Alkitab Mobile SABDA
[VER] : [MADURA]     [PL]  [PB] 
 <<  2 Tawarikh 6 >> 

1Rato Sulaiman adu’a, "Adhu, GUSTE, Pangeran kaula, Junandalem akasokanan alenggi e dhalem ondhem se petteng.

2Samangken abdidalem maddeggagi Junandalem padalemman se raja sareng ce’ saena, menangka kalenggiyanna Junandalem salanjangnga."

3Saellana adu’a, rato abalik addhep ka sakabbinna ra’yat Isra’il se teppa’na padha manjeng e jadhiya, pas nyo’onnagi berkadda Allah kaangguy reng-oreng jareya.

4Dhabuna, "Lamba’ PANGERAN ajanji kantha reya ka Daud, tang rama, ‘Sajjegga Sengko’ ngeba Tang ommat kalowar dhari Messer sampe’ are teya, e nagara Isra’il tadha’ settonga kottha se bi’ Sengko’ epele kaangguy kennengnganna maddek bengko se ekennengngana oreng abakte ka Sengko’, ban tadha’ settonga oreng se bi’ Sengko’ epele epamimpina Tang ommat Isra’il. Tape sateya Sengko’ mele Yerusalim menangka kennengnganna oreng abakte ka Sengko’. Ban ba’na, Daud, bi’ Sengko’ epele epamarenta’a Tang ommat.’ Pojo GUSTE Allahna Isra’il se la neptebbi janjina jareya!"

5(6:4)

6(6:4)

7Saellana jareya Sulaiman laju adhabu, "Tang rama, Daud, la arancana’agi maddegga bengko kennengnganna oreng abakte ka PANGERAN, Allahna Isra’il.

8Tape PANGERAN adhabu kantha reya ka salerana, ‘Maksodda ba’na jareya bagus.

9Tape banne ba’na, ana’na ba’na se kodu maddek Tang padalemman jareya.’

10Sateya PANGERAN la neptebbi janjina. Sengko’ epadaddi rato Isra’il epagante rama, ban sengko’ la maddek padalemman kennengnganna oreng abakte ka PANGERAN, Allahna Isra’il.

11E dhalem Padalemman Socce reya sengko’ la nyadhiya’agi kennengnganna Petthe Parjanjiyan se aesse papan bato parjanjiyanna PANGERAN ban ommat Isra’il."

12Sulaiman la abadhi panggung dhari paronggu e nga’-tengnga’anna taneyanna Padalemman Socce. Lanjangnga ban lebarra dhuwa’ koma dhuwa’ meter, ban tenggina settong koma tello’ meter. E adha’na ra’yat se hadir, Sulaiman ongga ka panggung jareya, laju ngadek ngadhep ka mezba. Oreng kabbi padha nangale’e ka salerana. Saellana jareya Sulaiman asojud, pas ngangka’ astana dhu kalaja epaaddhep ka langnge’, laju adu’a,

13(6:12)

14"Adhu GUSTE Pangeran, Allahna Isra’il! E langnge’ otabana e bume tadha’ se akadi Junandalem! Junandalem neptebbi janjina sareng noduwagi bellas asena ka ommattepon se esto sareng ta’at kalaban ehlas ka Junandalem.

15Junandalem ampon neptebbi dhabuna ka Daud, rama abdidalem; are mangken sadajana janji gapaneka ampon elampa’agi sareng Junandalem.

16Junandalem ajanji jugan ka rama ja’ manabi toronanna atoro’ kalaban gu-onggu ka sadajana hokommepon Junandalem akadi rama, salanjangnga badhi badha’a terros sala settong dhari toronanna se marenta’a daddi rato Isra’il. Samangken GUSTE Pangeran, Allahna Isra’il, teptebbi jugan sadajana janji se ajanjiyan Junandalem ka Daud, abdiepon Junandalem ka’dhissa’.

