Dual Panel1Saellana Petthe Parjanjiyanna Allah gella’ erampas bi’ oreng Filistin pas egiba dhari Eben-Haezer ka kotthana oreng Filistin, iya areya kottha Asdod.
2E jadhiya petthe gella’ epamaso’ ka dhalem kowella dibana bangsa Filistin se anyama Dagon, pas esaba’ e seddi’na arcana diba jareya.
3Kalagguwanna gu-laggu e bakto oreng Asdod entar ka kowel gella’, arcana Dagon etemmo robbu tajarungngep ka tana, e adha’na Petthe Parjanjiyanna PANGERAN. Bi’ reng-oreng jareya arca buru epajaga pas epabali ka kennengnganna.
4Tape kalagguwanna gu-laggu, arca jareya etemmo robbu pole e adha’na Petthe Parjanjiyan gella’. Se robbu kadhukaleyanna jareya cethak ban lengngenna dhukalaja potong, ngalathak e seddi’na labang; pera’ badanna se gi’ bungkol.
5(Jareya sababba, arapa sampe’ sateya para imamma diba Dagonbariya keya sakabbinna oreng se nyemba ka Dagon jareya, mon maso’a ka dhalem kowella, labangnga kowella elengkae, ta’ edidda’.)
6Saellana jareya oreng Asdod ban oreng e sabingkerra kottha jareya eokom bi’ PANGERAN; badanna kalowar bu-tombu.
7E bakto reng-oreng jareya nangale’e kabadha’an se kantha jareya, pas padha ngoca’, "Sengko’ ban ba’na kabbi sarta diba Dagon reya eokom bi’ Allahna Isra’il. Daddi mara Petthe Parjanjiyan jareya duli panyengga dhari dhinna’."
8Daddi reng-oreng jareya makompol to-rato Filistin se kalema bannya’na, pas atanya, "Petthe Parjanjiyanna Allahna Isra’il ka’dhinto epakadiya ponapa?" Saodda to-rato jareya, "Alle ka kottha Gat." Daddi, Petthe jareya ealle ka Gat, settong kottha laenna e nagara Filistin.
9Tape sanapa’na Petthe jareya ka jadhiya, kottha jareya eokom keya bi’ PANGERAN, sampe’ e jadhiya ce’ baridhuna. Oreng jadhiya kabbi epakenneng bu-tombu sabalattrana badanna.
10Petthe Parjanjiyan jareya pas ealle pole ka Ekron, settong kottha laenna pole e Filistin. Sanapa’na Petthe Parjanjiyan jareya ka jadhiya, pandhudhu’na acerreng, oca’na, "Petthe Parjanjiyanna Allahna Isra’il jareya egiba dha’ enna’ epamateyana oreng dhinna’ kabbi."
11Daddi bi’ reng-oreng jareya sakabbinna rato Filistin epakompol. Reng-oreng Ekron jareya pas ngoca’, "Ngereng Petthe Parjanjiyanna Allahna Isra’il ka’dhinto pabali ka kennengngannepon se asal, sopaja junandalem sareng abdidalem sabala ta’ epamate sadaja." Sakottha jareya oreng baridhu kabbi sabab bi’ Allah padha eokom ce’ berra’na.
12Reng-oreng se ta’ mate, ekenneng panyaket bu-tombu, sampe’ reng-oreng kottha jareya reng-cerrengan menta tolong ka ba-dibana.