Dual Panel1Saellana epasalamet bi’ PANGERAN dhari Saul ban so-mosona se laen, Daud anyanye moji PANGERAN kantha reya:
2Abdidalem taresna ka Junandalem, GUSTE, Junandalem kakowadan abdidalem.
3Pangeran reya binteng se ce’ kowadda kennengnganna sengko’ nyare pangaoban. Tang Allah padha ban gunong bato, se anaonge sengko’. Akantha tameng se notobi sengko’ saterrossa, sopaja sengko’ aman salanjangnga.
4Sengko’ aserro ka PANGERAN se patot epoji, PANGERAN malopot sengko’ dhari moso kabbi.
5Sengko’ ekeppong babaja pate, tasellem e dhalem banjir se madhateng maot.
6Sengko’ ekeppong babaja maot, barajak pate anganga e adha’na tang soko.
7E dhalem kasossa’an sengko’ aserro ka PANGERAN, aserro ka Allah nyo’on partolongan. Dhari Padalemman Socce meyarsa tang sowara, ban agateyagi tang parnyo’onan.
8Bume agundhek agaledder, dhasarra gunong mariya keya lantaran Allah talebat dukana!
9Okos bul-ngebbul dhari lobangnga pangambungnga, apoy ban mardha kalowar dhari padha’aranna.
10Langnge’ eseba’ madhuwa, Salerana pas toron ka baba, ondhem petteng e babana padana.
11Salerana ngabber netene kerub; ngabang e attassa kalembangnga angen.
12Salerana abuko’ papetteng; etotobi ondhem se kandel.
13Dhari dhap-keddhap e ajunanna, kalowar ondhem, ojan es ban apoy.
14PANGERAN pas asowara dhari langnge’, Se Mahatenggi sowarana ekaedhing oreng kajana akantha galudhuk.
15PANGERAN ngocol panana ka so-mosona se epasalbut akalarkaran. Dhap-keddhap epadhateng ta’ etemmo kalena sampe’ mosona buru prang-takapprang.
16Dhasarra tase’ tasengkap ban dhasarra bume tabukka’, e bakto PANGERAN duka abentak so-mosona.
17Dhari attas PANGERAN ajuluwagi astana; sengko’ eastane pas etaja’ epakalowar dhari aeng se ce’ dhalemma.
18PANGERAN masalamet sengko’ dhari moso se kowat bariya keya dhari reng-oreng se baji’ ka sengko’ sabab reng-oreng jareya talebat kowat monggu ka sengko’.
19Sengko’ eserrang e bakto nemmo balai, tape PANGERAN nolong tang aba’.
20Sengko’ epalopot dhari babaja, ban eparenge salamet polana sengko’ masenneng Salerana.
21PANGERAN males tang lalakon se teppa’; sengko’ eberkadi polana sengko’ ta’ andhi’ sala.
22Sengko’ ta’at ka dhabuna PANGERAN, ban ta’ mongkore tang Allah.
23Sengko’ agateyagi kom-hokomma, ban ta’ ngenthengngagi kon-papakonna.
24PANGERAN ngagali sengko’ tadha’ calena, ban ajauwi lalakon se sala.
25Daddi PANGERAN males tang lalakon se teppa’ sabab Salerana ngagali sengko’ ta’ andhi’ sala.
26GUSTE, Junandalem ka’dhinto esto ka oreng se esto, sae ka oreng se becce’.
27Ka oreng socce Junandalem anyata’agi ja’ Junandalem socce, namong oreng jahat sareng Junandalem ekamoso.
28Oreng se andhap asor epasalamet, se angko epaapes.
29Junandalem se ngodhi’i colok abdidalem; GUSTE Allah, Pangeran kaula se matera’ jalan abdidalem se petteng.
30Junandalem apareng kakowadan ka abdina kaangguy matompes moso sadajana; kalaban bantowannepon Junandalem, Guste Allah, abdidalem magujur partahananna moso.
31Apa se elampa’agi Allah reya samporna, dhabuna ekenneng parcaja salanjangnga! Allah reya padha ban tameng monggu ka oreng se nyare pangaoban ka Salerana.
32Sabab tadha’ Allah kajabana PANGERAN; pera’ Allah se nolonge sengko’ ban ba’na.
33PANGERAN reya Allah se makowat sengko’ reya, ban se maaman tang jalan.
34PANGERAN se makowat tang soko epakantha sokona manjangan, se ajaga tang kasalameddan e pagunongan.
35Sengko’ eajari aperrang, sampe’ sengko’ bisa menthang gandhiba se paleng kowat.
36GUSTE Pangeran, Junandalem se apareng pangaoban sareng kasalameddan ka abdidalem; Abdidalem epanyandar ka kobasana Junandalem daddi oreng raja lantaran bantowanna Junandalem.
37Sareng Junandalem abdidalem ejaga sopaja ta’ gaggarra ka tanangnga moso, abdidalem ta’ oneng robbu.
38Sareng abdidalem moso eserser pas epakala, abdidalem ta’ oneng nyorot kantos sadajana padha mate tadha’ karena.
39Sareng abdidalem moso ebantengngagi kantos ta’ kengeng jaga pole, padha robbu e soko abdidalem kantos ta’ bisa aguli.
40Abdidalem eparenge kakowadan kaangguy aperrang, e bakto ngadhebbi moso eparenge kamennangan.
41So-moso abdidalem padha buru sadajana polana bantowanna Junandalem; reng-oreng se baji’ ka abdidalem sareng abdidalem epate’e tadha’ karena.
42So-moso abdidalem aera’ nyare bantowan, namong tadha’ se aparenga partolongan; sadaja padha aserro ka PANGERAN, namong Junandalem ta’ apareng jawaban.
43Sareng abdidalem enyek-enyek sadaja epakadi abu se atabuyan; epaobus akadi cellot se esapowe e lorong.
44Junandalem mabebas abdidalem dhari oreng se daraka, sareng epangobasae sa-bangsa; sa-bangsa se dha’-adha’na ta’ ekaonenge abdidalem samangken daddi dunor abdidalem.
45Reng-oreng manca atellok ka abdidalem, sareng atoro’ ka parenta abdidalem.
46Sadaja padha elang kabangalanna, ngetter katako’an kalowar dhari bintengnga.
47PANGERAN reya odhi’! Mara poji se nolong sengko’! Molja’agi kaagunganna Allah panyalamet sengko’.
48Sengko’ epamennang ka tang so-moso, sa-bangsa epatellok e adha’anna sengko’.
49Sengko’ epasalamet dhari tang so-moso. GUSTE, sareng Junandalem abdidalem epamennang ka so-moso abdidalem sadajana, Junandalem ajaga abdidalem e dhalem ngadhebbi reng-oreng se kejjem.
50Daddi abdidalem ngagungngagi Junandalem e antarana sa-bangsa sadajana, abdidalem anyanye amolja’agi Junandalem.
51Allah apareng kamennangan se raja ka ratona, teptep taresna ka oreng peleyanna, iya areya Daud ban toronanna sampe’ saterrossa.