17(6:16)

18Namong, Guste Allah, ba’ lerressa Junandalem kasokan alenggi e bume apolong sareng manossa? Sanare langnge’ sadajana gi’ ta’ cokop lebarra badhi Junandalem, ponapa pole namong padalemman kennengnganna kabakteyan se ebadhi abdidalem ka’dhinto!

19GUSTE Allah, Pangeran kaula, abdidalem ka’dhinto abdiepon Junandalem! Sanare saka’dhinto, kasokana Junandalem meyarsa’agi du’a abdidalem, sareng kasokana Junandalem ngabbuli parnyo’onan abdidalem.

20Kasokana Junandalem seyang malem ajaga padalemman se epele sareng Junandalem menangka kennengnganna oreng abakte ka Junandalem ka’dhinto. Moga dhari kalenggiyannepon Junandalem e sowarga kasokana Junandalem meyarsa’agi sareng apareng sapora ka abdidalem sareng ka ommat Isra’il, ommattepon Junandalem, manabi abdidalem sareng ommat ka’dhinto ngadhep ka padalemman ka’dhinto sareng adu’a ka Junandalem.

21(6:20)

22Manabi badha oreng se earane sala ka oreng laen, sareng ebakta ka mezbaepon Junandalem e dhalem Padalemman Socce ka’dhinto badhi esompa ja’ aba’epon ta’ sala,

23GUSTE, kasokana Junandalem meyarsa’agi e sowarga sareng motose parkara di-abdiepon Junandalem ka’dhinto. Okom se sala sareng bebassagi se ta’ sala.

24Manabi ommattepon Junandalem Isra’il epakala sareng so-mosoepon lantaran dusa ka Junandalem, namong saamponna laju atobat sareng ahormadi Junandalem pole menangka PANGERAN, sareng padha entar ka Padalemman Socce ka’dhinto adu’a nyo’on sapora ka Junandalem,

25kasokana Junandalem meyarsa’agi e sowarga. Kasokana Junandalem apareng sapora ka ommadda, sareng abakta ommat ka’dhinto abali ka nagara se sareng Junandalem ampon eparengngagi ka ommat ka’dhinto sareng ka para bangatowana.

26Manabi Junandalem ta’ matoron ojan lantaran ommat ka’dhinto dusa ka Junandalem, namong saamponna laju atobat dhari dusana sareng ahormadi Junandalem pole menangka PANGERAN, sareng pas addhep ka Padalemman Socce adu’a ka Junandalem,

27GUSTE se jumenneng e sowarga, kasokana Junandalem meyarsa’agi ommat ka’dhinto. Sareng kasokana Junandalem nyapora sa-dusana ommattepon Junandalem Isra’il. Parenge oneng ommat ka’dhinto sopaja ngalakone sadaja se lerres. Saamponna gapaneka, GUSTE, patoronnagi ojan ka nagara ka’dhinto, nagara se sareng Junandalem eparengngagi ka ommadda, epadaddi andhi’na salanjangnga.

28Manabi nagara ka’dhinto ekenneng laep sareng wabah, otaba men-tamennan erosak angen panas, panyaket otaba balang, otaba manabi ommattepon Junandalem eserrang moso, otaba eserrang panyaket,

29kasokana Junandalem meyarsa’agi du’aepon ommat ka’dhinto. Manabi e antarana ommat Isra’il badha se sossa atena sareng adu’a ka Junandalem sambi ngangka’ tanangnga epaaddhep ka Padalemman Socce ka’dhinto,

30kasokana Junandalem e kalenggiyannepon e sowarga meyarsa’agi sareng apareng sapora ka ommat ka’dhinto. Namong Junandalem se oneng ka essena atena manossa. Daddi parenge saneyap oreng ponapa se satembang sareng lalakonna,

31sopaja ommattepon Junandalem tako’ sareng ta’at terros ka Junandalem saabidda ommat ka’dhinto neng e nagara se sareng Junandalem eparengngagi ka bangatowa abdidalem sadaja.

