Dual Panel1Edhingngagi dhabuna Pangeran reya, he, bangsa Isra’il se la epakalowar dhari Messer bi’ Pangeran! PANGERAN adhabu,
2"Dhari sakabbinna bangsa se badha e dunnya reya, pera’ ba’na se ekennal tor se epekkere sarta ejaga bi’ Sengko’. Jareya sababba mangkana dusana ba’na raja, daddi bi’ Sengko’ masthe eokom."
3Ba’ bisa’a oreng kadhuwa ajalan abareng ta’ kalaban aparembagan gallu?
4Apa macan e alas agaung mon gi’ ta’ nemmo kakanan? Bisa budhu’na macan e rongkangnga agaung mon gi’ ta’ ngenneng mega’ pa-apa?
5Apa mano’ maso’ ka dhalem jira’ mon gi’ tadha’ oreng masang jira’? Apa jebbak adalgep mon tadha’ se ekenneng jebbak?
6Apa oreng e kottha ta’ ngetter mon ngedhing monyena tarompet tandhana perrang? Apa kottha ekenneng balai, mon PANGERAN ta’ madhateng balai jareya?
7GUSTE Allah Se Mahatenggi ta’ tao alampa’agi apa’a bai ta’ kalaban apareng oneng kaadha’ parkara karsana jareya ka para nabbi, di-abdina.
8Mon macan agaung, sapa se ta’ tako’? Mon Guste ALLAH Se Mahatenggi abu-dhabu, sapa se bisa neng-enneng ban ta’ mabalattra dhabuna jareya?
9Kabala reya pabalattra ka reng-oreng se enneng e karaton Messer ban Asdod, "Mara akompol e nong-gunong e sabingkerra Samaria, ban abassagi patete kabadha’an se talebat salbut sarta pamerressan se ejalannagi oreng e jadhiya."
10PANGERAN adhabu, "Reng-oreng jareya ngesse’e ton-karatonna ban rang-barang se ekaolle dhari pamerressan tor kakejjemman. La’-mala’ reng-oreng jareya ta’ tao alako jujur sakale.
11Daddi nagarana reng-oreng jareya bakal ekepponga moso, partahananna bakal epaancora, ban ton-karatonna bakal ebigala.
12Padha ban oreng ngowan se nemmo dumbana se eceppa’ macan, tape se etemmo pera’ sokona sapasang otaba kopengnga satembil, bariya keya oreng Samaria se sateya reya man-manyaman dhung-tedhungan e katedhunganna se lembu’ pera’ sakone’ karena se gi’ odhi’a."
13GUSTE Allah Se Mahatenggi ban Mahakobasa adhabu, "Tetene sateya, sarta paenga’ ka na’ potona Yakub.
14E are bakto Sengko’ ngokom Isra’il polana dusana, Sengko’ mamosna’a ba-mezba e Betel. Saneyap mezba epapotonga co’-konco’na sampe’ gaggar ka tana.
15Ko-bengko kaangguy mosem cellep ban ko-bengko se eangguy bu-ambu lesso e mosem panas bi’ Sengko’ epaancora. Ko-bengko se erengnga bi’ gaddhingnga gaja bakal robbuwa; sakabbinna bengko se raja bakal ancora.