Dual Panel1Saellana jareya Absalom nyadhiya’agi kareta perrang ban ran-jaranna sarta pangereng se bannya’na saeket oreng kaangguy salerana dibi’.
2Sabban are Absalom abungo gu-laggu pas ngadek e penggir lorong e seddi’anna labang sakethengnga karaton. Sabban badha oreng entara aparkara ka rato, bi’ Absalom edikane pas epareksane, dhabuna, "Ba’na oreng dhimma?" Ban mon oreng jareya nyaot, ‘Dhari suku reya otaba suku rowa,’
3Absalom pas adhabu, "Menorot hokomma ba’na bendher, tape emanna tadha’ bakkella rato se endha’ ngedhingngagi parkarana ba’na."
4Saellana jareya Absalom pas adhabu pole, "Kodda’ ja’ sakenga sengko’ daddi hakim, tanto oreng se andhi’ parkara bisa entar ka sengko’ kabbi ban sengko’ tanto eoros epaadil."
5Mon badha oreng se nyander asojuda ka Absalom, oreng jareya pas egellu’ ban eseyom.
6Daddi kantha jareya carana Absalom ngadhebbi reng-oreng Isra’il se aparkara’a ka rato, ban tanto bai Absalom ahasel ngala’ atena oreng Isra’il.
7Saellana lebat pa’ taon, Absalom mator ka Rato Daud, "Rama, kaula nyo’ona edi entara ka Hebron parlo ngessa’agiya neyat kaula ka PANGERAN.
8Sabab e bakto kaula gi’ badha e Gesur e Siria, kaula aneyat entara abakte ka PANGERAN e Hebron manabi kaula eedine abali ka Yerusalim."
9Saodda rato, "Iya kassa’ kat-mangkat, mandar salamedda." Absalom pas mangkat ka Hebron.
10Tape sabellunna jareya Absalom la makon reng-oreng eotos ka sakabbinna suku Isra’il epessenne kantha reya, "Mon ba’na kabbi ngedhing monyena tarompet, kabbi pada aera’ kantha reya, ‘Absalom la daddi rato e Hebron!’"
11Dhari Yerusalim badha oreng dhu ratos se ngerengngagi Absalom ka Hebron. Reng-oreng jareya ta’ tao parkara komplodan jareya, daddi kabbi padha noro’, ta’ andhi’ parsangka’an pa-apa.
12Sabatara ngatorragi kurban Absalom ngotos oreng ka kottha Gilo epakon adikane Ahitofel, iya areya sala settong dhari panasehadda Rato Daud. Daddi komplodan se magaggara rato jareya sajan kowat, sarta sajan bannya’ reng-orengnga se noro’ Absalom.
13Saellana jareya pas badha oreng ngabarragi ka Daud sambi mator kantha reya, "Reng-oreng Isra’il ampon ngereng Absalom."
14Daud pas adhabu ka ba-ponggabana se badha e Yerusalim, "Mara ja’ ngongseya bai. Pera’ jareya jalanna mon terro buruwa dhari Absalom. Sakejja’ aggi’ tanto Absalom dhateng. Mara duliyan, ja’ sampe’ sengko’ ban ba’na ekenneng serser pas epakala sarta pandhudhu’ kottha reya epate’e!"
15"Sae, guste," ca’na reng-oreng jareya; "ngereng kasokan."
16Rato pas mangkat eerengngagi kalowargana ban ba-ponggabana, se ta’ noro’ pera’ sellerra se bannya’na sapolo oreng, se edina epanoguwi karaton.
17E bakto rato meyos dhari kottha jareya ban sakabbinna pangerengnga, kabbi padha ambu e seddi’anna bengko se dhi-budhi kadibi’.
18Ponggabana rato padha manjeng kabbi e seddi’anna e bakto pasukanna abaris lebat e ajunanna. Bariya keya tantarana se nem atos oreng bannya’na se noro’ dhari Gat, abaris lebat e ajunanna.
19E bakto ngoladi jareya rato adhabu ka Itai pamimpinna tantara se nem atos oreng jareya, "Arapa ba’na me’ noro’ sengko’? Lebbi becce’ kassa’ abali noro’ rato se anyar. Neng e dhinna’ ba’na daddi oreng manca, ngongse jau dhari nagarana dibi’.