32Manabi oreng manca e nagara se jau mereng parkara kaagungan sareng kakowadannepon Junandalem, sarengngan manabi Junandalem bila’a saos kasokan aparenga partolongan, sarengngan oreng gapaneka laju entar ka Padalemman Socce badhi adu’a ka Junandalem,

33kasokana Junandalem dhari kalenggiyanna e sowarga meyarsa’agi du’ana sareng ngabbuli parnyo’onanna. Kalaban cara se kadi ka’dhinto sa-bangsa sadunnya oneng ka Junandalem sareng ta’at ka Junandalem akadi ommattepon Junandalem Isra’il. Sa-bangsa manca tanto pas oneng ja’ padalemman se epaddek abdidalem ka’dhinto kennengnganna oreng abakte ka Junandalem.

34Manabi Junandalem makon ommadda mangkat aperrang sareng mosona, dineng ommat ka’dhinto, e ka’dhimma’a saos ngadhep ka kottha peleyannepon Junandalem ka’dhinto sareng adu’a sambi addhep ka padalemman se epaddek kaator ka Junandalem sareng abdidalem,

35kasokana Junandalem e sowarga meyarsa’agi du’aepon ommat ka’dhinto, sareng apareng kamennangan.

36Manabi ommattepon Junandalem dusa ka Junandalem — pajat lerres tadha’ manossa settonga se ta’ gadhuwan dusa — Junandalem lantaran duka laju mendel kantos ommat ka’dhinto epakala sareng mosona pas ebakta etawan ka nagara laen se jau otaba semma’,

37kasokana Junandalem meyarsa’agi du’ana ommat ka’dhinto. Manabi e nagara gapaneka ommattepon Junandalem ka’dhinto atobat dhari sa-dusana sareng adu’a ka Junandalem sambi ngakone ja’ aba’epon dusa sareng alako jahat, kasokana Junandalem meyarsa’agi du’aepon ommat ka’dhinto, GUSTE.

38Manabi e nagara gapaneka ommat ka’dhinto kalaban ate se ehlas sareng gu-onggu ta’ alako dusa pole, sareng nyo’on ka Junandalem sambi addhep ka nagara se sareng Junandalem eparengngagi ka bangatowa abdidalem sadaja ka’dhinto, addhep ka kottha peleyannepon Junandalem sareng ka padalemman kennengnganna oreng abakte ka Junandalem se ampon epaddek sareng abdidalem ka’dhinto, se sareng abdidalem eatorragi ka Junandalem ka’dhinto,

39kasokana Junandalem dhari kalenggiyanna e sowarga meyarsa’agi du’ana ommat ka’dhinto, sareng kasokana Junandalem apareng kabellasan ka reng-oreng gapaneka. Kasokana Junandalem nyapora sadajana dusana ommattepon Junandalem ka’dhinto.

40Samangken, Guste Allah, kasokana Junandalem ngoladi ka abdidalem sadaja sareng meyarsa’agi sadajana du’a se eatorragi ka Junandalem e kennengngan ka’dhinto.

41Ngereng abungo, GUSTE Allah, Pangeran kaula! Ngereng Junandalem malebbet ka Padalemman Socce ka’dhinto asareng Petthe Parjanjiyan se daddi lambangngepon kakobasa’anna Junandalem, sareng pas terros alenggi e ka’dhinto salanjangnga. Parenge berkat sadaja se elakone mam-imammepon Junandalem, sarengngan moga ommattepon Junandalem sadaja padha’a senneng odhi’na lantaran Junandalem sae ka ommat ka’dhinto.

42GUSTE Allah, Pangeran kaula, ja’ kantos Junandalem nolak rato se ampon epele Junandalem dibi’ ka’dhinto. Kaemodi kataresna’anna Junandalem ka Daud abdiepon Junandalem ka’dhissa’."


  Share Facebook  |  Share Twitter

 <<  2 Tawarikh 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel