Dual Panel1Saellana Yosafat rato Yehuda, salamet abali ka karatonna e Yerusalim,
2laju badha nabbi se anyama Yehu pottrana Hanani, nyabis ka rato. Atorra nabbi jareya, "Guste, ta’ patot junandalem abanto oreng se jahat sareng nolonge oreng se baji’ ka PANGERAN. PANGERAN duka ka junandalem lantaran gapaneka.
3Sanare saka’dhinto gi’ badha jugan kasaeyanna junandalem. Junandalem ampon manyengla ca-arcana Dewi Asyera se esemba ra’yat, sarengngan pole junandalem ampon aehteyar atoro’ ka kasokanna Allah."
4Rato Yosafat alenggi e Yerusalim. Tape rato jareya seggut alengleng e nagarana manggi’i ra’yadda, ngajak reng-oreng jareya abali ka PANGERAN, Allahna bangatowana.
5E saneyap kottha se ebintenge e Yehuda rato jareya ngangkat kim-hakim
6ban apareng papakon kantha reya, ka kim-hakim jareya, "Ba’na kodu bicaksana, sabab ba’na ahakime banne kalaban nyamana manossa, tape bit asmana PANGERAN. Ba’na eoladi bi’ Pangeran e bakto ba’na motose parkara.
7Ba’na kodu tako’ ka PANGERAN, ban kodu pate-ngate, sabab GUSTE Allahna ba’na baji’ ka oreng se roce, se berra’ salaja e dhalem ngadili otabana se narema go’-sogo’."
8Bariya keya e Yerusalim, Yosafat ngangkat kim-hakim dhari kalangan reng-oreng Lewi, mam-imam ban pin-pamimpinna ra’yat. Kim-hakim jareya kodu motose ra-parkara se kasambung ban Hokomma PANGERAN sarta ra-parkara laenna.
9Ka kim-hakim jareya Yosafat apareng papakon kantha reya, "Jalannagi lalakonna ba’na kalaban ate tako’ ka PANGERAN. Toro’ papakonna e dhalem apa’a bai se elakone ba’na.
10Mon badha ca-kancana ba’na dhari kottha laen ngeba ka ba’na parkara oreng se mate’e oreng laen, oreng se ta’ atoro’ ka hokom otaba oreng se ta’ atoro’ ka dhang-ondhang, berri’i petodu reng-oreng jareya. Kalaban cara se kantha jareya reng-oreng jareya ta’ sala ka PANGERAN, ban PANGERAN ta’ kera duka ka ba’na otabana ka reng-oreng jareya. Lakone parenta reya, daddi ba’na ta’ kera sala.
11Imam Agung Amarya bi’ sengko’ eberri’i kakobasa’an se paleng tenggi e dhalem sakabbinna parkara se kasambung ban kom-hokomma agama. Zebaja ana’na Isma’il, iya areya gubennor Yehuda, bi’ sengko’ eberri’i kakobasa’an se paleng tenggi e dhalem sakabbinna parkara laenna. Reng-oreng Lewi se epassrae ajaga sopaja potosanna pangadilan ejalannagi kabbi. Toro’ du-petodu reya ban ja’ pamangmang e dhalem sabarang se elakone ba’na. Moga-moga PANGERAN asarengngana oreng se adil!"