Dual Panel1E bakto pamarenta’anna Daud badha laep raja se abidda sampe’ tello taon benteng. Daud nyo’on petodu ka PANGERAN e dhalem parkara jareya, ban PANGERAN adhabu, "Laep reya lantaran kasala’anna Saul sabalana, polana mate’e reng-oreng Gibeyon."
2(Reng-oreng Gibeyon reya banne oreng Isra’il; tape tamaso’ bagiyanna oreng Amori se pera’ sakone’. Reng-oreng Isra’il la ajanji alindhungana reng-oreng jareya, tape Saul aehteyar mamosna’a reng-oreng jareya polana mekkere kapentinganna oreng Isra’il ban Yehuda.) Daud pas adikane reng-oreng Gibeyon jareya
3laju mareksane kantha reya, "Partolongan apa se earep ba’na dhari sengko’? Sengko’ terro nebbusa kasala’anna reng-oreng ka ba’na, sopaja ba’na aberkadana ommadda PANGERAN."
4Saodda reng-oreng jareya, "Parkarana oreng Gibeyon sareng Saul sabalana ta’ kengeng epalastare kalaban salaka otaba emmas, namong oreng Gibeyon ta’ terro mateyana bangsa Isra’il sanare namong kasorang." Daud laju adhabu, "Mon kantha jareya, apa se earep ba’na dhari sengko’?"
5Saodda reng-oreng jareya, "Saul rato peleyannepon Pangeran terro mateyana sadajana oreng Gibeyon sopaja oreng Gibeyon mosna’a dhari Isra’il.
6Daddi, ngereng passra’agi toronanna Saul se lalake’ kapetto, sareng oreng Gibeyon egantonga e ajunanna PANGERAN e Gibeya, kotthaepon Rato Saul dibi’." Saodda rato, "Iya mara, bi’ sengko’ reng-oreng jareya epassra’agiya."
7Tape sarrena Daud ban Yonatan la padha saleng asompa, daddi Daud ta’ ngenneng massra’agi Mefiboset pottrana Yonatan.
8Se epondhut bi’ Daud iya areya Armoni ban Mefiboset, iya areya pottrana Saul ollena ban Rizpa ana’na Aya; bariya keya pottrana Merab pottrena Saul, bannya’na kalema ollena Merab ban Adriyel ana’na Barzilai oreng Mehola rowa.
9Reng-oreng jareya epassra’agi ka oreng Gibeyon, se kapetto jareya laju mate abareng egantong e attassa gumo’ e ajunanna PANGERAN bi’ reng-oreng Gibeyon. Okoman mate jareya ejalannagi e aherra mosem semme, e bakto oreng molae anye jaba.
10Rizpa, sellerra Saul laju ngampar kaen karong kaangguy aba’na dibi’ e attassa bato kennengnganna yit-mayyit se ajalamperran jareya. Rizpa ta’ aginjeggan dhari jadhiya molae dhari parmola’anna mosem anye sampe’ toronna ojan e mosem ronto. E baja seyang Rizpa ajaga sopaja yit-mayyit jareya ta’ ele’-ole’ no’-mano’ ban e bakto malem ta’ ele’-ole’ burun alas galak.
11E bakto eatore oneng parkara se elakone Rizpa jareya,
12Daud laju meyos mondhut lang-tolangnga Saul ban Yonatan dhari reng-oreng kottha Yabes e Gileyad. (Reng-oreng jareya ngeco’ lang-tolang jareya dhari lon-alon kottha e Bet-Seyan, kennengnganna oreng Filistin agantong yit-mayyit jareya saellana makala Saul e Gumo’ Gilboa.)
13Lang-tolangnga Saul ban Yonatan jareya egiba dhari jadhiya, saellana jareya lang-tolangnga oreng se kapetto se egantong rowa epakompol keya.
14Samarena jareya lang-tolangnga Saul ban Yonatan sarta oreng se kapetto gella’ ebendhem e koburanna Kis ramana Saul e Zela e dhaera Benyamin. Saellana kabbi padha mare elakone menorot papakonna rato, Allah ngabbullagi du’ana reng-oreng jareya kaangguy nagarana.
15Badha perrang pole e antarana oreng Filistin ban oreng Isra’il. Daud ban reng-orengnga mangkat aperrang ngadhebbi oreng Filistin. E dhalem paperrangan jareya Daud lesso.
16Pas badha buta se anyama Yisbi-Benob. Tombagga dhari paronggu, berra’na ra-kera tello’ satengnga kilo. Sarta’anna nyandhang peddhang se anyar, ban atena arassa yakin tanto bisa mate’e Daud.
17Tape Abisai ana’na Zeruya dhateng nolonge Daud. Buta jareya eserrang terros epate’e. Saellana jareya reng-orengnga Daud nyo’on sopaja Daud ajanji ta’ meyosa aperrang pole. "Junandalem pangarebbanna Isra’il, guste, ja’ kantos Isra’il kaelangan junandalem," ca’na reng-oreng jareya.
18Pas badha pole perrang ban oreng Filistin e Gob. E dhalem perrang jareya Sibkhai oreng Husa mate’e buta se anyama Saf.
19E dhalem perrang laenna ban oreng Filistin e Gob, Elhanan ana’na Ya’ir dhari Betlehem mate’e Goliyat dhari Gat. Gagangnga tombagga Goliyat jareya rajana padha ban kajuna pakakas tennon.
20Pas badha perrang pole ban oreng Filistin e Gat. E jadhiya badha buta se ce’ leburra aperrang. Garigi’na tanang ban sokona bannya’na nem-ennem.
21Buta jareya bi-nyebbi oreng Isra’il, daddi laju epate’e bi’ Yonatan ana’na Simeya, kaka’na Daud.
22Moso se kaempa se epate’e Daud ban pasukanna jareya toronanna buta e Gat.