN badhi alampa’agiya sadajana kabecce’an se ampon ejanjiyagi ka panjennengngan, sarengngan panjennengngan sakejja’ aggi’ bakal epajumennengnga rato Isra’il.
31E bakto gapaneka panjennengngan bakal ngemodana ja’ panjennengngan ta’ mate’e oreng ta’ kalaban badha lantaranna otabana amaen hakim dibi’, daddi panjennengngan ta’ parlo arassa sossa otaba kasta. Ban manabi PANGERAN ampon aberkadi panjennengngan, guste, kaemodi abdiepon panjennengngan ka’dhinto."
32Daud laju adhabu ka babine’ jareya, "Molja’agi PANGERAN, Allahna Isra’il, se ngotos ba’na entar ka sengko’ are teya reya!
33Molja’agi kabicaksana’anna ba’na se ngalange sengko’ ngalakone kajahadan mate’e oreng sarta males sake’na ate.
34PANGERAN la ngalange sengko’ alako jahat ka ba’na. Tape sengko’ asompa kalaban asmana PANGERAN, Allahna Isra’il se odhi’, ja’ sakenga ba’na ta’ duli entar ka sengko’, orengnga Nabal tanto mate kabbi e bakto moncar are!"
35Saellana jareya Daud narema tor-atorra Abigail, laju adhabu, "Kassa’ la le-mole, la ta’ osa kobater. Parnyo’onanna ba’na bi’ sengko’ ekabbulana."
36E bakto Abigail abali ka Nabal, e bengkona teppa’na badha pesta raja, akantha pestana rato. Ban sarrena e bakto jareya Nabal teppa’na mabu’, daddi binena ta’ abala pa-apa sampe’ kalagguwanna.
37Kalagguwanna, saellana Nabal la ta’ mabu’ pole, Abigail notorragi sakabbinna kajahadan jareya. Nabal pas ekenneng serrangan jantung, pas empon sabadan.
38Ra-kera sapolo are aggi’ bi’ PANGERAN Nabal epakenneng serrangan jantung pole laju terros mate.
39E bakto Daud meyarsa ja’ Nabal la mate, laju adhabu, "Molja’agi PANGERAN! Salerana malessagi kajahadanna Nabal se ya-nyeya sengko’, ban la ngalange sengko’ abdina reya, dhari lalakon se jahat. PANGERAN la ngokom Nabal lantaranna kajahadanna." Saellana jareya Daud ngerem otosan alamar Abigail, ekarajiya.
40Para otosan jareya entar ka Abigail se badha e Karmel, laju ngoca’, "Abdina sadaja otosanna Daud epakon ngatore oneng ka panjennengngan manabi panjennengngan kasokan, ekarajiya Daud."
41Abigail jaga laju asojud sarta ngoca’, "Kaula paneka abdina Daud, massowe sokona para kabulana saos kaula poron."
42Saellana jareya Abigail laju akes-rengkes duliyan, pas mangkat nompa’ hemarra eerengngagi barengnga babine’ kalema, terros noro’ otosanna Daud, daddi Abigail pas ekaraji Daud.
43Sabellunna jareya Daud la araji Ahino’am dhari Yizre’el, ban sateya Abigail ekaraji keya.
44Sabatara jareya Saul maraji’i pottrana se anyama Mikhal, iya areya rajina Daud, ban Palti ana’na Lais dhari kottha Galim.