Dual Panel1Ta’ saapa abidda dhari jareya Nahas rato Amon seda, pas egante Hanun, pottrana.
2Rato Daud adhabu, "Nahas reya tang kanca se esto, daddi sengko’ kodu kantha jareya keya ka Hanun, ana’na." Daddi Daud ngerem otosan ka nagara Amon alepora Hanun polana se kaseda’an ramana. Sanapa’na reng-oreng otosan jareya ka Amon,
3para pamimpinna nagara jareya mator ka Rato Hanun, "Junandalem ja’ ngera Daud ngerem otosan ka’dhinto lantaran ahormadi ramaepon junandalem! Otosan ka’dhinto ekerem ka ka’dhinto menangka ta-mata se nalektegana kabadha’annepon nagarana junandalem, sopaja ekennenga rampas!"
4Otosanna Daud jareya bi’ Hanun etangkep, janggu’na ecokor, kalambina eketthok sampe’ kare gan bangkongnga, pas etondhung epakon mole.
5Tape reng-oreng jareya todhus se moleya, daddi laju entar ka Yerikho. E bakto Daud meyarsa bab jareya, laju apessennan makon reng-oreng otosan jareya paggun neng e Yerikho gallu sampe’ janggu’na tombu pole.
6Saellana jareya Rato Hanun ban reng-oreng Amon apangrasa ja’ kadaddiyan gella’ andaddiyagi Daud ngamoso bangsa Amon. Daddi bangsa Amon laju ngeremmagi salaka tello polo empa’ ebu kilo ka Mesopotamia Attas, sarta ka Ma’akha ban Zoba e Siria, epanyewa kareta perrang tello polo dhuwa’ ebu meggi’, ban tantara jaran. Tantarana rato Ma’akha ban ta-kareta perrang sewa’anna dhateng, laju akemah e seddi’na Medeba. Oreng Amon padha dhateng keya dhari tha-kotthana, asadhiya se aperranga.
7(19:6)
8E bakto meyarsa bab jareya, Daud laju makon Yowab ban angkadan perrangnga sopaja padha’a maju alaban ka moso.
9Oreng Amon kalowar ngator barisanna e adha’na labang saketheng Raba, ibu kotthana, dineng to-rato se dhateng nolongana padha ngator barisanna e lowar kottha.
10Yowab ngoladi ja’ salerana la ekeppong moso dhari adha’ ban dhari budhi, daddi laju mele tantara Isra’il se paleng bagus, esaba’ epadhep-adhebban ban tantara Siria.
11Tantara Isra’il laenna epassra’agi ka Abisai ale’na, se ngator barisanna epadhep-adhebban ban tantara Amon.
12Yowab adhabu ka ale’na, "Mon sengko’ la ta’ kellar pole ngadhebbi tantara Siria, duli banto sengko’. Sabaligga, mon ba’na la ta’ kowat ngadhebbi tantarana Amon, sengko’ nyanderra nolongana ba’na.
13Pakowat atena! Mara pabangal aperrang abillai bangsana ban tha-kotthana Allahna. Moga-moga PANGERAN alampa’agiya apa se daddi kasokanna."
14Yowab ban pasukanna maju nyerrang mosona, sampe’ tantara Siria buru.
15E bakto nangale’e tantara Siria buru, oreng Amon laju buru keya dhari Abisai, nyorot ka dhalem kottha. Saellana aperrang ban oreng Amon jareya, Yowab gubar ka Yerusalim.
16Oreng Siria apangrasa ja’ aba’na la epakala bi’ oreng Isra’il. Daddi tantarana se badha e dhaera e temorra Songay Efrat eolok esoro aperrang, epimpin Sobakh panglimana angkadan perrangnga Hadadezer rato Zoba.
17Meyarsa parkara jareya, Daud makompol sakabbinna pasukan Isra’il, pas alengka Songay Yordan ban ngator barisanna epadhep-adhebban ban oreng Siria. Tantara Isra’il ban Siria jareya laju aperrang;
18tantara Siria epakala bi’ Isra’il sampe’ padha nyorot. Daud ban pasukanna matebas kusirra kareta perrang pettong ebu oreng, ban tantara se ajalan soko pa’ polo ebu oreng. Sobakh, panglimana Siria jareya epate’e keya.
19E bakto to-rato se ekobasae Hadadezer ngoladi ja’ tantara Isra’il mennang, laju padha nyo’on adamai ka Daud, ban atellok ka salerana. Saellana jareya oreng Siria ta’ endha’ pole nolonge oreng Amon.