Alkitab Mobile SABDA
[VER] : [MADURA]     [PL]  [PB] 
 <<  2 Samuel 12 >> 

1PANGERAN ngotos Natan ka Daud. Natan ngadhep ka Daud, pas mator, "Badha oreng kadhuwa se akompol e settong kottha; se settong sogi, settongngepon mesken.

2Se sogi gadhuwan ebin sareng dumba ce’ bannya’na,

3dineng se mesken namong gadhuwan budhu’na dumba settong, ollena ngobange. Budhu’na dumba gapaneka epeyara kantos raja e compo’na epapolong sareng na’-ana’epon. Budhu’epon dumba gapaneka eteddhai teddha’anna oreng gapaneka, la’-mala’ eenome epangangguy cangkerrepon, sareng epatedhung e reba’annepon. Pandha’epon, dumba ka’dhinto epapadha sareng ana’ bine’na dibi’.

4E settong are oreng se sogi katamoyan. Oreng sogi gapaneka ta’ poron nyambelli dumba otaba sapeepon dibi’ se ebadhiya ka’-angka’ ka tamoyya; daddi pas ngala’ dumbana oreng se mesken ka’dhissa’, pas esambelli, terros eola ebadhi ka’-angka’ ka tamoyya."

5Daud ce’ dukana meyarsa parkara tengkana oreng se sogi jareya, pas adhabu, "Oreng jareya ce’ kejjemma! Demi PANGERAN se odhi’, oreng jareya masthe agante’e budhu’na dumba jareya pa’ kalena se ekala’ ban kodu eokom mate."

6(12:5)

7"Oreng gapaneka junandalem dibi’," atorra Natan ka Daud. "Ka’dhinto dhabuna PANGERAN Allahna Isra’il, ‘Bi’ Sengko’ ba’na la epadaddi rato Isra’il ban etolong epasalamet dhari Saul.

8Karaja’anna Saul ban binena kabbi bi’ Sengko’ la ebagi ka ba’na; la’-mala’ bi’ Sengko’ ba’na epadaddi rato Isra’il ban Yehuda. Saompamana jareya gi’ ta’ cokop, tanto bi’ Sengko’ ba’na etambai sajareya’an aggi’.

9Daddi arapa ba’na me’ ta’ atoro’ ka Tang parenta? Arapa ba’na me’ atengka jahat kantha jareya? Ba’na nyoro mate’e Uriya e dhalem perrang; bi’ ba’na Uriya epanneng epate’e oreng Amon, binena ban ba’na ekala’!

10Sarrena ba’na ta’ atoro’ ka Tang parenta sarta ngala’ binena Uriya, e dhalem saneyap toronanna ba’na masthe badha se mate epate’e oreng.

11Sengko’ asompa’a bakal madhatengnga balai ka ba’na se asalla dhari balana ba’na dibi’. Binena ba’na bi’ Sengko’ ekala’a kabbi e adha’na matana ba’na dibi’, ebagiya ka lalake’ laen se bakal tedhunga apolong ban binena ba’na jareya kabbi e tera’na are.

12Ba’na agabay dusa tek-ngetek, tape apa se ekoca’agi Sengko’ gi’ buru reya ejalannagiya rang-terrangan e adha’na reng-oreng Isra’il kabbi.’"

13"Kaula ampon dusa ka PANGERAN," dhabuna Daud. Dhabuna Natan, "Sareng PANGERAN dusaepon junandalem ampon esapora; daddi junandalem ta’ kera seda.

14Namong sarrena junandalem ampon ya-nyeya PANGERAN kalaban ngalakone dusa ka’dhinto, pottraepon junandalem se buru lahir bakal adinggala omor."

15Saellana jareya Natan gubar ka compo’na. Kalaban karsana PANGERAN pottrana Daud se dhari Batsyeba randhana Uriya, songkan

16Daud nyo’on ka Pangeran sopaja pottrana barasa. Daud aseyam, sarta sabban malem asaren e palesteranna kamarra samalem benteng.

