Dual Panel1Rehabeyam meyos ka Sikhem polana ra’yat Isra’il e bagiyan dhaja padha akompol kabbi e jadhiya alanti’a salerana se epajumennengnga rato.
2E bakto jareya Yerobeyam pottrana Nebat gi’ badha e Messer lantaran buru dhari Rato Sulaiman. E bakto meyarsa parkara Rehabeyam, Yerobeyam jareya laju abali ka Isra’il.
3Ra’yat bagiyan dhaja ngatore rabuna Yerobeyam, saellana laju padha ngadhep ka Rehabeyam kabbi. Atorra reng-oreng jareya,
4"Odhi’na abdidalem sadaja epaberra’ sareng Sulaiman, ramaepon junandalem. Manabi junandalem ngorange berra’na odhi’ ka’dhinto sareng ngorange kasangsara’anna abdidalem sadaja, abdidalem sadaja padha estowa daddi ra’yattepon junandalem."
5Saodda Rehabeyam, "Bi’ sengko’ gi’ epekkera gallu. Abali dha’ enna’ tello are aggi’." Reng-oreng jareya laju padha mole.
6Rato Rehabeyam laju nyo’on petodu ka reng-oreng towa se daddi panasehadda Sulaiman, ramana. "Baramma sengko’ se nyaodana reng-oreng jareya?" dhabuna Rehabeyam. "Baramma panemmona ba’na?"
7Saodda reng-oreng jareya, "Manabi junandalem saeya ka ra’yat ka’dhinto sareng terro masennengnga atena, parenge jawaban se sae, tanto reng-oreng gapaneka pas esto ka junandalem salanjangnga."
8Tape petoduna reng-oreng towa jareya ta’ eparduli bi’ Rehabeyam. Sabaligga, salerana laju manggi’i ngangodhadan se dhat-endhit ban salerana, se sateya daddi panasehadda.
9"Baramma panemmona ba’na, nyaoda baramma sengko’ ka ra’yat reya sopaja odhi’na ta’ pateya berra’?"
10Atorra ngangodhadan jareya, "Saena junandalem adhabu kadi ka’dhinto ka reng-oreng gapaneka, ‘Maske sengko’ reya lembe’, sengko’ gi’ akowadan dhari tang rama.
11Bi’ tang rama odhi’na ba’na epaberra’, tape bi’ sengko’ epalebbiya berra’ pole. Bi’ tang rama ba’na esebet ban cometthe, tape bi’ sengko’ ba’na esebedda ban cometthe se adhuri besse!’"
12Saellana olle tello are se anante’, Yerobeyam ban reng-oreng gella’ nyabis pole ka Rato Rehabeyam, menorot se la edhabuwagi rato jareya.
13Sabaligga dhari petoduna reng-oreng se towa rowa, rato laju adhabu epakasar ka ra’yat jareya.
14Noro’ petoduna ngangodhadan gella’, laju adhabu, "Bi’ tang rama odhi’na ba’na epaberra’, tape bi’ sengko’ epalebbiya berra’ pole. Bi’ tang rama ba’na esebet ban cometthe, tape bi’ sengko’ ba’na esebedda ban cometthe se adhuri besse!"
15Parnyo’onanna ra’yat jareya ta’ eparduli. Tape se kantha jareya la pajat kasokanna GUSTE Allah. Apa se la edhabuwagi PANGERAN kalaban parantara’anna Nabbi Ahiya dhari Silo parkara Yerobeyam pottrana Nebat kodu kalakon.
16E bakto ra’yat Isra’il tao ja’ ratona ta’ kasokan meyarsa’agi ka parnyo’onanna, laju padha aera’, "Dhu arapa’a me’ mekkerana Daud ban toronanna! Olle apa ba’na ban sengko’ dhari Daud ban toronanna? Ra’yat Isra’il, mara padha mole! Dina Rehabeyam me’ olle ngoros aba’na dibi’!" Ra’yat Isra’il laju padha mole,
17daddi Rehabeyam pera’ daddi rato e dhaera Yehuda malolo.
18Maske kantha jareya Rato Rehabeyam gi’ makon Adoniram, kapalana reng-oreng se epalako paksa, masabbar ra’yat Isra’il. Tape Adoniram bi’ reng-oreng Isra’il jareya egarujuk bi’ bato sampe’ mate. Rehabeyam dibi’ ngenneng buru, laju duli ongga ka karetana, sarta pas buru ka Yerusalim.
19Molae dhari jareya ra’yat e bagiyan dhajana karaja’an Isra’il ros-terrosan aberonta’ ka to-rato toronanna Daud.