20Ba’na gi’ ta’ abit neng e dhinna’, daddi arapa’a ba’na me’ esorowa alalana abareng sengko’? Sengko’ dibi’ gi’ ta’ tao dha’ emma’a sengko’ reya. Kassa’ abali, ajak ca-kanca sabangsana, moga-moga PANGERAN eparengngana bellas ban esto ka ba’na."
21Tape Itai nyaot, "Guste Se Molja, bit asmana PANGERAN se odhi’ sareng bit nyabaepon junandalem, abdidalem terrosa ngereng junandalem ka ka’imma’a saos, sanare abdidalem kodu mate."
22"Iya mara," dhabuna Daud. "Mara ajalan terros!" Daddi Itai ajalan terros bi’ sakabbinna pasukanna sarta ana’ binena bang-sebang.
23Ra’yat padha nanges epakaja kabbi e bakto pasukanna Daud mangkat dhari kottha jareya. Saellana jareya rato alengka cangkana Songay Kidron eerengngagi sakabbinna pasukanna, pas terros nojju ka ra-ara.
24Imam Zadok ban Imam Abyatar badha e jadhiya abareng ban sakabbinna oreng Lewi se ngeba Petthe Parjanjiyanna Pangeran. Petthe Parjanjiyan jareya esaba’ ban ta’ eosong pole sampe’ ra’yat la kalowar kabbi dhari kottha jareya.
25Rato adhabu ka Zadok, "Kassa’ Petthe Parjanjiyan jareya pabali ka kottha. Mon PANGERAN kasokan ka sengko’, tanto sengko’ eedine abali pole sarta nangale’e pole Petthe Parjanjiyan sarta kennengnganna petthe jareya.
26Tape mon PANGERAN ta’ kasokan ka sengko’, kasokanna PANGERAN epabaramma’a bai sengko’ reya."
27Samarena jareya rato pas adhabu pole ka Zadok, "Kassa’ ajak ana’na ba’na se anyama Ahima’as ban Yonatan ana’na Abyatar; kassa’ abali ka kottha, moga-moga ba’na ta’ nemmowa alangan pa-apa e jalan.
28Sengko’ anante’a e pan-barampan kennengnganna oreng alengka songay e ra-ara anante’a kabar dhari ba’na."
29Zadok ban Abyatar pas ngeba abali Petthe Parjanjiyan jareya ka Yerusalim sarta pas terros enneng e jadhiya.
30Saellana jareya Daud mokka’ sapatuna, pas alomampa ban sakabbinna pangerengnga ongga ka Gumo’ Jaitun sambi molar; serana edhung-kodhunge menangka tandha sossa. Pangerengnga padha nanges ban adhung-kodhung keya.
31E bakto meyarsa kabar ja’ Ahitofel noro’ ka komplodanna Absalom keya, Daud adu’a sambi adhabu kantha reya, "Adhu, GUSTE, nyo’ona tolong sopaja petoduepon Ahitofel ta’ kalakona!"
32Sanapa’na ka konco’na gumo’ gella’ se biyasana ekennengnge oreng ajalannagi kabakteyan ka Pangeran, Daud eamba’ bi’ kancana se esto, iya areya Husai oreng Arki. Kalambina Husai beddha, cethagga etaburi abu.
33Ca’na Daud ka oreng jareya, "Mon ba’na noro’ sengko’, ba’na maberra’ ka sengko’.
34Tape ba’na bisa nolonge sengko’, mon ba’na abali ka kottha sarta ngoca’ ka Absalom ja’ ba’na aladinana Absalom epapadha’a estona ban se aladine ramana. Kalaban cara se kantha jareya ba’na bisa mabuddhu petoduna Ahitofel.
35Imam Zadok ban Abyatar badha e jadhiya keya. Kabala ka oreng se kadhuwa jareya pa-apa se ekaedhing ba’na e karaton.
36Ahima’as ana’na Zadok ban Yonatan ana’na Abyatar badha e jadhiya keya, pada noro’ eppa’na. Kana’ se kadhuwa jareya soro entar ka sengko’, soro manapa’ apa’a bai kabar se ekaedhing ba’na."
37Daddi Husai kancana Daud jareya abali ka Yerusalim, teppa’ bakto Absalom buru napa’ ka jadhiya.