Dual Panel1Oreng se lebur ka pangataowan senneng narema parengeddan; tape oreng se ta’ endha’ epaenga’ jareya oreng budhu.
2Oreng becce’ ekaleburi PANGERAN, tape oreng se andhi’ sajja jahat bakal narema’a okoman.
3Tadha’ oreng se paggun jaja polana kajahadan; tape oreng se jujur teptep koko, ta’ ekenneng gundhek.
4Bine se becce’ magumbira ban masenneng atena lakena; bine se matodhusan lakena marabut panyaket se mabucco’ tolangnga.
5Oreng jujur mekkere sabarang se becce’; oreng jahat mekker carana se nepowa oreng.
6Cacana oreng jahat mamateyan oreng; cacana oreng jujur madhateng kasalameddan.
7Oreng jahat bakal gaggara ban mate tadha’ lampadda, tape oreng becce’ bakal pagguna koko ron-temoron.
8Oreng ealem satembang ban kabicaksana’anna; oreng eya-seya satembang ban kagendhengnganna.
9Lebbi becce’ daddi oreng kene’ se andhi’ lalakon, etembang gi-masogi tape sanyatana kakorangan kakan.
10Oreng becce’ mekkere ebinna; tape oreng jahat nyeksa ebinna.
11Oreng tane se alako berra’ bannya’ kakananna, tape se wang-mowang baktona kaangguy barang se ta’ aguna jareya oreng budhu nyamana.
12Oreng jahat terro olleya kaontongan dhari oreng daraka; oreng becce’ akantha bungka se abuwa.
13Oreng jahat tajira’ bi’ cacana se juba’, oreng becce’ lopot dhari kasossa’an.
14Saneyap oreng narema ganjaran menorot caca ban lalakonna; kabbi padha eberri’ opa bang-sebang se sabandhing.
15Oreng gendheng apangrasa aba’na ta’ tao sala, tape oreng bicaksana lebur ngedhingngagi babala’an.
16Mon oreng budhu epapeggel oreng, laju ekoca’agi bakto jareya keya; tape oreng bicaksana ta’ parduli maske ecale baramma’a.
17Oreng se acaca bendher madekdek kaadilan, oreng se acaca lecek madhateng barang se ta’ adil.
18Caca se ban-saromban bisa maloka ate akantha se ejujju ban peddhang, caca se bicaksana akantha obat se mabaras.
19Barang se lecek tanto tabungkar e dhalem saparngedep, tape caca se teppa’ bakal teptebba salanjangnga.
20Oreng se andhi’ sajja jahat lebur ka barang se ta’ adil, oreng se nyare kabecce’an bakal sennengnga.
21Oreng becce’ ta’ kera ekenneng mosiba; oreng jahat tanto ros-terrosan sossa.
22PANGERAN baji’ ka oreng se lecegan; tape lebur ka oreng se jujur.
23Oreng se bicaksana ta’ ngedirragi pangataowanna, oreng budhu ngobral kabudhuwanna.
24Oreng se alako berra’ neggu’ kakobasa’an; oreng se males tapaksa daddi dunor.
25Kakobateran e dhalem ate mapotong samangat, tape caca se manes maraja ate.
26Oreng se bendher apojuran dhari tatanggana, oreng jahat posang polana kajahadanna.
27Oreng males ta’ kera ngaolle pangaterrona; mon alako berra’ tanto olle arta.
28Oreng se noro’ jalan se bendher tanto senneng odhi’na; oreng se noro’ jalan se sala nojju ka maot.