Alkitab Mobile SABDA
[VER] : [MADURA]     [PL]  [PB] 
 <<  Amos 6 >> 

1Calaka’ ba’na se odhi’ man-manyaman neng e Siyon, ban ba’na se arassa aman e Samaria — ba’na, he, pin-pamimpinna masarakat e kalangan bangsa Isra’il se istimewa reya, ba’na se biyasana eentare ra’yat se epentae tolong!

2Kassa’ abas e Kalne, samarena jareya pas ajalan terros ka kottha Hamat se raja jarowa, pas terros ka kottha Gat e Filistin. Apa ba’na nyangka tha-kottha jareya abecce’an dhari karaja’an Yehuda ban Isra’il? Apa dhaerana reng-oreng jareya araja’an dhari dhaerana ba’na?

3Ba’na mathettheng ja’ are se ngeba balai jareya gi’ abit, tape lalakonna ba’na pera’ maceppet dhatengnga are kakejjemman jareya.

4Calaka’ ba’na se dhung-tedhungan e jang-ranjang se bagus ban larang, sarta apesta ngakan dagingnga sape ban dumba se gi’ ngodha!

5Ba’na lebur ngarang nyanyeyan, padha ban Daud, ban mamonye gu-lagu jareya ngangguy calempong.

6Ba’na ngenom anggur dhari gellas se eesse’e sampe’ ngepper, ban ba’na ngangguy mennya’ ro’om se paleng bagus, tape ta’ sossa nangale’e Isra’il se ancor.

7Daddi ba’na se eangko’a dha’-adha’ ka pambuwangan. Ta-pesta ban jang-onjanganna ba’na bakal ambuwa.

8GUSTE Allah Se Mahatenggi ban Mahakobasa apareng parengeddan reya epaterrang, "Sengko’ baji’ nangale’e kaangkowanna ommat Isra’il; Sengko’ ta’ lebur nangale’e ton-karatonna se gus-bagus ban larang. Ibu kotthana ban apa’a bai se badha e jadhiya bi’ Sengko’ epassra’agiya ka moso."

9Mon gi’ badha oreng kasapolo se ngetek e dhalem bengko, reng-oreng jareya bakal mateya keya.

10Settong anggotana kalowarga se kodu ngoburragi jinazana, bakal dhatengnga ban makalowara jinazana balana jareya. Oreng jareya bakal aera’a ka oreng se badha e budhiyanna bengko jareya, "Ba’ gi’ badha’a laenna se odhi’ salaenna sampeyan?" Oreng jareya bakal ngedhinga badha se nyaot, "Tadha’!" Anggotana kalowarga se kodu ngoburragi jinaza jareya bakal ngoca’a, "Ja’ acaca’an pole! Sengko’ ban ba’na ta’ olle nyebbut asmana PANGERAN."

11Mon PANGERAN apareng parenta, ko-bengko raja kene’ bakal epaancora.

12Ba’ badha’a jaran berka’ e gumo’ bato? Ba’ badha’a oreng nyaka’ sagara ngangguy sape? Tape ba’na la alik-balik kaadilan epadaddi racon se mamateyan, sarta abalik se bendher epasala.

13Ba’na asebbal ja’ ba’na la makala Lodebar. Salaenna jareya ba’na ngoca’ keya, "Sengko’ cokop kowat mon arebbu’a Karna’im."

14PANGERAN, Allah Se Mahakobasa dibi’ adhabu, "Ommat Isra’il, Sengko’ madhatengnga tantarana bangsa manca epanyerranga nagarana ba’na. Bangsa jareya bakal nyecce’a ba’na dhari jalan ka Hamat e dhaja sampe’ ka Cora Araba e lao’."


  Share Facebook  |  Share Twitter

 <<  Amos 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel