Dual Panel1Ta’ saapa abidda saellana jareya Nahas rato Amon seda, pas egante Hanun pottrana.
2Dhabuna Rato Daud, "Nahas reya tang kanca se esto. Daddi sengko’ kodu akanca keya ban Hanun ana’na." Daddi Daud ngerem otosan ka nagara Amon alepora Hanun polana ramana seda.
3Sanapa’na para otosan jareya ka Amon, para pamimpinna nagara jareya mator ka Rato Hanun, "Junandalem ja’ nyangka Daud ka’dhissa’ ngerem otosan polana ahormadana ramaepon junandalem, guste! Para otosan ka’dhissa’ ekerem ka ka’dhinto menangka ta-mata se nalektegana nagara ka’dhinto, sopaja bisa’a erebbu’."
4Para otosan jareya bi’ Hanun pas etangkep, janggu’na ecokor salaja, kalambina eketthok gan bangkongnga, pas esoro ondur.
5Tape reng-oreng jareya todhus se moleya ka nagarana. E bakto Daud meyarsa parkara jareya laju apessennan sopaja para otosan jareya enneng e Yerikho sampe’ janggu’na tombu pole.
6Saellana jareya oreng Amon apangrasa ja’ lalakonna gella’ daddi lantaranna bangsana ekamoso bi’ Daud. Daddi oreng Amon laju nyewa dhu polo ebu oreng parjurit Siria se enneng e Bet-Rehob ban Zoba, bariya keya dhubellas ebu oreng parjurit dhari Tob, sarta ratona nagara Ma’akha ban ra’yadda saebu oreng.
7E bakto meyarsa kabar jareya, Daud makon Yowab ban angkadan perrangnga maju ngadhebbi moso.
8Oreng Amon kalowar, ngator barisanna e adha’na labang sakethengnga Raba ibu kotthana nagarana, dineng oreng Siria, oreng Tob ban Ma’akha ngator barisanna e talon.
9Yowab ngoladi ja’ bangsana ekeppong bi’ moso dhari adha’ ban dhari budhi. Daddi laju mele tantara Isra’il se paleng bagus pas eator epadhep-adhebban ban tantara Siria.
10Lebbina tantara Isra’il epassra’agi ka Abisai ale’na, se ngator barisanna epadhep-adhebban ban tantara Amon.
11Dhabuna Yowab ka ale’na, "Mon sengko’ la ta’ kellar pole ngadhebbi tantara Siria, duli tolonge, ya; sabaligga, mon ba’na la ta’ kowat nahan tantara Amon, sengko’ duli nolongana.
12Pakowat atena ba’na! Mara aperrang pabangal kaangguy bangsana ba’na ban sengko’, kaangguy tha-kotthana Guste Allah. Moga-moga PANGERAN alampa’agiya apa se daddi kasokanna."
13Yowab ban pasukanna maju nyerrang, sampe’ tantara Siria buru.
14E bakto nangale’e tantara Siria buru, tantara Amon buru keya dhari Abisai, laju nyorot ka dhalem kottha. Saellana merrange oreng Amon, Yowab gubar ka Yerusalim.
15Oreng Siria apangrasa ja’ bangsana la epakala oreng Isra’il, daddi pasukanna pas epakompol pole.
16Rato Hadadezer laju makon ngolok oreng Siria se badha e temorra Songay Efrat, oreng Siria jareya dhateng ka Helam epimpin Sobakh, panglimana tantarana Rato Hadadezer dhari Zoba.
17Meyarsa parkara jareya, Daud duli makompol sakabbinna tantara Isra’il, pas alengka Songay Yordan, terros maju ka Helam. E jadhiya oreng Siria ngator barisanna, pas maju nyerrang pasukanna Daud.
18Tape tantara Isra’il mennang sampe’ tantara Siria nyorot. Daud ban pasukanna mate’e pettong atos oreng kusirra kareta perrang ban pa’ polo ebu oreng tantara jaran; laen dhari jareya Sobakh, panglimana tantarana moso loka berra’ sampe’ seda e medan paperrangan.
19E bakto to-rato se ekobasae Hadadezer nangale’e ja’ bangsana la epakala bi’ Isra’il, pas padha menta sopaja adhame ban atellok ka oreng Isra’il. Molae dhari bakto jareya Siria ta’ bangal pole abanto oreng Amon.