17Bi’ para kaom oreng agung karaton Daud ecacae eajak ngadek, tape Daud ta’ kasokan sarta’anna ta’ kasokan adha’ar pa-apa ban reng-oreng jareya.

18Samenggu saellana jareya pottrana seda, para abdina tako’ se ngatorana oneng parkara jareya ka Daud. Ca’na reng-oreng jareya, "E bakto kana’ jareya gi’ odhi’, rato ta’ kasokan meyarsa’agi mon ba’na bi’ sengko’ tor-mator. Baramma sateya sengko’ se abala’a ja’ pottrana jareya adinggal omor? Dhaggi’ rato pas nekat aradda’!"

19E bakto ngoladi para abdina karaton jareya ato’koto’, Daud pas ngarte ja’ pottrana la seda. Daddi pas mareksane ka reng-oreng jareya, "Tang ana’ la mate, ya?" "Ampon, guste," ca’na reng-oreng jareya.

20Daud pas ngadek dhari palesteran, aseram, asoroy sarta asalen busanana. Samarena jareya pas meyos ka Padalemman Socce abakte ka PANGERAN. Saellana abali ka karaton Daud pas makon abdina maranta dha’ar, mare eparanta Daud pas laju adha’ar.

21Nangale’e kabadha’an se cara jareya, para abdina atanya, "Abdidalem ta’ ngarte, guste. E bakto pottrana ka’dhissa’ gi’ odhi’, junandalem aseyam sareng molar terros; namong saamponna pottraepon junandalem adinggal dunnya, junandalem pas abungo sarta adha’ar!"

22"Iya," saodda Daud, "sengko’ pajat apowasa ban nanges e baktona tang ana’ gi’ odhi’ sabab ca’na tang pekker: me’ pola PANGERAN bellas ka sengko’ ban tang ana’ epaodhi’.

23Tape sateya, tang ana’ jareya la mate, arapa’a sengko’ me’ gi’ apowasa’a? Sengko’ ta’ kera ngenneng maodhi’ tang ana’ pole. E settong bakto sengko’ entara ka kennengnganna tang ana’ jareya, tape tang ana’ dibi’ ta’ kera ngenneng abali ka sengko’."

24Saellana jareya Daud alepor panggaliyanna Batsyeba rajina. Se kadhuwa jareya pas apolong asaren. Batsyeba pas babar lalake’, bi’ Daud pottrana jareya enyamae Sulaiman. PANGERAN taresna ka kana’ jareya,

25sarta makon Nabbi Natan anyamae kana’ jareya Yedija, sabab PANGERAN taresna ka kana’ jareya.

26Sabatara jareya Yowab gi’ aperrang ban Raba ibu kotthana nagara Amon, ban la para’ ngennenga arebbu’ kottha jareya.

27Yowab laju ngerem otosan ka Daud ngatore oneng kantha reya, "Abdidalem nyerrang Raba, sarengngan ampon ngobasane parsadhiya’annepon aengnga.

28Samangken, ngereng junandalem makompol karena tantara se gi’ badha, saamponna junandalem pas mimpin tantara gapaneka bakta nyerrang sareng matellok kottha ka’dhinto. Kalaban cara se kadi ka’dhinto e bingkeng are ta’ kera badha oreng se ngoca’ ja’ abdidalem se arebbu’ kottha ka’dhinto."

29Daud laju makompol sakabbinna tantarana pas meyos ka Raba, kottha jareya eserrang ban epakala.

30Jamang e serana ratona epondhut, laju eagem epasang ka serana dibi’. Jamang jareya berra’na ra-kera tello polo lema’ kilo ataretes mamatan se bagus. Daud abakta keya barang rampasan sabannya’na dhari kottha jareya.

31Laen dhari jareya pandhudhu’na egiring, epangeba gargaji, landhu’ besse ban kapak besse; reng-oreng jareya epalako e kennengnganna oreng agabay bata. Reng-oreng e tha-kottha laenna e Amon epakantha jareya keya. Saellana jareya Daud ban tantarana laju abali kabbi ka Yerusalim.


  Share Facebook  |  Share Twitter

 <<  2 Samuel 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel