Dual Panel1E settong are reng-oreng dhari Zif entar ka Saul e Gibeya, abala ja’ Daud ngetek e Gunong Hakhila e penggirra ra-ara beddhi Yehuda.
2Daddi Saul laju duli mangkat eereng parjurit se paleng bagus e Isra’il se bannya’na tello ebu oreng, entar ka ra-ara beddhi Zif nyareya Daud.
3Saul akemah e penggir lorong e seddi’na Gunong Hakhila jareya. Daud se badha e ra-ara beddhi jareya meyarsa ja’ Saul nyare’e salerana sampe’ gan ra-ara beddhi jareya.
4Daud laju ngerem ta-mata, daddi pas ngagali onggu ja’ Saul bendher badha e jadhiya.
5Daud duli meyos ka parkemahanna Saul; e jadhiya Saul etemmo teppa’na asaren e seddi’na Abner ana’na Ner, panglimana tantarana Saul. Kemahna Saul badha e nga’-tengnga’an, ekalenglenge kemahna para tantarana.
6Daud pas adhabu ka Ahimelekh oreng Het rowa, ban ka Abisai taretanna Yowab (ebuna reng-oreng jareya iya areya Zeruya), "Sapa se bangal noro’ sengko’ maso’ ka kemahna Saul?" Saodda Abisai, "Abdina!"
7E malem jareya keya Daud ban Abisai kalaban tek-ngetek maso’ ka parkemahanna Saul; e jadhiya Saul etemmo teppa’na asaren e nga’-tengnga’anna parkemahan, tombagga naccek e tana e seddi’anna serana. Abner ban pasukanna tedhung e sakalenglengnga.
8Abisai laju mator ka Daud, "Samangken Allah ampon massra’agi mosona panjennengngan ka panjennengngan. Abdina nyo’ona edi nyoddu’agiya tombagga dibi’ ka badanna epaterbasa kantos ka tana, sareng abdina epateyana namong kalaban esoddu’ sakaleyan, ta’ mabi kantos dhu kale!"
9Tape Daud adhabu, "Ella, panneng! PANGERAN tanto ngokom oreng se alako jahat ka rato peleyanna.
10Kalaban asmana Allah se odhi’, sengko’ tao ja’ PANGERAN dibi’ se bakal mateyana Saul, mon la napa’ ka ajalla, otabana mon mate e paperrangan.
11PANGERAN ta’ ngedine sengko’ mate’e rato peleyanna! Kala’ bai tombagga ban gendhina, pas ondur."
12Daud laju mondhut tombak ban gendhina Saul jareya dhari seddi’na serana Saul, saellana laju nyengla. Tadha’ oreng settonga se nangale’e otaba se tao ka kadaddiyan jareya, bariya keya tadha’ oreng settonga se ngedhing, sabab bi’ PANGERAN reng-oreng jareya epangeddha kabbi.
13Daud laju meyos lebat e cora jareya sampe’ ka penggir salajanna terros sampe’ gan konco’na gunong, sampe’ jau dhari parkemahanna Saul.
14Sanapa’na ka jadhiya Daud aera’ ka Abner ban ka tantarana Saul, dhabuna, "Abner! Ba’na ba’ ngedhinga tang sowara?" Abner aera’ keya, "Sapa ba’na se ra’-era’an jareya?"
15Dhabuna Daud, "Abner, ba’na reya gu ta’ oreng se paleng hebat e Isra’il, ta’ iya? Arapa lorana ba’na, guste ratona, me’ ta’ ejaga bi’ ba’na? Gi’ buru reya badha se maso’ ka parkemahanna ratona ba’na mateyana lorana ba’na jareya.
16Ba’na ta’ sanggup ajalannagi kawajibanna, Abner! Demi Allah se odhi’, ba’na kabbi pantessa mate, sabab ba’na ta’ ajaga lorana, rato peleyanna PANGERAN. Kodda’ abas! Badha e dhimma tombagga ratona? Badha e dhimma gendhina se esaba’ e seddi’anna serana gella’?"
17Saul ngagali ka sowarana Daud, laju mareksane, "Daud, se acaca jareya ba’na, ya, na’?" Saodda Daud, "Dalem, guste."
18Saellana jareya Daud laju adhabu pole, "Aponapa junandalem me’ gi’ ser-nyerser abdidalem? Ponapa kasala’an abdidalem?
19Guste, ngereng peyarsa’agi ator abdidalem ka’dhinto. Ja’ sakenga PANGERAN se makon junandalem ngamoso abdidalem, dukana ka abdidalem masthe terep manabi eatore kurban. Namong manabi se makon junandalem ka’dhinto manossa, moga-moga reng-oreng gapaneka ebastowa sareng PANGERAN! Sabab lantaran lalakonna reng-oreng gapaneka, abdidalem eojuk dhari tana kaagunganna PANGERAN sareng tapaksa kodu entar ka nagara laen; ban e nagara laen ka’dhinto abdidalem kodu abakte ka ba-dibana oreng manca.
20Abdidalem ja’ dinggal mate e nagara manca, jau dhari PANGERAN. Ponapa gunana rato Isra’il meyos ka ka’dhinto namong mateyana koto akadi abdidalem ka’dhinto? Ponapa gunana rato aburu abdidalem akadi oreng aburu ajam alas?"
21Saodda Saul, "Sengko’ sala. Mara abali Daud, ba’na tang ana! Sengko’ ta’ alakowa juba’ pole ka ba’na sabab bi’ ba’na sengko’ eehlassagi odhi’ malemma. Sengko’ budhu onggu. Sengko’ la ce’ kalerona onggu!"
22Tape Daud nyaot, "Ka’dhinto tombakkepon junandalem. Ngereng pakon ka ka’dhinto sala settong dhari parjuridda junandalem pakon mondhut tombak ka’dhinto.
23PANGERAN badhi aberkadi sadajana oreng se esto sareng jujur. Sabab sanare e are mangken PANGERAN massra’agi junandalem ka abdidalem, namong abdidalem ta’ poron alako jahat ka junandalem, rato peleyannepon PANGERAN.
24Daddi, akadi junandalem se are mangken sareng abdidalem eehlassagi odhi’, sapaneka jugan moga-moga abdidalem elindhungana sareng PANGERAN, sareng epalopoda dhari sadajana babaja!"
25Dhabuna Saul ka Daud, "Pangeran aberkadi ba’na, na’! Ba’na bakal ahasela e dhalem sabarang se elakone!" Daud laju nerrossagi parjalananna, ban Saul laju abali ka kalenggiyanna.